মণিপুৰৰ সংঘাতজৰ্জৰিত পৰিস্থিতিৰ মাজতে কামজং জিলাত পুনৰ হিংসাত্মক ঘটনা। শুকুৰবাৰে নিশা দুৰ্বৃত্তৰ গুলীত এগৰাকী মহিলা নিহত হোৱাৰ লগতে কেইবাটাও ঘৰ জ্বলাই দিয়াৰ খবৰ পোৱা গৈছে। এই ঘটনাৰ পাছতে পৰিস্থিতি অধিক অৱনতি ঘটাৰ আশংকাত জিলা প্ৰশাসনে নিষেধাজ্ঞা জাৰি কৰিছে। প্ৰশাসনিক সূত্ৰৰ মতে, শুকুৰবাৰে নিশা প্ৰায় ৯.৪০ বজাত কামজং জিলাৰ কুকি-অধ্যুষিত চাছাদ গাঁৱত এই ঘটনা সংঘটিত হয়। উল্লেখযোগ্য যে কামজং জিলাখন নাগা-অধ্যুষিত অঞ্চল হিচাপে পৰিচিত। নিহত মহিলাগৰাকীৰ নাম ডমখোনেই টাউথাং। তেওঁ পাঁচটি সন্তানৰ মাতৃ আছিল। জানিব পৰা মতে, মহিলাগৰাকীৰ ডিঙিৰ ওচৰত গুলী লাগে আৰু তাৰ কিছু সময়ৰ পাছতে তেওঁৰ মৃত্যু হয়।
প্ৰাপ্ত খবৰ অনুসৰি, নিশাৰ ভাগত অঞ্চলটোত হিংসাত্মক পৰিস্থিতি অধিক তীব্ৰ হৈ পৰে। মাজনিশালৈকে গুলীচালনা অব্যাহত থকাৰ লগতে কেইবাটাও ঘৰত অগ্নিসংযোগ কৰা হয় বুলি জানিব পৰা গৈছে। শেহতীয়া খবৰ পোৱা পৰলৈকে গুলীচালনা আৰু অগ্নিসংযোগৰ ঘটনাৰো খবৰ আহি আছিল। অৱশ্যে, এই ঘটনাত মুঠ কিমান ঘৰ ক্ষতিগ্ৰস্ত হৈছে আৰু ক্ষয়-ক্ষতিৰ পৰিমাণ কিমান, সেয়া এতিয়াও স্পষ্ট হোৱা নাই।
পৰিস্থিতি অধিক অৱনতি নহ’বলৈ জিলা প্ৰশাসনে চাছাদ আৰক্ষী গে’ট জংচনৰ ৪০০ মিটাৰ ব্যাসাৰ্ধৰ ভিতৰত ভাৰতীয় নাগৰিক সুৰক্ষা সংহিতা (BNSS)-ৰ ১৬২ নং ধাৰাৰ অধীনত নিষেধাজ্ঞা জাৰি কৰিছে।
এই নিৰ্দেশ অনুসৰি, উক্ত অঞ্চলত পাঁচজন বা তাতকৈ অধিক লোকৰ সমাৱেশ নিষিদ্ধ কৰা হৈছে। পৰৱৰ্তী নিৰ্দেশ নিদিয়া পৰ্যন্ত এই নিষেধাজ্ঞা বলৱৎ থাকিব। অৱশ্যে, নিৰাপত্তাৰক্ষী, কৰ্তব্যৰত দণ্ডাধীশ, অত্যাৱশ্যকীয় সেৱাৰ সৈতে জড়িত কৰ্মচাৰী আৰু বিশেষ অনুমতিপ্ৰাপ্ত লোকসকলক এই নিষেধাজ্ঞাৰ পৰা ৰেহাই দিয়া হৈছে।জিলা দণ্ডাধীশে নিষেধাজ্ঞা বলৱৎ থকা অঞ্চলটোত পৰ্যাপ্ত নিৰাপত্তা ব্যৱস্থা গ্ৰহণ কৰিবলৈ আৰক্ষী অধীক্ষকক নিৰ্দেশ দিছে।
ইফালে, কুকি-জো উইমেনছ ফ’ৰাম, দিল্লী আৰু এনচিআৰে ডমখোনেই টাউথাঙৰ হত্যাকাণ্ডক তীব্ৰ গৰিহণা দিছে। সংগঠনটোৱে ঘটনাটোৰ নিৰপেক্ষ আৰু নিৰ্দিষ্ট সময়সীমাৰ ভিতৰত তদন্ত সম্পন্ন কৰাৰ লগতে দোষীসকলক চিনাক্ত কৰি জবাবদিহিৰ আওতালৈ অনাৰ দাবী জনাইছে। লগতে, স্বামী-সন্তানসহ পৰিয়ালৰ সদস্যসকলৰ ওপৰত পৰা মানসিক আৰু আৰ্থিক প্ৰভাৱৰ প্ৰতি লক্ষ্য ৰাখি শোকসন্তপ্ত পৰিয়ালটোক আৰ্থিক সাহায্য প্ৰদান কৰিবলৈও সংগঠনটোৱে আহ্বান জনাইছে। বিশেষকৈ মাতৃগৰাকীক হেৰুওৱা পাঁচটি শিশুৰ সুৰক্ষা আৰু ভৱিষ্যতক লৈ উদ্বেগ প্ৰকাশ কৰিছে সংগঠনটোৱে।
মণিপুৰত অব্যাহত থকা সংঘাতৰ মাজত মহিলা আৰু সাধাৰণ নাগৰিকৰ নিৰাপত্তাক লৈও সংগঠনটোৱে উদ্বেগ প্ৰকাশ কৰি সংশ্লিষ্ট কৰ্তৃপক্ষক তেওঁলোকৰ সুৰক্ষা সুনিশ্চিত কৰিবলৈ আহ্বান জনাইছে। ৰাজ্যখনৰ পৰিস্থিতি পুনৰ উত্তপ্ত হৈ পৰাৰ মাজতে কামজঙৰ এই ঘটনাই অঞ্চলটোত শান্তি আৰু নিৰাপত্তা পুনৰ প্ৰতিষ্ঠাৰ প্ৰয়োজনীয়তাক স্পষ্ট কৰি তুলিছে।
