‘IPL দল এটাক নেতৃত্ব দিব পৰাটো মোৰ বাবে গৌৰৱৰ কথা৷ ইয়াৰ বাবে মই ৰাজস্থান ৰয়েলছৰ প্ৰতি চিৰকৃতজ্ঞ৷ মই পূৰ্বে ৰাজ্যিক দলক নেতৃত্ব দিছিলো যদিও আন্তৰ্জাতিক স্তৰত কেতিয়াও এনে দায়িত্ব পোৱা নাছিলো৷ মোৰ কেৰিয়াৰৰ উত্তৰণত ৰাজস্থান ৰয়েলছে গুৰুত্বপূৰ্ণ ভূমিকা পালন কৰিছে৷ আৰম্ভনিৰ পৰাই মোৰ পাছত দলটো থিয় হৈ আছে৷ এইবাৰ অধিনায়কৰ দায়িত্ব দি মোৰ প্ৰতি যি গভীৰ আস্থা ৰয়েলছৰ দলীয় মেনেজমেণ্টে ৰাখিছে তাক লৈ মই আপ্লুত লগতে দলক প্ৰত্যাশিত সফলতা দিবলৈও দৃঢ়৷’ এই মন্তব্য ৰাজস্থান ৰয়েলছৰ অধিনায়ক ৰিয়ান পৰাগৰ৷
উল্লেখ্য যে চলিত ইণ্ডিয়ান প্ৰিমিয়াৰ লীগ [আই পি এল] ৰ প্ৰথম দুখন ঘৰুৱা মেচ গুৱাহাটীত খেলিবলৈ অহা ৰাজস্থান ৰয়েলছে কাইলৈ বৰ্ষাপাৰাৰ এ চি এ ষ্টেডিয়ামত কলকাতা নাইটৰাইডাৰ্ছৰ মুখামুখি হ’ব৷ আজি সংবাদমেলত অংশ লৈ ৰিয়ানে মেচৰ প্ৰস্তুতি তথা অধিনায়ক হোৱাৰ পাছত প্ৰথমবাৰৰ বাবে মিডিয়াৰ লগত বাৰ্তালাপ কৰি নিজৰ অনুভূতি ব্যক্ত কৰে৷ গুৱাহাটীত দূয়োখন মেচতে ঘৰুৱা অনুৰাগীৰ সন্মুখত ৰয়েলছ দলক নেতৃত্ব দিব পৰাটো ৰিয়ানৰ বাবে ৰোমাঞ্চকৰ অভিজ্ঞতা হ’ব বুলিও অসম সন্তানজনে ব্যক্ত কৰে৷ আনহাতে, এ চি এ ষ্টেডিয়ামৰ উইকেট, খেলপথাৰ তথা গেলাৰীৰ দৰ্শক তেওঁৰ বাবে চিনাকি হোৱাত নেতৃত্বৰ চাপ নাথাকে বুলিও কয়৷
‘কাইলৈৰ দিনটো মোৰ বাবে উল্লেখনীয়৷ আমি প্ৰথম মেচ হায়দৰাবাদত খেলিছিলো৷ কিন্তু কাইলৈ আমাৰ প্ৰথম ঘৰুৱা মেচ লগতে মোৰ নেতৃত্বত ৰাজস্থান ৰয়েলছে খেলিব৷ আশাকৰো আমি ঘৰুৱা সমৰ্থকৰ আশীৰ্বাদ আৰু মৰম খেলপথাৰত পাম৷ ঘৰত খেলাৰ সুযোগে আমাক সফলতা দিয়াতো নিশ্চিতৰূপত সহায় কৰিব৷’ ৰিয়ানে লগতে কয়৷ ইফালে, যোৱা মেচৰ বিফলতা বা প্ৰথম মেচত আৰ আৰ দলৰ বলিং বিভাগৰ দূৰ্বলতা সন্দৰ্ভত ৰিয়ানে কয় যে হৈ যোৱা মেচৰ কথা তেওঁ বিশ্লেষন নকৰে৷ গুৱাহাটীত দুই চেম্পিয়ন কে কে আৰ আৰু চি এছ কেৰ বিৰুদ্ধে জয়ৰ লক্ষ্যৰে খেলিবলৈ ৰয়েলছ সাজু হৈছে৷
