মাজুলীৰ ঐতিহ্যমণ্ডিত মুখাশিল্পই পুনৰ লাভ কৰিছে আন্তঃৰাষ্ট্ৰীয় পৰিচয়। গুৰুজনাৰ অনবদ্য সৃষ্টিৰ প্ৰতি আকৰ্ষিত হৈ এইবাৰ মাজুলীত উপস্থিত হৈছে লণ্ডনৰ এগৰাকী নৃত্যশিল্পী।
নতুন চামগুৰি সত্ৰত পদ্মশ্ৰী ড° হেমচন্দ্ৰ গোস্বামীৰ তত্বাৱধানত পৰম্পৰাগত মুখা নিৰ্মাণৰ প্ৰশিক্ষণ লৈছে লণ্ডনৰ শিল্পী লেইলাই। প্ৰায় ১০ দিনীয়া এই প্ৰশিক্ষণকালত বাঁহ, কুমাৰ মাটি আৰু অন্যান্য প্ৰাকৃতিক সামগ্ৰীৰ ব্যৱহাৰেৰে মাজুলীৰ পৰম্পৰাগত মুখা নিৰ্মাণৰ পদ্ধতি আয়ত্ত কৰাৰ চেষ্টা কৰিছে তেওঁ।
মহাপুৰুষ শ্ৰীমন্ত শংকৰদেৱৰ সৃষ্টিৰ সৈতে গভীৰভাৱে জড়িত মাজুলীৰ মুখাশিল্প কেৱল সত্ৰীয়া সংস্কৃতিৰ এক অংগই নহয়, ই অসমৰ সাংস্কৃতিক পৰিচয়ৰো এক শক্তিশালী প্ৰতীক। সময়ৰ সৈতে এই শিল্পই দেশ-বিদেশৰ শিল্পী আৰু সংস্কৃতিপ্ৰেমীৰ দৃষ্টি আকৰ্ষণ কৰি আহিছে। পদ্মশ্ৰী ড° হেমচন্দ্ৰ গোস্বামীৰ ওচৰত প্ৰশিক্ষণ গ্ৰহণৰ সময়ত লেইলাই পৰম্পৰাগত মুখা নিৰ্মাণৰ কৌশলৰ লগতে নিজৰ শিল্পীসুলভ ভাবধাৰাৰে এটা বিমূৰ্ত ৰূপৰ মুখাও নিৰ্মাণ কৰিছে।
মাজুলীৰ মাটি, সত্ৰীয়া পৰম্পৰা আৰু আধুনিক সৃষ্টিশীলতাক একেটা পৰিসৰত সংযোগ কৰাৰ এই প্ৰয়াসে মুখাশিল্পক এক নতুন দৃষ্টিভংগীৰে উপস্থাপন কৰিছে।
লেইলাৰ এই ভ্ৰমণ কেৱল মুখা নিৰ্মাণৰ প্ৰশিক্ষণতে সীমাবদ্ধ নহয়। নিৰ্মাণ কৰা মুখা পৰিধান কৰি মাজুলীৰ প্ৰাকৃতিক পৰিৱেশত নৃত্য প্ৰদৰ্শন কৰাৰ লগতে এই অভিজ্ঞতাক কেন্দ্ৰ কৰি এখন তথ্যচিত্ৰ নিৰ্মাণৰ পৰিকল্পনাও কৰিছে শিল্পীগৰাকীৰ দলটোৱে।
পদ্মশ্ৰী ড° হেমচন্দ্ৰ গোস্বামীৰ দৰে শিল্পীৰ নিৰলস সাধনাৰ ফলত মাজুলীৰ মুখাশিল্পই ইতিমধ্যে লাভ কৰিছে দেশ-বিদেশত বিশেষ স্বীকৃতি। এতিয়া লণ্ডনৰ এগৰাকী শিল্পীয়ে মাজুলীলৈ আহি এই পৰম্পৰা শিকি নিজস্ব সৃষ্টিশীলতাৰে তাক নতুন ৰূপ দিয়াৰ ঘটনাই সেই সাংস্কৃতিক সংযোগক আৰু অধিক শক্তিশালী কৰিছে।
মাজুলীৰ মুখাশিল্পৰ এই যাত্ৰাই যেন আকৌ এবাৰ সোঁৱৰাই দিয়ে—সংস্কৃতিৰ শিপা যিমানেই গভীৰ নহওক কিয়, শিল্পৰ ভাষাৰ কোনো সীমা নাই।
