অসম আৰু মেঘালয়ৰ মাজত বৃদ্ধি পোৱা উত্তেজনাৰ মাজতে শুকুৰবাৰে নিশা শ্বিলঙৰ কেইবাটাও পেট্ৰ’ল পাম্পত দীঘলীয়া শাৰী দেখা যায়। পেট্ৰ’ল, ডিজেল আৰু এলপিজিৰ যোগান ব্যাহত হোৱাৰ আশংকাত বহু লোকে আগতীয়াকৈ ইন্ধন সংগ্ৰহ কৰিবলৈ পেট্ৰ’ল পাম্পত ভিৰ কৰে। শ্বিলঙৰ কেইবাটাও পাম্পত ইন্ধন শেষ হোৱা বুলিও জানিব পৰা গৈছে।
১৯ আগষ্টত শ্বিলঙত খাচী ছাত্ৰ ইউনিয়ন (KSU)-ৰ প্ৰতিবাদৰ সময়ত সংঘটিত হিংসাত্মক ঘটনাৰ পাছতে দুয়োখন ৰাজ্যৰ মাজত উত্তেজনা বৃদ্ধি পাইছে। প্ৰতিবেদন অনুসৰি, ৩০খনতকৈ অধিক পৰ্যটক বাহন ভাঙি-চূৰমাৰ কৰাৰ পাছত অসমৰ টেক্সি চালকসকলে মেঘালয় অভিমুখী বাহন চলাচলত বাধা আৰোপ কৰে। ইয়াৰ প্ৰত্যুত্তৰত মেঘালয়ৰ ফালৰ পৰাও অৱৰোধৰ ঘটনা সংঘটিত হয়।
ইয়াৰ মাজতে North-East Petroleum Mazdoor Union (NEPMZ)-এ শুকুৰবাৰে অসমৰ পৰা মেঘালয়লৈ পেট্ৰ’ল, ডিজেল আৰু এলপিজি পৰিবহণ বন্ধ কৰাৰ ভাবুকি দিয়ে। অসমৰ পঞ্জীয়নভুক্ত বাহন, বিশেষকৈ পৰ্যটক বাহনৰ নিৰাপত্তাক লৈ উদ্বেগ প্ৰকাশ কৰি এই সিদ্ধান্তৰ কথা ঘোষণা কৰে সংগঠনটোৱে।
অসমৰ পঞ্জীয়নভুক্ত বাহন আৰু পৰ্যটক বাহনৰ নিৰাপত্তা নিশ্চিত কৰা, পৰিস্থিতি স্বাভাৱিক কৰা আৰু হিংসাৰ সৈতে জড়িত লোকৰ বিৰুদ্ধে কঠোৰ ব্যৱস্থা গ্ৰহণ কৰিবলৈ মেঘালয় চৰকাৰক আহ্বান জনাইছে NEPMZ-এ।
আনহাতে, চলি থকা KSU আন্দোলনৰ পৰিপ্ৰেক্ষিতত মেঘালয়ৰ কেইবাখনো জিলাৰ জিলা প্ৰশাসনে খুচুৰা পৰিমাণত পেট্ৰ’ল-ডিজেল বিক্ৰী আৰু বিতৰণত নিষেধাজ্ঞা আৰোপ কৰিছে। নিয়ম ভংগকাৰীৰ বিৰুদ্ধে ভাৰতীয় ন্যায় সংহিতাৰ (BNS) ধাৰা ২২৩সহ প্ৰযোজ্য আইনৰ অধীনত ব্যৱস্থা গ্ৰহণ কৰা হ’ব।
