২১ বছৰীয়া বিৰতিৰ অৱসান ঘটনাই পুনৰ ভাৰতলৈ ঘূৰি আহিল ব্ৰহ্মাণ্ড সুন্দৰীৰ মুকুট। ২০০০ চনত লাৰা দত্তই খিতাপ দখলৰ পিছত কোনো ভাৰতীয়ই দখল কৰিব পৰা নাছিল মিছ ইউনিৰ্ভাৰ্ছৰ খিতাপ। ১৩ ডিচেম্বৰৰ পুৱাই আহিল ভাল খবৰ। ১৩০ কোটি ভাৰতীয়ৰ মুখত হাঁহি বিৰিঙাই উজলি উঠিল পঞ্জাৱৰ এইগৰাকী যুৱতী। ইজৰাইলত অনুষ্ঠিত প্ৰতিযোগিতাখন যথেষ্ট প্ৰত্যাহ্বানপূৰ্ণ আছিল। কভিডকালীন পৰিস্থিতিৰ অৱসান ঘটাৰ লগে লগে অনুষ্ঠিত এই প্ৰতিযোগিতাখন বিশ্বব্যাপী লাইভ ষ্ট্ৰীম কৰা হৈছিল। প্ৰতিযোগিতাখনত ভাৰতে শ্ৰেষ্ঠত্ব অৰ্জনৰ পিছতে প্ৰথম আৰু দ্বিতীয় ৰানাৰ্ছ আপৰ সন্মান লাভ কৰে পাৰাগুৱে আৰু দক্ষিণ আফ্ৰিকাই। ২০২০ চনৰ মিছ ইউনিভাৰ্ছ প্ৰতিযোগিতাৰ বিজয়ী এণ্ড্ৰিয়া মেজাই সান্ধুক প্ৰদান কৰে বিজয়ৰ হীৰাখচিত মুকুট।
ফাইনেলত হাৰ্নাজ সান্ধুক সোধা হৈছিল, “আজি তেওঁলোকে সন্মুখীন হোৱা চাপৰ সৈতে কেনেদৰে মোকাবিলা কৰিব লাগে সেই বিষয়ে চোৱা যুৱতীসকলক আপুনি কি পৰামৰ্শ দিব”। মিছ ইউনিভাৰ্ছ প্ৰতিযোগিতাত প্ৰত্যয়েৰে উত্তৰ দিছিল সান্ধুৱে-“আজিৰ যুৱক-যুৱতীসকলে সন্মুখীন হোৱা আটাইতকৈ ডাঙৰ চাপ হৈছে বিশ্বাস কৰা। আপুনি অতুলনীয় বুলি যদিহে নিজকে অনুভৱ কৰে, তেন্তে আপোনাক ধুনীয়া কৰি তোলে। আনৰ সৈতে নিজকে প্ৰতিযোগিতা কৰা বন্ধ কৰক আৰু বিশ্বজুৰি ঘটি থকা অধিক গুৰুত্বপূৰ্ণ বস্তুৰ বিষয়ে কথা পাতো আহক। সাহসেৰে বাহিৰলৈ ওলাই আহি ঠিয় হওক, নিজৰ বাবে কওঁক, কিয়নো আপুনিয়েই আপোনাৰ জীৱনৰ লীডাৰ। আপুনিয়েই আপোনাৰ নিজৰ কণ্ঠস্বৰ। মই মাইচেলফ বা নিজৰ ওপৰত বিশ্বাস কৰো আৰু সেই বাবেই মই আজি ইয়াত থিয় হৈ আছোঁ।” উত্তৰটো শুনাৰ লগে লগে হাত চাপৰিৰ জোৱাৰ উঠিছিল। ইয়াৰ পূৰ্বে ১৯৯৪ চনত সুস্মিতা সেন আৰু ২০০০ চনত লাৰা দত্তই দখল কৰিবলৈ সক্ষম হৈছিল মিছ ইউনিভাৰ্ছৰ সন্মান।
