সিন্ধু জলবণ্টন চুক্তি স্থগিত কৰাৰ পিছৰে পৰা পাকিস্তানে ভাৰত চৰকাৰলৈ এতিয়ালৈকে চাৰিখন চিঠি প্ৰেৰণ কৰিছে। প্ৰতিখন চিঠিতে এই সিদ্ধান্ত পুনৰ বিবেচনাৰ অনুৰোধ জনোৱা হৈছে। সূত্ৰৰ খবৰ অনুসৰি, চিঠিসমূহ পাকিস্তানৰ জলসম্পদ মন্ত্ৰণালয়ৰ সচিব চৈয়দ আলি মুৰ্তজাৰ পৰা আহিছে। ভাৰতৰ জলশক্তি মন্ত্ৰণালয়ে এই চাৰিখন চিঠি গ্ৰহণ কৰি বিদেশ মন্ত্ৰণালয়লৈ প্ৰেৰণ কৰিছে।
২২ এপ্ৰিলত পেহেলগামত সংঘটিত সন্ত্ৰাসবাদীৰ আক্ৰমণৰ পিছত ভাৰতে পাকিস্তানক দায়ী কৰি তেওঁলোকৰ বিৰুদ্ধে কেইবাটাও পদক্ষেপ গ্ৰহণ কৰিছিল। সেই সময়ত সিন্ধু চুক্তি স্থগিত কৰা হৈছিল। বিশ্ব বেংকৰ মধ্যস্থতাত ১৯৬০চনত ভাৰত আৰু পাকিস্তানৰ মাজত সিন্ধু আৰু ইয়াৰ উপনদীসমূহৰ জল বণ্টনৰ বাবে এই চুক্তি স্বাক্ষৰিত হৈছিল। পেহেলগামৰ ঘটনাৰ পিছত ভাৰতে স্পষ্ট কৰি দিছিল যে, যেতিয়ালৈকে পাকিস্তানে সন্ত্ৰাসবাদক সমৰ্থন কৰা বন্ধ নকৰে, তেতিয়ালৈকে এই চুক্তি স্থগিত থাকিব।
পাকিস্তানে প্ৰথমৰ পৰাই ভাৰতৰ সিন্ধু চুক্তি সম্পৰ্কীয় সিদ্ধান্তৰ বিৰোধিতা কৰি আহিছে। পাকিস্তানৰ প্ৰধানমন্ত্ৰী শ্বাহবাজ শ্বৰীফে জনাইছে যে, এই চুক্তিৰ ওপৰত ২৪ কোটি পাকিস্তানীৰ জীৱন নিৰ্ভৰশীল। তেওঁ দাবী কৰিছে যে, ভাৰতৰ এই সিদ্ধান্ত বে-আইনী। তেওঁ ৰাষ্ট্ৰসংঘ আৰু আন্তঃৰাষ্ট্ৰীয় সম্প্ৰদায়ৰ দৃষ্টি আকৰ্ষণ কৰিছে। শ্বৰীফৰ মতে, সিন্ধু চুক্তি স্থগিত কৰি ভাৰতে পানীক অস্ত্ৰ হিচাপে ব্যৱহাৰ কৰিব বিচাৰিছে। কিন্তু ভাৰত নিজৰ অৱস্থানত অটল। প্ৰধানমন্ত্ৰী নৰেন্দ্ৰ মোদীয়ে কৈছে যে, পানী আৰু তেজ একেলগে ব’ব নোৱাৰে। সন্ত্ৰাসবাদীক সমৰ্থন বন্ধ হ’লেহে নতুন দিল্লীয়ে সিন্ধু চুক্তি পুনৰ বিবেচনা কৰিব।
পেহেলগামৰ আক্ৰমণৰ পিছত ভাৰতে পাকিস্তানত সামৰিক অভিযান চলাই সন্ত্ৰাসবাদীৰ কেইবাটাও ঘাটি ধ্বংস কৰিছিল। এই প্ৰত্যাঘাতৰ অভিযানৰ নাম দিয়া হৈছিল ‘অপাৰেশ্যন সিন্দূৰ’। ইয়াৰ পিছত পাকিস্তানেও আক্ৰমণ চলায় আৰু দুয়োখন দেশৰ মাজত চাৰিদিন ধৰি সংঘাত চলিছিল। বিগত ১০ মে’ত ভাৰত আৰু পাকিস্তানে সংঘৰ্ষবিৰতিত সন্মত হৈছিল। কিন্তু সংঘৰ্ষবিৰতি হ’লেও সিন্ধু চুক্তিৰ বিষয়ে ভাৰতৰ অৱস্থান অপৰিৱৰ্তিত আছে বুলি নতুন দিল্লীয়ে স্পষ্ট কৰিছে। সূত্ৰৰ খবৰ, ‘সিন্দূৰ’ অভিযানৰ পিছতো পাকিস্তানৰ পৰা সিন্ধু চুক্তি পুনৰ বিবেচনাৰ অনুৰোধ জনাই এখন চিঠি আহিছিল।
সিন্ধু আৰু ইয়াৰ দুখন উপনদী বিতস্তা আৰু চন্দ্ৰভাগা পাকিস্তানমুখী। এই তিনিখন নদীৰ পানীৰ ওপৰত পাকিস্তানৰ ৮০ শতাংশ কৃষিকাৰ্য নিৰ্ভৰশীল। সিন্ধুৰ বাকী তিনিখন উপনদী বিপাশা, শতদ্ৰু আৰু ইৰাৱতী ভাৰতৰ ওপৰেৰে বৈছে। পাকিস্তানৰ আশংকা যে, সিন্ধু চুক্তিৰ চৰ্ত পালন নকৰিলে পাকিস্তানমুখী নদীসমূহৰ জলপ্ৰৱাহ অনিয়মিত হৈ পৰিব। ফলত পাকিস্তানত জলসংকটৰ সৃষ্টি হ’ব পাৰে। এনে পৰিস্থিতিৰ সৃষ্টি ৰোধৰ বাবে ইছলামাবাদে প্ৰচেষ্টা অব্যাহত ৰাখিছে।
