দানবীৰ হিচাপে সকলোৰে মাজত চৰ্চিত ছনু সুদক চিনি নোপোৱা মানুহ নাই। সদায়েই আৰ্তজনৰ কাষত থিয় দিয়া ছনু সুদ এতিয়া সাধাৰণ মানুহৰ বাবে ভগৱান! মহামাৰীৰ সময়ত দেশৰ মানুহৰ কাষত থিয় দিছিল তেওঁ। হয়তো সেই মহৎ কৰ্মৰ বাবেই এক মধুৰ মুহূৰ্তৰ সাক্ষী হ’ল অভিনেতাজন।
শেহতীয়াকৈ অভিনেতাজন এখন ৰেষ্টোৰাত নিশাৰ আহাৰ গ্ৰহণৰ বাবে গৈছিল। কিন্তু আহাৰ গ্ৰহণৰ পাছতেই তেওঁ যেতিয়া বিল পৰিশোধৰ বাবে যায়, তেতিয়াই ঘটিল অকল্পনীয় এক মধুৰ ঘটনা। কিয়নো অভিনেতাজনে বিল পৰিশোধ কৰিবলৈ গৈ জানিব পাৰে যে ইতিমধ্যে তেওঁৰ বিল আন কোনোবাই পৰিশোধ কৰিছে। আনফালে বিল পৰিশোধ কৰা লোকজনে ছনুৰ বাবে এৰি থৈ যায় এক মধুৰ বাৰ্তা। অভিনেতাজনে ছ’চিয়েল মিডিয়াত শ্বেয়াৰ কৰিছে সেই বাৰ্তা। য’ত লিখা আছিল ”আপুনি আমাৰ দেশৰ বাবে কৰা সকলো ভাল কামৰ বাবে ধন্যাবাদ।”
আনফালে অভিনেতাজনৰ বিল পৰিশোধ কৰা লোকজনে নিজৰ পৰিচয় গোপনে ৰাখিছে। ইয়াৰ পাছতে ছনুৱে তেখেতৰ ফেচবুক পেজত লিখিছে যে ”মই নাজানো কোনে এই কাম কৰিলে। ৰেষ্টুৰেণ্টত আমাৰ বিল পৰিশোধ কৰি তেখেতে এটা মধুৰ বাৰ্তা এৰি থৈ গ’ল। আপোনাৰ এই কামে মোৰ হৃদয় চুই গ’ল। ধন্যবাদ বন্ধু।”
