ICCৰ এদিনীয়া বলাৰৰ ৰেংকিঙৰ শীৰ্ষত ছিৰাজ
৮টাকৈ স্থান আগুৱাই ‘বলিঙৰ কিং’ ছিৰাজ
এছিয়া কাপৰ ফাইনেলত ৬টাকৈ উইকেট দখল কৰি সিংহলী বাহিনীক বিধ্বস্ত কৰা মহম্মদ ছিৰাজ এতিয়া ৱৰ্ল্ডৰ নাম্বাৰ ৱান। ICC-এ শেহতীয়াকৈ ঘোষণা কৰা এদিনীয়া বলাৰ ৰেংকিঙৰ শীৰ্ষ স্থান দখল কৰিলে হায়দৰাবাদৰ দুৰ্ধৰ্ষ বেগী বলাৰজনে। ইয়াৰ পূৰ্বে নৱম স্থানত থকা ছিৰাজে ৬৯৫ ৰেটিং পইণ্টেৰে এদিনীয়া বলিং ৰেংকিঙৰ শীৰ্ষত আৰোণ কৰিবলৈ সক্ষম হৈছে। এছিয়া কাপৰ ফাইনেল খেলত দেখুওৱা দমনীয়া প্ৰদৰ্শনৰ বলতক এমআৰএফ ICC পুৰুষৰ এদিনীয়া বলিং ৰেংকিঙৰ তালিকাত ১ নম্বৰ স্থান দখল কৰাত সহায় কৰিছে। সকলোকে চমকিত কৰি ২১ ৰানৰ বিনিময়ত ৬ উইকেট দখল কৰা এছিয়া কাপজয়ী বলিং স্পেলটোৱে শীৰ্ষস্থানত উপনীত হ’বলৈ সক্ষম কৰি তুলিছে। উল্লেখযোগ্য যে, ইয়াৰ পূৰ্বে চলিত বৰ্ষৰ মাৰ্চ মাহতো এদিনীয়া ৰেংকিঙৰ শীৰ্ষত আছিল ছিৰাজ। আনহাতে, ৬৭৮ ৰেটিং পইণ্টেৰে ৰেংকিঙৰ দ্বিতীয় স্থানত অষ্ট্ৰেলিয়াৰ পেচ বলাৰ জছ হেজলৌড। ৬৭৭ ৰেটিং পইণ্টৰে তৃতীয় স্থানত আছে নিউজিলেণ্ডৰ ট্ৰেণ্ট ব’ল্ট। মহম্মদ ছিৰাজৰ লগতে শীৰ্ষ ১০ স্থানত আছে আন এজন ভাৰতীয়। ৬৩৮ পইণ্টেৰে নৱম স্থানত আছে স্পিন বলিঙৰ নতুন কিং কুলদীপ যাদৱ।
এই সফলতাই বিশ্বকাপৰ পূৰ্বে মহম্মদ ছিৰাজৰ মনোবল বৃদ্ধি কৰিব বুলি আশা প্ৰকাশ কৰিছে ক্ৰিকেট অনুৰাগীসকলে। ছিৰাজে বৰ্তমানলৈকে ভাৰতৰ হৈ খেলিছে ২৯খনকৈ এদিনীয়া আন্তঃৰাষ্ট্ৰীয় মেচ। এই ২৯খন মেচত ছিৰাজে দখল কৰিছে ৫৩টা উইকেট। ইপিনে, টেষ্ট মেচত ৫৯টা আৰু T-20 মেচত ভাৰতৰ হৈ বেগী বলাৰজনে দখল কৰিছে ১১টাকৈ গুৰুত্বপূৰ্ণ উইকেট। এতিয়া ভাৰতীয় ক্ৰিকেট অনুৰাগীৰ এটাই আশা, এছিয়া কাপৰ দৰে বিশ্বকাপতো চলক ছিৰাজৰ ‘Miyan Magic’। দখল কৰক ইটোৰ পিছত সিটো উইকেট আৰু হওঁক বিশ্ব চেম্পিয়ন তথা মহান ক্ৰিকেটাৰ।
