উত্তৰ প্ৰদেশৰ লখিমপুৰৰ খেৰিৰ দুৰ্ঘটনা আছিল পূৰ্বপৰিকল্পিত। পৰিকল্পিতভাৱে হত্যা কৰা হৈছিল প্ৰতিবাদী কৃষকক। ঘটনাৰ তদন্তকাৰী স্পেচিয়েল ইনভেষ্টিগেচন টীমে আদালতত কৰা প্ৰতিবেদনত চাঞ্চল্যকৰ তথ্য। SITৰ প্ৰতিবেদনে কঁপনি তুলিছে বিজেপিৰ আভ্যন্তৰত। আটাইকেইজন অভিযুক্তৰ বিৰুদ্ধে SITয়ে লাভ কৰিছে হত্যাৰ ষড়যন্ত্ৰ কৰাৰ তথ্য। আদালতত SITয়ে ঘটনাৰ মূল অভিযুক্ত কেন্দ্ৰীয় মন্ত্ৰী অজয় মিশ্ৰৰ পুত্ৰ আশিস মিশ্ৰ সহ আটাইকেইজন অভিযুক্তৰ বিৰুদ্ধে ভাৰতীয় দণ্ড বিধিৰ নতুন ধাৰা সন্নিৱিষ্ট কৰাৰ বাবে কৰিছে লিখিত আৱেদন।
আদালতত তদন্তকাৰী বিষয়া ৰাম দিৱাকৰে স্পষ্টভাৱে উল্লেখ কৰিছে খেৰিৰ ঘটনা নাছিল কোনো দুৰ্ঘটনা। প্ৰকৃততে এই ঘটনা আছিল এক পৰিকল্পিত হত্যাকাণ্ড। পৰিকল্পিত ভাৱে মাৰণাস্ত্ৰ সহ তীব্ৰ বেগী গাড়ী চলাই দিয়া হৈছিল প্ৰতিবাদী কৃষকৰ ওপৰত। ঘটনাৰ চাৰ্জশ্বীট দাখিলৰ পূৰ্বে অভিযুক্তৰ বিৰুদ্ধে আদালতত SITৰ এই আবেদনে খলকনি তুলিছে দেশৰ ৰাজনীতিত। তিনি কৃষি আইনৰ পিছত পুনৰ এবাৰ যেন বেকফুটত শাসকীয় বিজেপি দল।
