য়েমেনৰ হুথি বিদ্ৰোহীৰ আক্ৰমণ তীব্ৰতৰ হোৱাৰ মাজতে ছৌদি আৰৱৰ পূব প্ৰান্তৰ তেল নগৰী দাম্মামস্থিত কিং ফাহদ আন্তঃৰাষ্ট্ৰীয় বিমানবন্দৰত সংঘটিত আক্ৰমণত এজন ভাৰতীয় নাগৰিকসহ দুজন লোক নিহত হৈছে। বৃহস্পতিবাৰে দেশখনৰ অসামৰিক বিমান পৰিবহণ কৰ্তৃপক্ষই এই তথ্য নিশ্চিত কৰে।
নিহত আনজন ছৌদি আৰৱৰ নাগৰিক বুলি কৰ্তৃপক্ষই জানিবলৈ দিছে। এই আক্ৰমণত ভাৰত, য়েমেন আৰু বাংলাদেশৰ নাগৰিককে ধৰি আন আঠজন লোক আহত হৈছে। আহতসকলৰ ভিতৰত বাংলাদেশী মূলৰ এজন ছৌদি আৰৱৰ বাসিন্দাও আছে।
ৰিয়াধস্থিত ভাৰতীয় দূতাবাসে জনাইছে যে ঘটনাটোৰ সন্দৰ্ভত অধিক তথ্য সংগ্ৰহ কৰাৰ লগতে ক্ষতিগ্ৰস্ত পৰিয়ালসমূহৰ সৈতে যোগাযোগ কৰা হৈছে। দূতাবাসে Xত প্ৰকাশ কৰা এক বিবৃতিত কয়, “নিহতসকলৰ পৰিয়াল আৰু আপোনজনৰ প্ৰতি আমাৰ সমবেদনা জ্ঞাপন কৰিছোঁ। আহতসকলৰ আশু আৰোগ্য কামনা কৰিছোঁ।”
ছৌদি আৰৱৰ অসামৰিক বিমান পৰিবহণ কৰ্তৃপক্ষই জনোৱা অনুসৰি, আক্ৰমণটোৰ ফলত হোৱা ক্ষয়-ক্ষতিৰ মূল্যায়ন চলি আছে। অৱশ্যে, বিমানবন্দৰৰ কাৰ্যকলাপ পুনৰ আৰম্ভ হৈছে আৰু বিমান চলাচল স্বাভাৱিক অৱস্থালৈ ঘূৰি আহিছে।
চলিত মাহত ইৰানৰ সমৰ্থনপুষ্ট হুথি বাহিনীয়ে প্ৰায় প্ৰতিদিনে ছৌদি আৰৱত আক্ৰমণ চলাই আহিছে। ইয়াৰ ভিতৰত ৰিয়াধৰ আন্তঃৰাষ্ট্ৰীয় বিমানবন্দৰত হোৱা আক্ৰমণো অন্যতম, যিটো বিগত কেইবাবছৰৰ ভিতৰত দেশখনৰ আটাইতকৈ প্ৰাণঘাতী আক্ৰমণসমূহৰ ভিতৰত এটা বুলি বিবেচিত হৈছে।
বুধবাৰে ছৌদি আৰৱৰ শক্তি মন্ত্ৰালয়ে জনায় যে এটা তেল শোধনাগাৰক লক্ষ্য কৰি অহা ড্ৰোন সফলতাৰে প্ৰতিহত কৰাৰ পিছত তাৰ পৰা সৰি পৰা ধ্বংসাৱশেষৰ ফলত দুজন লোক নিহত আৰু আন দুজন আহত হয়।
ইফালে, আমেৰিকাৰ বিদেশ বিভাগে বুধবাৰে ছৌদি আৰৱত থকা দূতাবাসৰ অপ্ৰয়োজনীয় কৰ্মচাৰী আৰু তেওঁলোকৰ পৰিয়ালক দেশখন এৰিবলৈ নিৰ্দেশ দিয়ে।
বিদেশ বিভাগৰ মুখপাত্ৰ টমী পিগটে ছ’চিয়েল মিডিয়াত প্ৰকাশ কৰা এক বিবৃতিত কয় যে ইৰানৰ সমৰ্থনপুষ্ট হুথি বাহিনীয়ে ছৌদি আৰৱৰ বিৰুদ্ধে শত্ৰুতামূলক কাৰ্যকলাপ বৃদ্ধি কৰিছে। ইয়াৰ ভিতৰত অসামৰিক বিমানবন্দৰ আৰু অন্যান্য গুৰুত্বপূৰ্ণ আন্তঃগাঁথনিত আক্ৰমণো অন্তৰ্ভুক্ত। এনে আক্ৰমণৰ ফলত সাধাৰণ নাগৰিকৰ মৃত্যু হোৱাৰ লগতে যাতায়াত ব্যৱস্থাত গুৰুতৰ ব্যাঘাত জন্মিছে।
ইয়াৰ পূৰ্বে দেওবাৰে ৰিয়াধস্থিত ভাৰতীয় দূতাবাসে ছৌদি আৰৱত থকা ভাৰতীয় নাগৰিকসকলক জৰুৰীকালীন সতৰ্কবাণী লাভ কৰিলে দেশখনৰ কৰ্তৃপক্ষই জাৰি কৰা সুৰক্ষা নিৰ্দেশনা মানি চলিবলৈ আহ্বান জনাইছিল।
দূতাবাসে ছ’চিয়েল মিডিয়াৰ জৰিয়তে প্ৰকাশ কৰা নিৰ্দেশনা অনুসৰি, জৰুৰীকালীন সতৰ্কবাণী লাভ কৰিলে আতংকিত নহৈ শান্ত হৈ থাকিব লাগে আৰু চৰকাৰী নিৰ্দেশনা অনুসৰণ কৰিব লাগে। লগতে, তৎক্ষণাৎ কোনো অট্টালিকাৰ ভিতৰত থকা নিকটতম নিৰাপদ স্থানলৈ যাব লাগে। পৰিস্থিতি নিৰাপদ নোহোৱালৈকে ঘৰ বা অট্টালিকাৰ ভিতৰতে থাকিবলৈও পৰামৰ্শ দিয়া হৈছে।
শেহতীয়া সপ্তাহকেইটাত ছৌদি আৰৱৰ তেল উদ্যোগ আৰু অসামৰিক আন্তঃগাঁথনিত হুথি বিদ্ৰোহীৰ আক্ৰমণ বৃদ্ধি পাইছে। ইয়াৰ ফলত দেশখনৰ মুখ্য বিমানবন্দৰটো বন্ধ কৰি ৰাখিবলগীয়া পৰিস্থিতিৰো সৃষ্টি হৈছিল।
এএফপিৰ চৰকাৰী তথ্যৰ ভিত্তিত কৰা হিচাপ অনুসৰি, চলিত মাহত ছৌদি আৰৱৰ বিমানবন্দৰসমূহত হোৱা আক্ৰমণত ২২ জন লোকৰ মৃত্যু হৈছে।
য়েমেনৰ গৃহযুদ্ধত দীৰ্ঘদিনীয়া যুদ্ধবিৰতি জুলাই মাহত ভংগ হোৱাৰ পিছতে এই আক্ৰমণসমূহ বৃদ্ধি পাইছে। ইৰানৰ সমৰ্থনপুষ্ট হুথি বিদ্ৰোহীসকলে ছৌদি আৰৱৰ নেতৃত্বাধীন মিত্ৰজোঁটৰ সমৰ্থন লাভ কৰা য়েমেন চৰকাৰৰ বিৰুদ্ধে যুঁজ দি আহিছে।
হুথি বিদ্ৰোহীসকলে ছৌদি আৰৱৰ বিৰুদ্ধে সামুদ্ৰিক অৱৰোধ ঘোষণা কৰাৰ লগতে দেশখনৰ জাহাজ, ভূখণ্ড আৰু তেল উদ্যোগসমূহক লক্ষ্য কৰি আক্ৰমণ আৰম্ভ কৰিছে। ছেপ্টেম্বৰ মাহত তেওঁলোকে এক বৃহৎ সামৰিক অভিযান চলাই লোহিত সাগৰৰ উপকূলৱৰ্তী চৰকাৰৰ নিয়ন্ত্ৰণত থকা কেইবাটাও অঞ্চল দখল কৰে।
ইয়াৰ প্ৰত্যুত্তৰত ছৌদি আৰৱৰ বায়ুসেনাই য়েমেনৰ বৃহৎ অংশ নিয়ন্ত্ৰণ কৰা হুথি বিদ্ৰোহীসকলৰ দখলত থকা অঞ্চলসমূহত বাৰে বাৰে বিমান আক্ৰমণ চলাই আহিছে। এই সংঘাতৰ ফলত অঞ্চলটোত নিৰাপত্তাজনিত পৰিস্থিতি অধিক জটিল হৈ পৰিছে।
