অসমৰ উমৈহতীয়া দেৱানী বিধি (UCC) বিধেয়ক, ২০২৬ত ৰাষ্ট্ৰপতি দ্ৰৌপদী মূৰ্মুৱে অনুমোদন জনোৱাৰ পাছত ৰাজ্যখনত উমৈহতীয়া দেৱানী বিধি প্ৰৱৰ্তনৰ পথ মুকলি হৈছে। ৰাষ্ট্ৰপতিয়ে ২৯ ছেপ্টেম্বৰত বিধেয়কখনত অনুমোদন জনায়। ইয়াৰ ফলত অসমত বিবাহ, বিবাহ-বিচ্ছেদ, উত্তৰাধিকাৰ আৰু লিভ-ইন সম্পৰ্ককে ধৰি ব্যক্তিগত আৰু পাৰিবাৰিক বিষয়সমূহত এক উমৈহতীয়া আইনী কাঠামো প্ৰৱৰ্তনৰ প্ৰক্ৰিয়া আগবাঢ়িল।
উল্লেখ্য যে, অসম বিধানসভাই চলিত বৰ্ষৰ ২৭ মে’ত ‘Uniform Civil Code, Assam, Bill, 2026’ গৃহীত কৰিছিল। বিধেয়কখন বিধানসভাত প্ৰায় পাঁচ ঘণ্টা ধৰি হোৱা আলোচনাৰ পাছত গৃহীত হয়। বিধেয়কখনৰ জৰিয়তে ৰাজ্যখনত বিবাহ, বিবাহ-বিচ্ছেদ, উত্তৰাধিকাৰ আৰু লিভ-ইন সম্পৰ্কৰ ক্ষেত্ৰত এক উমৈহতীয়া দেৱানী আইন প্ৰৱৰ্তনৰ প্ৰস্তাৱ আগবঢ়োৱা হৈছিল।
ৰাষ্ট্ৰপতিৰ অনুমোদনৰ পাছত এতিয়া ৰাজ্য চৰকাৰে বিধিখন কাৰ্যকৰী কৰাৰ বাবে প্ৰয়োজনীয় নিয়ম প্ৰস্তুত কৰি অধিসূচনা জাৰি কৰিব লাগিব। অৰ্থাৎ ৰাষ্ট্ৰপতিৰ অনুমোদনে আইনখনৰ সাংবিধানিক প্ৰক্ৰিয়াটো আগবঢ়ালেও, নিয়ম আৰু কাৰ্যকৰীকৰণৰ তাৰিখ ঘোষণা কৰাৰ পাছতহে বিধিখন বাস্তৱত বলৱৎ হ’ব।
ইফালে গুজৰাটৰ উমৈহতীয়া দেৱানী বিধি বিধেয়ক, ২০২৬তো ৰাষ্ট্ৰপতি দ্ৰৌপদী মূৰ্মুৱে অনুমোদন জনাইছে। গুজৰাট বিধানসভাই ২৪ মাৰ্চত বিধেয়কখন গৃহীত কৰিছিল। ৰাষ্ট্ৰপতিয়ে ১৭ ছেপ্টেম্বৰত বিধেয়কখনত অনুমোদন জনোৱাৰ কথা চৰকাৰী গেজেটত উল্লেখ কৰা হৈছে। ১ অক্টোবৰত গুজৰাটৰ অসাধাৰণ চৰকাৰী গেজেটত আইনখন প্ৰকাশ কৰা হয়।
গুজৰাটৰ UCC-ত বিবাহ, বিবাহ-বিচ্ছেদ, উত্তৰাধিকাৰ, দত্তক গ্ৰহণ আৰু লিভ-ইন সম্পৰ্ককে ধৰি বিভিন্ন দেৱানী বিষয় সামৰি লোৱা হৈছে। আইনখনত বিবাহৰ পঞ্জীয়ন, একপত্নী, উত্তৰাধিকাৰৰ ক্ষেত্ৰত পুত্ৰ-কন্যাৰ সম অধিকাৰ আদি বিষয়তো বিধান ৰখা হৈছে। অৱশ্যে অনুসূচিত জনজাতি আৰু সংবিধানৰ Part XXI-ৰ অধীনত প্ৰচলিত ৰীতি-নীতিৰ সুৰক্ষা লাভ কৰা কিছুমান ব্যক্তি বা গোটক ইয়াৰ পৰিসৰৰ পৰা বাদ দিয়া হৈছে।
গুজৰাট চৰকাৰেও নিয়ম প্ৰস্তুত কৰি অধিসূচনা জাৰি কৰাৰ পাছতহে UCC কাৰ্যকৰী কৰিব। ৰাষ্ট্ৰপতিৰ অনুমোদনৰ ফলত গুজৰাট উত্তৰাখণ্ডৰ পাছত UCC গ্ৰহণ কৰা দ্বিতীয়খন ৰাজ্য হিচাপে পৰিগণিত হৈছে। অসমত অনুমোদন লাভ কৰাৰ পাছত দেশত ৰাজ্যিক পৰ্যায়ত উমৈহতীয়া দেৱানী বিধি প্ৰৱৰ্তনৰ প্ৰক্ৰিয়া আৰু অধিক আগবাঢ়িছে।
