নেপালত চলি থকা অশান্তিৰ মাজত আবদ্ধ হৈ পৰা ভাৰতীয় নাগৰিকক দেশলৈ উভতাই অনাৰ বাবে কেন্দ্ৰীয় চৰকাৰে তৎপৰতা দেখুৱাইছে। নেপালৰ সেনাবাহিনীৰ সৈতে যোগাযোগ স্থাপন কৰা হৈছে। সূত্ৰৰ খবৰ অনুসৰি, কাঠমাণ্ডুৰ ত্ৰিভুৱন বিমানবন্দৰত ৪০০ৰো অধিক ভাৰতীয় আবদ্ধ হৈ আছে। তেওঁলোকক উভতাই অনাৰ বাবে নতুন দিল্লীৰ পৰা বিশেষ বিমান পঠিওৱাৰ ব্যৱস্থা কৰা হৈছে। মঙলবাৰৰ পৰা কাঠমাণ্ডুৰ ত্ৰিভুৱন বিমানবন্দৰ বন্ধ হৈ আছে আৰু বহু বিমান বাতিল হৈছে। এনে পৰিস্থিতিত ভাৰতীয় নাগৰিকক কেনেকৈ উভতাই আনিব পাৰি, তাৰ বাবে নেপালৰ সেনাবাহিনীৰ সৈতে আলোচনা চলি আছে।
ভাৰতীয় নাগৰিকক উভতাই অনাৰ বাবে ভাৰতীয় বায়ুসেনাই কেইবাখনো বিমান পঠাব পাৰে। কাঠমাণ্ডুত অৱস্থিত ভাৰতীয় দূতাবাসে নেপালৰ সেনাবাহিনীৰ সৈতে যোগাযোগ কৰিছে। ভাৰতীয় সেনাৰ বিমানৰ বাবে কাঠমাণ্ডুত বিশেষ বন্দোবস্তৰ ব্যৱস্থা কৰা হ’ব পাৰে। সকলোকে নিৰাপদে উদ্ধাৰ কৰি আনিব পৰাকৈ আলোচনা চলি আছে।
নেপালৰ অশান্তিৰ পৰিপ্ৰেক্ষিতত ভাৰতৰ বিদেশ মন্ত্ৰণালয়ে ইতিমধ্যে দুখন বিজ্ঞপ্তি জাৰি কৰিছে। প্ৰথম বিজ্ঞপ্তিত কোৱা হৈছিল যে, ভাৰতে প্ৰতিবেশী দেশৰ পৰিস্থিতিৰ ওপৰত চকু ৰাখিছে। তাত বাস কৰা ভাৰতীয় নাগৰিকক স্থানীয় প্ৰশাসনৰ নিৰ্দেশ মানি চলি সতৰ্ক হৈ থাকিবলৈ পৰামৰ্শ দিয়া হৈছিল। পিছত নিশা আন এখন বিজ্ঞপ্তি জাৰি কৰি বিদেশ মন্ত্ৰণালয়ে কেইটামান হেল্পলাইন নম্বৰ প্ৰকাশ কৰিছে। ভাৰতৰ প্ৰধানমন্ত্ৰী নৰেন্দ্ৰ মোদীয়ে নেপালৰ পৰিস্থিতিৰ বাবে উদ্বেগ প্ৰকাশ কৰিছে। সামাজিক মাধ্যমত তেওঁ লিখিছে, “নেপালৰ হিংসা হৃদয়বিদাৰক। ইমান তৰুণে প্ৰাণ হেৰুৱাইছে, মই মৰ্মাহত। নেপালত স্থিতিশীলতা, শান্তি আৰু উন্নয়ন আমাৰ বাবে অতি গুৰুত্বপূৰ্ণ। সেয়ে নেপালৰ সকলো ভাই-ভনীৰ প্ৰতি মোৰ বিনীত অনুৰোধ, সকলোৱে শান্তিৰ পক্ষত সমৰ্থন জনাওক।”
প্ৰবল গণবিক্ষোভত মঙলবাৰে নেপালৰ প্ৰধানমন্ত্ৰী কে পি শৰ্মা অলিয়ে পদত্যাগ কৰিছে। তেওঁৰ বাসভৱনৰ লগতে নেপালৰ আন আন মন্ত্ৰী আৰু প্ৰাক্তন তথা বৰ্তমান নেতৃত্বৰ ঘৰতো উত্তেজিত জনতাই অগ্নিকাণ্ডৰ সৃষ্টি কৰিছে। জ্বলন্ত বাসভৱনত আবদ্ধ হৈ প্ৰাক্তন প্ৰধানমন্ত্ৰী ঝালানাথ খানালৰ পত্নীৰ মৃত্যু হৈছে। পৰিস্থিতি ক্ৰমে নিয়ন্ত্ৰণৰ বাহিৰলৈ গৈছিল। পিছত নেপালৰ সেনাবাহিনীয়ে ক্ষমতা হস্তগত কৰিছে। বৰ্তমান তাত সেনাৰ শাসন চলি আছে। পদত্যাগী প্ৰধানমন্ত্ৰী অলিৰ বৰ্তমানৰ অৱস্থানৰ বিষয়ে এতিয়ালৈকে কোনো তথ্য পোৱা হোৱা নাই।
