মুম্বাইত বৃহস্পতিবাৰে অনুষ্ঠিত হ’ব ভাৰতীয় ক্ৰিকেটৰ শীৰ্ষ বিষয়াসকলৰ এখন গুৰুত্বপূৰ্ণ বৈঠক। বৈঠকৰ কোনো আনুষ্ঠানিক এজেণ্ডা ঘোষণা কৰা হোৱা নাই যদিও শেহতীয়াকৈ ভাৰতীয় দলৰ প্ৰদৰ্শন, বিশেষকৈ ইংলেণ্ড আৰু আয়াৰলেণ্ড ভ্ৰমণৰ প্ৰদৰ্শনক লৈ বিস্তৃত পৰ্যালোচনা হোৱাৰ সম্ভাৱনা আছে। বৈঠকত উপস্থিত থাকিব ভাৰতীয় দলৰ মুখ্য প্ৰশিক্ষক গৌতম গম্ভীৰ, মুখ্য নিৰ্বাচক অজিত আগৰকাৰ আৰু চেণ্টাৰ অৱ এক্সেলেন্সৰ মুৰব্বী ভি ভি এছ লক্ষ্মণ। BCCIৰ সচিব দেৱজিত শইকীয়াই বৈঠকখন আহ্বান কৰাৰ লগতে অধ্যক্ষতা কৰিব। সকলো বিষয়াই ব্যক্তিগতভাৱে বৈঠকত উপস্থিত থকাৰ সম্ভাৱনা আছে।
ইফালে, বৈঠকখনলৈ আমন্ত্ৰণ জনোৱা হৈছে ভাৰতীয় টেষ্ট আৰু এদিনীয়া দলৰ অধিনায়ক শুভমন গিলকো। গিলে ব্যক্তিগতভাৱে বৈঠকত উপস্থিত থাকি দলৰ ভৱিষ্যৎ পৰিকল্পনা আৰু শেহতীয়া শৃংখলাসমূহৰ প্ৰদৰ্শন সন্দৰ্ভত নিজৰ মতামত আগবঢ়াব। T-20 দলৰ অধিনায়ক শ্ৰেয়াছ আয়াৰ বৈঠকত ব্যক্তিগতভাৱে উপস্থিত থাকিব নে ভাৰ্চুৱেলী অংশগ্ৰহণ কৰিব, সেয়া এতিয়াও স্পষ্ট হোৱা নাই। অৱশ্যে তেওঁ বৈঠকৰ অংশ হ’ব বুলি জানিব পৰা গৈছে।
বৈঠকৰ অন্যতম গুৰুত্বপূৰ্ণ বিষয় হ’ব ভাৰতীয় দলৰ শেহতীয়া প্ৰদৰ্শন। আয়াৰলেণ্ড আৰু ইংলেণ্ডত ভাৰতীয় WHITE বলৰ দলৰ প্ৰদৰ্শন আশানুৰূপ হোৱা নাই। T-20 বিশ্বকাপৰ চেম্পিয়ন ভাৰতীয় দলে আয়াৰলেণ্ড আৰু ইংলেণ্ডৰ বিৰুদ্ধে খেলা ছয়খন সম্পূৰ্ণ T-20 আন্তঃৰাষ্ট্ৰীয় মেচৰ এখনতো জ লাভ কৰিব পৰা নাই।
ইয়াৰ পূৰ্বে BCCIৰ সচিব দেৱজিত শইকীয়াই ভাৰতীয় T-20 দলৰ প্ৰদৰ্শন পৰ্যালোচনা কৰাৰ ইংগিত দিছিল। তেওঁ শেহতীয়া ফলাফলক কেৱল এটা বেয়া সময় বুলি অভিহিত কৰিছিল। ইফালে, বৈঠকত বিশেষভাৱে চৰ্চিত হ’ব পাৰে ৰোহিত শৰ্মাৰ ভৱিষ্যৎ। ২০২৭ চনৰ এদিনীয়া বিশ্বকাপত ৰোহিতৰ স্থানক লৈ BCCI আৰু নিৰ্বাচকসকলৰ মাজত মতভেদৰ চৰ্চা চলিছিল। ৰোহিতৰ বাবে লৰ্ডছত অনুষ্ঠিত এদিনীয়া মেচখনেই অন্তিম মেচ হ’ব পাৰে বুলি খবৰ প্ৰকাশ পোৱাৰ পিছতে BCCIয়ে সেই সন্দৰ্ভত অস্বীকাৰ কৰিছিল।
এতিয়া বৃহস্পতিবাৰৰ বৈঠকে ৰোহিত শৰ্মাৰ আন্তঃৰাষ্ট্ৰীয় কেৰিয়াৰ আৰু ২০২৭ বিশ্বকাপৰ পৰিকল্পনাক লৈ কিছু স্পষ্টতা আনিব পাৰে বুলি আশা কৰা হৈছে। ইয়াৰ লগতে ভৱিষ্যতৰ সূচী সন্দৰ্ভতো বৈঠকত আলোচনা হ’ব। নিউজিলেণ্ডৰ বিৰুদ্ধে ভাৰতৰ আগন্তুক পূৰ্ণাংগ বহু-ফৰ্মেট শৃংখলাত পাঁচখন T-20, পাঁচখন এদিনীয়া আৰু দুখন টেষ্ট মেচ অনুষ্ঠিত হ’ব। ২০২৭ চনৰ এদিনীয়া বিশ্বকাপৰ প্ৰস্তুতি আৰু চলিত বিশ্ব টেষ্ট চেম্পিয়নশ্বিপত ভাৰতৰ অৱস্থাও আলোচনাৰ গুৰুত্বপূৰ্ণ বিষয় হ’ব।
আনহাতে, মুখ্য নিৰ্বাচক অজিত আগৰকাৰৰ ভৱিষ্যৎ আৰু ভি ভি এছ লক্ষ্মণে ভাৰতীয় দলৰ সৈতে অধিক গুৰুত্বপূৰ্ণ দায়িত্ব গ্ৰহণ কৰাৰ সম্ভাৱনা সন্দৰ্ভতো শেহতীয়াকৈ চৰ্চা চলিছে। অৱশ্যে BCCI, আগৰকাৰ বা লক্ষ্মণ, কোনোৱেই এই সন্দৰ্ভত আনুষ্ঠানিকভাৱে কোনো মন্তব্য কৰা নাই। BCCIৰ আগন্তুক বাৰ্ষিক সাধাৰণ সভাৰ পূৰ্বে অনুষ্ঠিত হ’বলগীয়া এই বৈঠকখন যথেষ্ট গুৰুত্বপূৰ্ণ বুলি বিবেচিত হৈছে। বৈঠকত গ্ৰহণ কৰা সিদ্ধান্তসমূহ পৰৱৰ্তী সময়ত সাধাৰণ সভাৰ সন্মুখতো উত্থাপন হ’ব পাৰে।
