গণতন্ত্ৰকামী চৰকাৰৰ পতনৰ পিছতে ভয়ংকৰ পৰিস্থিতিৰ সৃষ্টি হৈছে আফগানিস্তানত। চৰম বিত্তীয় সংকটৰ মুখামুখি হৈছে সাধাৰণ জনগণ। শ শ লোকে হেৰুৱাইছে চাকৰি, হাজাৰ হাজাৰ লোকৰ কাম নোহোৱা হৈছে। কৰ্মবিমুখ আৰু পৰিয়াল পোহপাল দিয়া লোকসকলে এতিয়া চৰম অৰ্থসংকটত পৰিছে। শীতকাল নামি অহাৰ পিছতে পৰিস্থিতি আৰু ভয়ংকৰ হৈ পৰিছে। জীৱন-জীৱিকাৰ বাবে মানুহবোৰ উপায়হীন হৈ পৰিছে। পৰিণতিত কোনোবাই নিজৰ আবাসগৃহকে বেচি দিছে। কোনোবাই ঘৰৰ আচবাব, সা-সামগ্ৰী, গহণা আৰু মূল্যবান সকলো সামগ্ৰী বিক্ৰী কৰিবলগা পৰিস্থিতিৰ সৃষ্টি হৈছে। পৰিস্থিতি ইমান ভয়াৱহ হৈছে যে, মানুহে বেচি বেচি সকলো হেৰুওৱাৰ পিছত বিক্ৰীৰ বাবে আৰু একো বাকী নথকাত শৰীৰৰ অংগকে বেচিবলৈ উদ্যত হৈছে। যিকোনো বিনিময়ত পৰিয়াল পোহপাল দিয়াৰ বাবে আৰু নিজে জীয়াই থকাৰ তাড়নাত বৃক্ক বেচিবলৈ ৰাজী হৈছে একাংশ উপায়হীন লোক। যাৰ বাবে গছৰ ডালে ডালে, পাতে পাতে ওলমিছে বৃক্ক বেচাৰ অথবা কিডনী উপলব্ধ থকাৰ প্লেকাৰ্ড।
আমেৰিকাই নিজৰ সেনা প্ৰত্যাহাৰৰ পিছতে আফগানিস্তানত কেতিয়াও আশা নকৰা এক দুৰ্ভিক্ষসদৃশ পৰিস্থিতিৰ সৃষ্টি হৈছে। সকলো আগশাৰীৰ প্ৰতিষ্ঠানে তালি-টোপোলা বান্ধি আফগানিস্তান এৰাৰ পিছত চাৰিওফালে মাথোঁ যুদ্ধৰ দামামা, অস্ত্ৰৰ ঝনঝননি। এনে প্ৰেক্ষাপটত সাধাৰণ লোকৰ বাবে বন্ধ হৈ পৰিছে সকলো পথ। এই নিৰপৰাধী, সাধাৰণ লোকসকলৰ বাবে জীয়াই থকাটো অত্যন্ত প্ৰত্যাহ্বানপূৰ্ণ হৈ পৰিছে।
