ভাৰতৰ ধ্ৰুপদী ভাষাসমূহৰ অধ্যয়ন, গৱেষণা আৰু সংৰক্ষণৰ ক্ষেত্ৰত এক গুৰুত্বপূৰ্ণ পদক্ষেপ হিচাপে শিক্ষা মন্ত্ৰালয়ে পাঁচটা উৎকৰ্ষ কেন্দ্ৰ (Centres of Excellence) স্থাপনৰ অনুমোদন জনাইছে। উচ্চ শিক্ষা বিভাগে ধ্ৰুপদী অসমীয়া, ধ্ৰুপদী বাংলা, ধ্ৰুপদী মাৰাঠী, ধ্ৰুপদী পালি আৰু ধ্ৰুপদী প্ৰাকৃত ভাষাৰ অধ্যয়নৰ বাবে এই কেন্দ্ৰসমূহ স্থাপনৰ অনুমোদন দিছে।
অনুমোদিত উৎকৰ্ষ কেন্দ্ৰসমূহ ক্ৰমে অসমৰ তেজপুৰ বিশ্ববিদ্যালয়, পশ্চিমবংগৰ বিশ্ব-ভাৰতী বিশ্ববিদ্যালয়, পুনেৰ ডেকান কলেজ স্নাতকোত্তৰ আৰু গৱেষণা প্ৰতিষ্ঠান, কেন্দ্ৰীয় বিশ্ববিদ্যালয় ওড়িশা আৰু কেন্দ্ৰীয় বিশ্ববিদ্যালয় গুজৰাটত স্থাপন কৰা হ’ব।
এই কেন্দ্ৰসমূহৰ জৰিয়তে ধ্ৰুপদী ভাষাসমূহৰ ওপৰত উন্নত পৰ্যায়ৰ শৈক্ষিক গৱেষণাক উৎসাহিত কৰাৰ লগতে ভাষিক আৰু সাহিত্যিক ঐতিহ্য সংৰক্ষণ আৰু ডিজিটাইজেচনৰ ক্ষেত্ৰতো গুৰুত্ব আৰোপ কৰা হ’ব। ইয়াৰ উপৰি এই ভাষাসমূহৰ সৈতে জড়িত জ্ঞানৰ ব্যাপক প্ৰচাৰ আৰু জনসাধাৰণৰ মাজত ইয়াৰ অধিক বিস্তাৰৰ বাবেও কেন্দ্ৰসমূহে ভূমিকা পালন কৰিব।
উল্লেখ্য যে, ভাৰতৰ ধ্ৰুপদী ভাষাসমূহৰ অধ্যয়ন, গৱেষণা আৰু সংৰক্ষণৰ বাবে এক শক্তিশালী প্ৰতিষ্ঠানিক পৰিৱেশ গঢ়ি তোলাৰ দিশত এই পাঁচটা উৎকৰ্ষ কেন্দ্ৰৰ প্ৰতিষ্ঠা এক উল্লেখযোগ্য পদক্ষেপ হিচাপে বিবেচিত হৈছে।
