মিজোৰাম চৰকাৰে ভিক্ষা নিষিদ্ধ কৰাৰ বাবে আইন প্ৰণয়নৰ উদ্যোগ লৈছে। বিৰোধী শিবিৰৰ আপত্তিৰ পিছতো বুধবাৰে উত্তৰ-পূবৰ এই ৰাজ্যৰ বিধানসভাত ‘মিজোৰাম ভিক্ষা নিষিদ্ধকৰণ বিধেয়ক, ২০২৫’ গৃহীত হৈছে। ৰাজ্যখনৰ সমাজকল্যাণ মন্ত্ৰী লালৰিনপুইৰ দাবী, এই বিধেয়কৰ উদ্দেশ্য কেৱল ভিক্ষা নিষিদ্ধ কৰা নহয়, ভিক্ষুকসকলৰ পুনৰ্বাসন আৰু জীৱনযাত্ৰাৰ মান উন্নত কৰাত সহায় কৰাও এই বিধেয়কৰ লক্ষ্য।
মন্ত্ৰীজনৰ মতে, মিজোৰামৰ সামাজিক পৰিকাঠামো, গীৰ্জা, স্বেচ্ছাসেৱী সংস্থা আৰু বিভিন্ন চৰকাৰী প্ৰকল্পৰ যৌথ প্ৰচেষ্টাৰ ফলত ৰাজ্যত ভিক্ষুকৰ সংখ্যা খুব কম। তথাপি, শেহতীয়াকৈ ভিক্ষাৰ প্ৰৱণতা বৃদ্ধি পোৱাৰ বাবে চৰকাৰ উদ্বিগ্ন। সমাজকল্যাণ বিভাগৰ শেহতীয়া সমীক্ষা অনুসৰি, ৰাজ্যৰ ৰাজধানী আইজলত কমেও ৩০জন ভিক্ষুক আছে, য’ত আইজলৰ বাহিৰৰ লোকো আছে। আগন্তুক ১৩ ছেপ্টেম্বৰত প্ৰধানমন্ত্ৰী নৰেন্দ্ৰ মোদীয়ে মিজোৰামৰ চাইৰাং-চিহমুই ৰে’লপথৰ উদ্বোধন কৰিব। এই ৰে’লপথ আৰম্ভ হ’লে অন্য ৰাজ্যৰ পৰাও ভিক্ষুক মিজোৰামলৈ আহিব পাৰে বুলি লালৰিনপুইয়ে আশংকা কৰিছে।
এই বিধেয়ক আইনত পৰিণত হ’লে ই কেনেকৈ কাৰ্যকৰী হ’ব, তাৰো ব্যাখ্যা দিছে মন্ত্ৰীয়ে। লালৰিনপুইৰ মতে, প্ৰথমে ৰাজ্যিক পৰ্যায়ত এখন ‘সাহায্য পৰিষদ’ গঠন কৰা হ’ব। এই পৰিষদে ভিক্ষুকসকলৰ বাবে অস্থায়ী থকাৰ ব্যৱস্থা কৰিব। এই অস্থায়ী ঠিকনাত ভিক্ষুকসকলক ৰখা হ’ব আৰু ২৪ ঘণ্টাৰ ভিতৰত তেওঁলোকক নিজৰ ঘৰ বা নিজৰ ৰাজ্যলৈ পঠিওৱা হ’ব।
ভাৰতত ভিক্ষা নিষিদ্ধ কৰাৰ বাবে কেন্দ্ৰীয়ভাৱে কোনো আইন নাই। অৱশ্যে, কিছু অঞ্চলত স্থানীয়ভাৱে ভিক্ষা নিষিদ্ধ কৰা হৈছে। উদাহৰণস্বৰূপ, এই বছৰৰ আৰম্ভণিতে মধ্যপ্ৰদেশৰ ভূপাল আৰু ইন্দোৰ জিলাত ভিক্ষা নিষিদ্ধ কৰা হৈছে। কিন্তু এনে কঠোৰ নিয়মৰ বিৰুদ্ধে অতীতত প্ৰশ্নও উত্থাপিত হৈছে। যেনে, ‘বম্বে প্ৰিভেনচন অৱ বেগিং এণ্ট, ১৯৫৯’ কেইবাবাৰো সমালোচিত হৈছে। তাৰোপৰি, এই আইন থকাৰ পিছতো মুম্বাই চহৰত ভিক্ষা সম্পূৰ্ণৰূপে বন্ধ কৰিব পৰা নাই।
