হাৰিয়ানাৰ পঞ্চকুলাৰ এখন চৰকাৰী বিদ্যালয়ৰ শ্ৰেণীকোঠাৰ ভিতৰত বিশেষভাৱে সক্ষম এগৰাকী ছয় বছৰীয়া কন্যা শিশুক আঠ বছৰীয়া এজন ল’ৰাই আক্ৰমণ কৰাৰ ঘটনাক লৈ শনিবাৰে হাৰিয়ানা চৰকাৰে তদন্তৰ নিৰ্দেশ দিছে। আনহাতে, বিদ্যালয় কৰ্তৃপক্ষৰ বিৰুদ্ধে কৰ্তব্যত গাফিলতি কৰাৰ অভিযোগত আৰক্ষীয়ে এখন এজাহাৰ (FIR) পঞ্জীয়ন কৰিছে। যোৱা ২৮ অক্টোবৰত সংঘটিত এই ঘটনাৰ সন্দৰ্ভত হাৰিয়ানা ৰাজ্যিক শিশু অধিকাৰ সুৰক্ষা আয়োগেও (HSCPCR) স্বতঃপ্ৰণোদিতভাৱে গোচৰটো গ্ৰহণ কৰিছে।
আক্ৰমণৰ ফলত কন্যা শিশুগৰাকী গুৰুতৰভাৱে আহত হয় আৰু তেওঁক চণ্ডীগড়ৰ স্নাতকোত্তৰ চিকিৎসা শিক্ষা আৰু গৱেষণা প্ৰতিষ্ঠান (PGIMER)ত ভৰ্তি কৰোৱা হয়। বৰ্তমান তেওঁ বিপদমুক্ত বুলি পঞ্চকুলাৰ আৰক্ষীৰ উপ-আৰক্ষী আয়ুক্ত আদিতি সিঙে জানিবলৈ দিয়ে।
সামাজিক মাধ্যমত প্ৰচাৰিত হোৱা ঘটনাটোৰ এটা ভিডিঅ’ত দেখা গৈছে যে ল’ৰাজনে কন্যা শিশুগৰাকীৰ চুলিত ধৰি তেওঁৰ মূৰটো বাৰে বাৰে এখন ডেস্কত খুন্দিয়াইছে। তাৰ পাছত শিশুগৰাকী মজিয়াত পৰি যোৱাত তেওঁক ভৰিৰে গচকি আৰু ইটাৰ দৰে দেখা এবিধ বস্তুৰে আঘাত কৰা বুলি অভিযোগ উঠিছে।
এই ঘটনাৰ তদন্তৰ বাবে হাৰিয়ানা চৰকাৰে পাঁচজনীয়া এখন সমিতি গঠন কৰিছে বুলি চৰকাৰী বিবৃতিত প্ৰকাশ কৰা হৈছে। চৰকাৰে কন্যা শিশুগৰাকীৰ চিকিৎসাৰ সম্পূৰ্ণ ব্যয় বহন কৰাৰ লগতে ৰাজ্যখনৰ সকলো বিদ্যালয়ৰ নিৰাপত্তা ব্যৱস্থাৰ বিস্তৃত পৰ্যালোচনা আৰু নিৰীক্ষণ কৰাৰ কথাও ঘোষণা কৰিছে।
শিক্ষামন্ত্ৰী মহিপাল ধাণ্ডাই কয় যে শিশুৰ সুৰক্ষা আৰু কল্যাণৰ ক্ষেত্ৰত কোনো ধৰণৰ গাফিলতি সহ্য কৰা নহ’ব। তেওঁ কন্যা শিশুগৰাকীৰ স্বাস্থ্যৰ উন্নতিৰ বাবে উদ্বেগ প্ৰকাশ কৰাৰ লগতে চৰকাৰ শিশুগৰাকীৰ পৰিয়ালৰ কাষত দৃঢ়ভাৱে থিয় দিছে বুলিও আশ্বাস দিয়ে।
অতিৰিক্ত উপায়ুক্তৰ নেতৃত্বত গঠন কৰা এই তদন্ত সমিতিখনত জিলা শিক্ষা বিষয়া, জিলা শিশু সুৰক্ষা বিষয়া, আৰক্ষী আয়ুক্তই মনোনীত কৰা এগৰাকী আৰক্ষী বিষয়া আৰু এগৰাকী বিশেষ শিক্ষাবিদ অথবা শিশু মনোবিজ্ঞানী অন্তৰ্ভুক্ত কৰা হৈছে। চৰকাৰী বিবৃতি অনুসৰি, সমিতিখনক সাত দিনৰ ভিতৰত তদন্তৰ প্ৰতিবেদন দাখিল কৰিবলৈ নিৰ্দেশ দিয়া হৈছে।
আনহাতে, হাৰিয়ানা ৰাজ্যিক শিশু অধিকাৰ সুৰক্ষা আয়োগে পঞ্চকুলাৰ জিলা শিক্ষা বিষয়ালৈ জাননী জাৰি কৰি ঘটনাটোৰ পৰিস্থিতি আৰু শিক্ষা বিভাগে গ্ৰহণ কৰা ব্যৱস্থাৰ বিষয়ে বিস্তৃত প্ৰতিবেদন বিচাৰিছে।
আয়োগে শ্ৰেণীকোঠাত নিৰাপত্তা আৰু তদাৰকীৰ ব্যৱস্থা কেনে আছিল, শিশুসকলৰ দায়িত্বত কোন কোন কৰ্মচাৰী নিয়োজিত আছিল আৰু ঘটনাৰ পাছত বিদ্যালয় কৰ্তৃপক্ষই তাৎক্ষণিকভাৱে কি ব্যৱস্থা গ্ৰহণ কৰিছিল, সেই বিষয়ে জানিব বিচাৰিছে। ইয়াৰ ভিতৰত প্ৰাথমিক চিকিৎসা প্ৰদান, শিশুগৰাকীক চিকিৎসালয়লৈ নিয়া আৰু পৰিয়ালক অৱগত কৰাৰ বিষয়সমূহো অন্তৰ্ভুক্ত।
ইয়াৰ উপৰি শিশুগৰাকীক প্ৰদান কৰা চিকিৎসাৰ বিৱৰণ, তদাৰকীৰ দায়িত্বত থকা লোকসকলৰ বিৰুদ্ধে গ্ৰহণ কৰা বা গ্ৰহণ কৰিবলৈ প্ৰস্তাৱ কৰা ব্যৱস্থা আৰু ভৱিষ্যতে এনে ঘটনা ৰোধৰ বাবে লোৱা পদক্ষেপৰ বিষয়েও আয়োগে তথ্য বিচাৰিছে।
আয়োগে বিদ্যালয়ৰ কৰ্তব্যৰ তালিকা, উপস্থিতিৰ নথি-পত্ৰ, উপলব্ধ হ’লে চিচিটিভি (CCTV) ফুটেজ, ঘটনাৰ প্ৰতিবেদন আৰু অন্যান্য প্ৰাসংগিক নথি-পত্ৰও বিচাৰিছে।
আয়োগে নিজৰ জাননীত উল্লেখ কৰিছে, “এই ঘটনাটো বিদ্যালয় চৌহদৰ ভিতৰত শিশুৰ সুৰক্ষা আৰু সংৰক্ষণৰ সৈতে জড়িত। সেয়েহে ঘটনাৰ তথ্যসম্বলিত প্ৰতিবেদন আৰু গ্ৰহণ কৰা ব্যৱস্থাৰ প্ৰতিবেদন (Action Taken Report) অগ্ৰাধিকাৰৰ ভিত্তিত কোনো কাৰণতে ব্যৰ্থ নোহোৱাকৈ আয়োগক দাখিল কৰিব লাগিব।”
আৰক্ষীৰ উপ-আৰক্ষী আয়ুক্ত সিঙে কয় যে অভিযুক্ত ল’ৰাজনৰ বয়স আঠ বছৰ হোৱাৰ বাবে কিশোৰ ন্যায় আইন (Juvenile Justice Act)ৰ বিধান অনুসৰি বিশেষজ্ঞসকলৰ দ্বাৰা তেওঁৰ মনস্তাত্ত্বিক মূল্যায়ন কৰা হৈছে। এই মূল্যায়নৰ প্ৰতিবেদনৰ ভিত্তিত পৰৱৰ্তী ব্যৱস্থা গ্ৰহণ কৰা হ’ব বুলিও তেওঁ জানিবলৈ দিয়ে।
সিঙে লগতে কয়, “আৰক্ষীৰ তদন্তৰ সময়ত বিদ্যালয় কৰ্তৃপক্ষৰ গাফিলতিৰ কথা পোহৰলৈ আহিছে। সেইবাবে কিশোৰ ন্যায় আইন আৰু ভাৰতীয় ন্যায় সংহিতা (BNS)ৰ প্ৰাসংগিক ধাৰাৰ অধীনত বিদ্যালয় কৰ্তৃপক্ষৰ বিৰুদ্ধে এজাহাৰ পঞ্জীয়ন কৰা হৈছে।”
তেওঁ লগতে জানিবলৈ দিয়ে যে পঞ্চকুলাৰ সকলো বিদ্যালয়ৰ বাবে শীঘ্ৰেই এক মানক কাৰ্যপদ্ধতি (SOP) জাৰি কৰা হ’ব। বিদ্যালয়ত শিশুৰ সুৰক্ষা নিশ্চিত কৰাৰ উদ্দেশ্যে আৰক্ষীয়ে শিক্ষক-শিক্ষয়িত্ৰী আৰু ছাত্ৰ-ছাত্ৰীসকলৰ মাজত সজাগতা কাৰ্যসূচীও অনুষ্ঠিত কৰিব।
ইফালে, কন্যা শিশুগৰাকীৰ খুৰাকে বিদ্যালয় কৰ্তৃপক্ষৰ বিৰুদ্ধে গাফিলতিৰ অভিযোগ উত্থাপন কৰিছে। তেওঁৰ অভিযোগ অনুসৰি, শ্ৰেণীকোঠাত চিচিটিভি কেমেৰা সংস্থাপন কৰা আছিল যদিও ঘটনাৰ সময়ত সেইবোৰ কোনো লোকে নিৰীক্ষণ কৰি থকা নাছিল।
তেওঁ কয় যে সাধাৰণতে শিশুগৰাকীক বিদ্যালয়লৈ অনা-নিয়া কৰা অটোৰিক্সাৰ চালকজনে সেইদিনা বিদ্যালয়ৰ পৰা ঘৰলৈ নিবলৈ আহি তেওঁক বিচাৰি পোৱা নাছিল। তাৰ পাছত তেওঁ পৰিয়ালক খবৰ দিয়ে। খবৰ পোৱাৰ পাছত শিশুগৰাকীৰ পিতৃ বিদ্যালয়লৈ যায়।
পৰিয়ালৰ অভিযোগ মতে সেইদিনা বিদ্যালয়ৰ কেইবাজনো শিক্ষকক আন ঠাইত কৰ্তব্য পালন কৰিবলৈ দায়িত্ব দিয়া হৈছিল বুলি পৰিয়ালটোক জনোৱা হৈছিল। তেওঁৰ অভিযোগ অনুসৰি, দুপৰীয়া ৩ বজাৰ পৰা ৩.১৫ বজাৰ ভিতৰত ঘটনাটো সংঘটিত হৈছিল আৰু প্ৰধান শিক্ষকজন প্ৰায় ৩ বজাতেই বিদ্যালয়ৰ পৰা ওলাই গৈছিল।
খুৰাকে কয়, “বিদ্যালয়ত চিচিটিভি কেমেৰা সংস্থাপন কৰা আছে আৰু প্ৰধান শিক্ষকৰ কোঠাৰ পৰাই প্ৰতিটো কাৰ্যকলাপ নিৰীক্ষণ কৰিব পাৰি। কিন্তু ঘটনাৰ সময়ত তাত কোনো লোক উপস্থিত নাছিল। কাৰ্যালয়ত যদি কোনো লোক বহি থাকিলহেঁতেন, তেন্তে এই ঘটনা সংঘটিত নহ’লহেঁতেন।”
তেওঁ জানিবলৈ দিয়ে যে প্ৰথমে শিশুগৰাকীক পঞ্চকুলাৰ এখন ব্যক্তিগত চিকিৎসালয়লৈ নিয়া হৈছিল। তাৰ পাছত তেওঁক ছেক্টৰ-৬ৰ অসামৰিক চিকিৎসালয়লৈ প্ৰেৰণ কৰা হয়। পৰৱৰ্তী সময়ত উন্নত চিকিৎসাৰ বাবে তেওঁক চণ্ডীগড়ৰ PGIMERলৈ স্থানান্তৰ কৰা হয়।
খুৰাকে লগতে অভিযোগ কৰে যে পৰিয়ালৰ লোক বিদ্যালয়ত উপস্থিত হোৱাৰ সময়ত শ্ৰেণীকোঠাটো তলা মাৰি বন্ধ কৰি থোৱা আছিল আৰু শিশুগৰাকীক বাহিৰলৈ উলিয়াই আনিবলৈ তেওঁলোকৰ প্ৰায় দুঘণ্টা সময় লাগিছিল।
