ৰাছিয়াৰ ৰাষ্ট্ৰপতি ভ্লাদিমিৰ পুটিনে দুদিনীয়া ভ্ৰমণসূচীৰে ভাৰত ভ্ৰমণ কৰাৰ সময়তে মস্কোৰ পৰিকল্পনাক প্ৰতিহত কৰিবলৈ চীনত উপস্থিত হৈছে ফ্ৰান্সৰ ৰাষ্ট্ৰপতি ইমানুৱেল মেক্ৰন। তিনিদিন চীনত থাকিব মেক্ৰন, য’ত তেওঁ কেইবাটাও অনুষ্ঠানত অংশগ্ৰহণ কৰিব। ফ্ৰান্সক ৰাছিয়াৰ শত্ৰু বুলি গণ্য কৰা হয়। ইউক্ৰেইন সংঘাতত পৰ্দাৰ আঁৰত আমেৰিকাৰ লগতে ফ্ৰান্স আৰু ব্ৰিটেইনে গুৰুত্বপূৰ্ণ ভূমিকা পালন কৰে। ফ্ৰান্স ৰাছিয়াৰ সৈতে একেখন মহাদেশতে অৱস্থিত।
ইউক্ৰেইনৰ সংঘাতৰ সন্দৰ্ভত ৰাছিয়া ক্ৰমান্বয়ে কঠোৰ হৈ পৰাৰ সময়ত ইমানুৱেল মেক্ৰনৰ এই ভ্ৰমণ। দুদিন পূৰ্বে মস্কোৰ ৰাষ্ট্ৰপতিৰ বাসগৃহত আমেৰিকাৰ শান্তি দূতৰ সৈতে হোৱা বৈঠকত পুটিনে ইউৰোপৰ সৈতে যুদ্ধৰ কথা কৈছিল। পুটিনে কয় যে, ৰাছিয়াৰ চৰ্ততহে নিষ্পত্তি হ’ব।
ফাইনেন্সিয়েল টাইমছৰ তথ্য অনুসৰি, ইমানুৱেল মেক্ৰনে প্ৰথম দিনাই চীনৰ ৰাষ্ট্ৰপতি ঝি জিনপিঙৰ সৈতে সাক্ষাৎ কৰে। বৈঠকৰ সময়ত মেক্ৰনে তিনিটা মূল বিষয় উত্থাপন কৰে। ইউক্ৰেইনৰ সংঘাতত চীনক মুখ্য ভূমিকা ল’বলৈ আহ্বান জনাই মেক্ৰনে সংঘাত শীঘ্ৰে বন্ধ কৰিবলৈ আহ্বান জনায়। যুদ্ধ বন্ধ নহ’লে বিশ্বৰ পৰিস্থিতি ভয়াৱহ হৈ পৰিব।
মেক্ৰনে চীনৰ ৰাষ্ট্ৰপতি জিনপিঙক ৰাছিয়াক হেঁচা প্ৰয়োগ কৰিবলৈ আহ্বান জনায়। তেওঁ কয় যে, চীনে যদি পুটিনক হেঁচা দিয়ে তেন্তে ইউক্ৰেইন যুদ্ধত ৰাছিয়াই আত্মসমৰ্পণ কৰিবলৈ বাধ্য হ’ব। এই সংঘাতত ৰাছিয়াৰ সৰ্ববৃহৎ মিত্ৰ দেশ চীন। ই ৰাছিয়াৰ পৰা সৰ্বাধিক খাৰুৱা তেল ক্ৰয় কৰাৰ লগতে অস্ত্ৰ-শস্ত্ৰও যোগান ধৰে।
মেক্ৰনে চীনক পেৰিছত বিনিয়োগ কৰিবলৈ আহ্বান জনায়। ফ্ৰান্সৰ ৰাষ্ট্ৰপতিয়ে কয় যে, দুয়োপক্ষই বাণিজ্যৰ ভাৰসাম্য ৰক্ষাৰ ওপৰত গুৰুত্ব দিয়াটো প্ৰয়োজন। যোৱা বছৰ ফ্ৰান্সৰ সৈতে চীনৰ বাণিজ্য হ্ৰাস পাইছিল। অৱশ্যে এইবাৰ ফ্ৰান্সে উন্নতিৰ বাবে চেষ্টা চলাইছে।
ইয়াৰ বাবে বৃহস্পতিবাৰে জিনপিং আৰু মেক্ৰনে ১২খন চুক্তিত স্বাক্ষৰ কৰে। পেলেষ্টাইনৰ পুনৰ নিৰ্মাণৰ বাবে ১০ কোটি ডলাৰৰ সাহায্য প্ৰদানৰ কথা ঘোষণা কৰে মেক্ৰনে। ছৌদি আৰৱৰ লগতে ফ্ৰান্সেও পেলেষ্টাইনক সুকীয়া দেশ হিচাপে প্ৰতিষ্ঠা কৰিবলৈ প্ৰচাৰ চলাইছে।
