ভাৰতৰ সৈতে FTA-ত নিউজিলেণ্ড সংসদৰ সেউজ সংকেত। ভাৰতৰ সৈতে স্বাক্ষৰিত মুক্ত বাণিজ্য চুক্তি (FTA)ত অনুমোদন জনালে নিউজিলেণ্ডৰ সংসদে। বুধবাৰে সংসদত ৯৩-২৯ ভোটত চুক্তিখন গৃহীত হয়।
নিউজিলেণ্ডৰ প্ৰধানমন্ত্ৰী ক্ৰিষ্টোফাৰ লাক্সনে চুক্তিখনক ‘ঐতিহাসিক’ বুলি অভিহিত কৰিছে। তেওঁৰ মতে, এই চুক্তিৰ ফলত নিউজিলেণ্ডত নতুন চাকৰিৰ সুযোগ সৃষ্টি হোৱাৰ লগতে আয় বৃদ্ধিৰ সম্ভাৱনা আছে। লগতে ১৪০ কোটি ভাৰতীয় গ্ৰাহকৰ বজাৰলৈ নিউজিলেণ্ডৰ অধিক সামগ্ৰী ৰপ্তানিৰ পথ মুকলি হ’ব।
সামাজিক মাধ্যমৰ এটা পোষ্ট যোগে লাক্সনে কয় যে ভাৰতৰ সৈতে FTA সম্ভৱ নহয় বুলি পূৰ্বে বহুতে মন্তব্য কৰিছিল। কিন্তু অৱশেষত সংসদৰ চূড়ান্ত ভোটত চুক্তিখন অনুমোদিত হ’ল।
২৭ এপ্ৰিলত ভাৰত আৰু নিউজিলেণ্ডে এই মুক্ত বাণিজ্য চুক্তিত স্বাক্ষৰ কৰিছিল। সংসদীয় অনুমোদনৰ পিছত চুক্তিখন এতিয়া কাৰ্যকৰী হোৱাৰ দিশত আৰু এখোজ আগুৱাইছে।
নিউজিলেণ্ডৰ বাণিজ্য মন্ত্ৰী টড মেকক্লেই কয় যে এই চুক্তিয়ে বিশ্বৰ অন্যতম বৃহৎ আৰু দ্ৰুতগতিত বৃদ্ধি পোৱা ভাৰতীয় বজাৰলৈ নিউজিলেণ্ডৰ ৰপ্তানিকাৰকসকলৰ বাবে দুৱাৰ মুকলি কৰিব।
ভাৰতৰ বাণিজ্য সচিব ৰাজেশ আগ্ৰৱালে জনোৱা মতে, ভাৰতে চুক্তিখন “যিমান সোনকালে সম্ভৱ” কাৰ্যকৰী কৰাৰ লক্ষ্য লৈছে। অক্টোবৰৰ ভিতৰত চুক্তিখন কাৰ্যকৰী হোৱাৰ সম্ভাৱনাও প্ৰকাশ কৰা হৈছে।
চুক্তিখনৰ অধীনত নিউজিলেণ্ডে ভাৰতৰ পৰা আমদানি কৰা সকলো সামগ্ৰীৰ বাবে শুল্কমুক্ত বজাৰ প্ৰৱেশৰ সুবিধা দিব। ইয়াৰ ফলত বস্ত্ৰ আৰু পোছাক, চামৰা আৰু জোতা, ৰত্ন-গহনা, ইঞ্জিনিয়াৰিং সামগ্ৰী আৰু প্ৰক্ৰিয়াজাত খাদ্য উদ্যোগে বিশেষ সুবিধা লাভ কৰাৰ সম্ভাৱনা আছে।
ইয়াৰ উপৰি নিউজিলেণ্ডে অহা ১৫ বছৰত ভাৰতত ২০ বিলিয়ন মাৰ্কিন ডলাৰ বিনিয়োগৰ প্ৰতিশ্ৰুতি দিছে।
নিউজিলেণ্ডৰ পৰা ভাৰতলৈ অহা সামগ্ৰীৰ ক্ষেত্ৰত ভাৰতে ৭০.০৩ শতাংশ টেৰিফ লাইনৰ বজাৰ মুকলি কৰিছে। এই অংশই দুয়োখন দেশৰ মুঠ দ্বিপাক্ষিক বাণিজ্যৰ প্ৰায় ৯৫ শতাংশ সামৰি লয়।
অৱশ্যে দুগ্ধজাত সামগ্ৰী, কেইবাটাও কৃষিজাত সামগ্ৰী, চেনি আৰু কিছুমান ধাতুকে ধৰি স্পৰ্শকাতৰ সামগ্ৰীৰ ২৯.৯৭ শতাংশ টেৰিফ লাইন চুক্তিৰ পৰা বাদ দিয়া হৈছে।
কাঠ, ঊল, ভেড়াৰ মাংস আৰু কেঁচা ছালৰ দৰে সামগ্ৰীৰ ওপৰত প্ৰায় ৩০ শতাংশ টেৰিফ লাইনৰ শুল্ক তাৎক্ষণিকভাৱে উঠাই দিয়া হ’ব। আনহাতে, আন ৩৫.৬০ শতাংশ শুল্ক ৩, ৫, ৭ অথবা ১০ বছৰৰ ভিতৰত পৰ্যায়ক্রমে হ্ৰাস কৰা হ’ব।
কৃষি ক্ষেত্ৰতো সহযোগিতা বৃদ্ধিৰ সিদ্ধান্ত লৈছে দুয়োখন দেশে। কিউই ফল, আপেল আৰু মৌ উৎপাদনৰ ক্ষেত্ৰত গৱেষণা, প্ৰযুক্তিগত সহায়, বাগিচা ব্যৱস্থাপনা, খাদ্য সুৰক্ষা আৰু যোগান শৃংখল উন্নয়নৰ ওপৰত গুৰুত্ব দিয়া হ’ব।
