সম্প্ৰতি এটা সাক্ষাৎকাৰত আমিৰ খানে নিজকে গৰ্বিত মুছলিম বুলি অভিহিত কৰিছে। পেহেলগামৰ ঘটনাৰ পিছত ধৰ্ম আৰু সন্ত্ৰাসৰ সংযোগৰ প্ৰসংগত তেওঁ কৈছে, “কোনো ধৰ্মই নিৰীহ মানুহক হত্যা কৰিবলৈ শিক্ষা নিদিয়ে। এই সন্ত্ৰাসবাদীসকলক মই মুছলিম বুলি নাভাবো। ইছলামত স্পষ্টভাৱে লিখা আছে যে, কোনো নিৰীহ ব্যক্তিক হত্যা কৰিব নোৱাৰি। মহিলা আৰু শিশুৰ ওপৰত হাত তুলিব নোৱাৰি। এই সকলো শিক্ষা আমাৰ ইছলামত আছে।” বহু আগতেও আমিৰে কৈছিল যে, পাকিস্তানী মানেই বেয়া নহয়। তেওঁ লগতে উল্লেখ কৰিছিল যে, ভাৰতীয়সকলৰ মাজত মুছলিমসকলৰ প্ৰতি অবিশ্বাসৰ ভাৱ আছে, বহুতেই ভাৱে মুছলিম মানেই বেয়া। কিন্তু তেওঁৰ ছবিৰ জৰিয়তে আমিৰে সম্প্ৰীতিৰ বাৰ্তা দিবলৈ চেষ্টা কৰিছে।
১৯৯৯ চনত আমিৰে ‘ছৰফৰোশ’ ছবিত এজন এছিপিৰ চৰিত্ৰত অভিনয় কৰিছিল। এই ছবিৰ ‘অজয় সিং ৰাঠৌৰ’ চৰিত্ৰটোৱে কেৱল সাধাৰণ দৰ্শকৰ মাজতেই নহয়, আইপিএছ প্ৰশিক্ষণাৰ্থীৰ মাজতো জনপ্ৰিয়তা লাভ কৰিছিল। তাৰ পিছৰে পৰা প্ৰতি বছৰে তেওঁ আইপিএছ বিষয়াসকলৰ সৈতে সাক্ষাৎ কৰে আৰু সীমান্তৰ সমস্যাৰ লগতে দেশৰ বিভিন্ন সমস্যাৰ ওপৰত আলোচনা কৰে। ‘ছৰফৰোশ’ ছবিৰ চিত্ৰনাট্যত ভাৰত-পাকিস্তানৰ সম্পৰ্ক, পাকিস্তানৰ সন্ত্ৰাসবাদ, গুপ্তচৰৰ দ্বাৰা ভাৰতত প্ৰৱেশ কৰি ক্ষতিসাধনৰ চেষ্টা, আৰু ভাৰতৰ আৰক্ষী বিষয়াসকলে এনে দুৰ্বৃত্তক কেনেকৈ ধৰে, তাক উপস্থাপন কৰা হৈছিল। সেই সময়ত এটা সাক্ষাৎকাৰত আমিৰে কৈছিল, “আমি পাকিস্তানৰ আইএছআইৰ সৈতে যুঁজিছোঁ ঠিকেই, কিন্তু পাকিস্তানৰ সাধাৰণ জনগণ বেয়া নহয়। পৃথিৱীৰ সকলো ঠাইত কিছু ভাল মানুহ থাকে, আৰু কিছু বেয়া মানুহো থাকে। আমাৰ ছবিত এই দেশৰ মুছলিমসকলৰ প্ৰতি ইতিবাচক দৃষ্টিভংগী ৰখা হৈছে। মুছলিম মানেই বেয়া বা ভাৰতৰ প্ৰতি বিশ্বাসঘাতক নহয়—এই বাৰ্তা দিয়া হৈছে।”
