নতুন দিল্লীত শুকুৰবাৰে প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাডিমিৰ পুটিনৰ মাজত অনুষ্ঠিত হয় গুৰুত্বপূৰ্ণ বৈঠক। দুয়োখন দেশৰ মাজৰ কৌশলগত সম্পৰ্ক অধিক শক্তিশালী কৰাৰ লগতে বাণিজ্য, প্ৰতিৰক্ষা, শক্তি আৰু গুৰুত্বপূৰ্ণ খনিজ সম্পদৰ ক্ষেত্ৰত সহযোগিতা বৃদ্ধিৰ বিষয়ত আলোচনা হোৱাৰ সম্ভাৱনা আছে।
BRICS সন্মিলনত অংশগ্ৰহণৰ বাবে তিনিদিনীয়া ভ্ৰমণসূচীৰে শুকুৰবাৰে পুৱা নতুন দিল্লীত উপস্থিত হয় ৰাষ্ট্ৰপতি পুটিন। বৈঠকত ২০৩০ চনৰ ভিতৰত ভাৰত-ৰাছিয়াৰ দ্বিপাক্ষিক বাণিজ্য ১০০ বিলিয়ন মাৰ্কিন ডলাৰলৈ বৃদ্ধি কৰাৰ লক্ষ্যক লৈ বিশেষ গুৰুত্ব দিয়া হ’ব বুলি জানিব পৰা গৈছে।
প্ৰতিৰক্ষা সহযোগিতাও বৈঠকৰ অন্যতম গুৰুত্বপূৰ্ণ বিষয়। ব্ৰহ্মছ ক্ষেপণাস্ত্ৰৰ উন্নীতকৰণ, ৰাছিয়াৰ পৰা বাকী থকা S-400 প্ৰতিৰক্ষা ব্যৱস্থাৰ যোগান সম্পূৰ্ণ কৰা আৰু Su-57 যুদ্ধবিমান যোগানৰ সম্ভাৱনাক লৈ দুয়োখন দেশৰ মাজত আলোচনা হোৱাৰ সম্ভাৱনা আছে।
শক্তি আৰু অসামৰিক পাৰমাণৱিক সহযোগিতাৰ বিষয়তো গুৰুত্বপূৰ্ণ আলোচনা হ’ব পাৰে। ভাৰতত নতুন অসামৰিক পাৰমাণৱিক ৰিয়েক্টৰ স্থাপনৰ পৰিকল্পনা, পাৰমাণৱিক ইন্ধন চক্ৰ আৰু দীৰ্ঘম্যাদী ৰক্ষণাবেক্ষণ তথা সহযোগিতাৰ বিষয়সমূহো আলোচনালৈ অহাৰ সম্ভাৱনা আছে।
ইয়াৰ সমান্তৰালভাৱে ইউক্ৰেইন যুদ্ধ আৰু শান্তি স্থাপনৰ প্ৰচেষ্টাও মোদী-পুটিন বৈঠকৰ অন্যতম গুৰুত্বপূৰ্ণ বিষয় হ’ব বুলি ধাৰণা কৰা হৈছে। বিগত সপ্তাহত বিশকেকত অনুষ্ঠিত SCO সন্মিলনৰ সময়তো দুয়ো নেতাৰ মাজত সাক্ষাৎ হৈছিল। সেই সময়ত প্ৰধানমন্ত্ৰী মোদীয়ে যুদ্ধৰ শীঘ্ৰে অন্ত পেলোৱাৰ আহ্বান জনাইছিল আৰু ‘অনন্ত যুদ্ধ’ৰ পৰা ‘যুদ্ধৰ অন্ত’ৰ দিশে আগবঢ়াৰ বাবে ৰাষ্ট্ৰপতি পুটিনক আহ্বান জনাইছিল।
ইউক্ৰেইন সংঘাত সমাধানৰ বাবে শেহতীয়াকৈ আমেৰিকাৰ ট্ৰাম্প প্ৰশাসনকে ধৰি বিভিন্ন পক্ষই নতুনকৈ কূটনৈতিক প্ৰচেষ্টা চলাই থকাৰ সময়তে মোদী-পুটিনৰ বৈঠক বিশেষ তাৎপৰ্যপূৰ্ণ হিচাপে বিবেচিত হৈছে।
বাণিজ্যৰ ক্ষেত্ৰতো দুয়োখন দেশে সহযোগিতা অধিক বিস্তাৰৰ ওপৰত গুৰুত্ব দিব। ৰে’ল আৰু সুৰংগ নিৰ্মাণ, উদ্যোগিক সহযোগিতা, ষ্টীল ভেল্যু চেইন শক্তিশালী কৰা আৰু ৰাছিয়াৰ বজাৰত ভাৰতীয় ৰপ্তানিকাৰকৰ বাবে অধিক সুযোগ সৃষ্টি কৰাৰ বিষয়েও আলোচনা হোৱাৰ সম্ভাৱনা আছে।
ইয়াৰ উপৰি ৰাছিয়ালৈ ভাৰতীয় দক্ষ শ্ৰমিকৰ যাতায়াত বৃদ্ধি আৰু গুৰুত্বপূৰ্ণ খনিজ সম্পদৰ ক্ষেত্ৰত সহযোগিতা বৃদ্ধিৰ বিষয়টোও বৈঠকত গুৰুত্ব লাভ কৰিব পাৰে। সামগ্ৰিকভাৱে মোদী-পুটিন বৈঠকত দুয়ো দেশৰ দীৰ্ঘম্যাদী অৰ্থনৈতিক আৰু কৌশলগত সম্পৰ্কক নতুন দিশ দিয়াৰ ওপৰত গুৰুত্ব আৰোপ কৰা হ’ব।
