২২ বছৰ বয়সতে ভাৰতত DNA-ভিত্তিক ডাটা ষ্ট’ৰেজৰ প্ৰযুক্তি বিকাশৰ কাম আৰম্ভ কৰা অনঘা ৰাজেশৰ সিদ্ধান্তই পুনৰ চৰ্চালৈ আনিছে ভাৰতৰ ডীপ-টেক ষ্টাৰ্টআপ পৰিৱেশৰ প্ৰস্তুতিৰ প্ৰশ্ন।
২০২৪ চনত অনঘা ৰাজেশে প্ৰতিষ্ঠা কৰিছিল BioCompute নামৰ ষ্টাৰ্টআপটো। পৰম্পৰাগত ডাটা চেণ্টাৰৰ পৰিৱৰ্তে DNA-ৰ জৰিয়তে ডিজিটেল তথ্য সংৰক্ষণৰ এক অভিনৱ প্ৰযুক্তি বিকাশ কৰাই আছিল প্ৰতিষ্ঠানটোৰ লক্ষ্য। DNA-ৰ অতি ক্ষুদ্ৰ পৰিসৰত বিপুল পৰিমাণৰ তথ্য সংৰক্ষণৰ সম্ভাৱনাক ব্যৱহাৰ কৰি অধিক শক্তি-দক্ষ আৰু কম স্থানৰ প্ৰয়োজন হোৱা ডাটা ষ্ট’ৰেজ ব্যৱস্থা গঢ়ি তোলাৰ দিশত কাম কৰিছিল প্ৰতিষ্ঠানটোৱে।
ৰাজেশৰ মতে, বেংগালুৰুত দুবছৰ ধৰি এটা দল গঠন কৰি নিজা পৰীক্ষাগাৰ স্থাপন, হাজাৰ হাজাৰ পৰীক্ষা-নিৰীক্ষা আৰু DNA-ভিত্তিক তথ্য সংৰক্ষণৰ এক সম্পূৰ্ণ প্ৰ’ট’টাইপ প্ৰস্তুত কৰিবলৈ সক্ষম হৈছিল BioComputeএ। এই যাত্ৰাত প্ৰতিষ্ঠানটোৱে বিনিয়োগকাৰীৰ পৰা ৫ কোটি টকাৰো অধিক পুঁজি লাভ কৰাৰ লগতে জলবায়ু-প্ৰযুক্তি ষ্টাৰ্টআপৰ বাবে ৩১.৪ লাখ টকাৰ অনুদানো লাভ কৰিছিল বুলি প্ৰকাশ পাইছে।
কিন্তু ২০২৬ চনত প্ৰতিষ্ঠানটোৰ পৰৱৰ্তী পদক্ষেপে বিশেষ চৰ্চা লাভ কৰে। পৰীক্ষাগাৰত প্ৰস্তুত কৰা প্ৰ’ট’টাইপৰ পৰা চিপ নিৰ্মাণ আৰু গ্ৰাহক বিচৰাৰ পৰৱৰ্তী পৰ্যায়লৈ আগবাঢ়িবলৈ BioCompute-এ আমেৰিকাৰ ছান ফ্ৰান্সিস্কোলৈ স্থানান্তৰিত হোৱাৰ সিদ্ধান্ত লয়। ইয়াৰ ফলত বেংগালুৰুৰ কাৰ্যকলাপ বন্ধ কৰাৰ লগতে প্ৰ’ট’টাইপ নিৰ্মাণত সহায় কৰা দলটোৰ সৈতেও বিচ্ছেদ ঘটাৰ কথা প্ৰকাশ পাইছে।
ৰাজেশৰ মতে, ভাৰতত ধন, বিজ্ঞান-প্ৰযুক্তিৰ প্ৰতিভা আৰু সম্পদৰ অভাৱ নাই। কিন্তু তাৎক্ষণিক লাভৰ সম্ভাৱনা নথকা উচ্চ-প্ৰযুক্তিৰ উদ্ভাৱনত দীৰ্ঘম্যাদী বিনিয়োগ, ধৈৰ্য আৰু অধিক বিপদাশংকা গ্ৰহণৰ মানসিকতাৰ অভাৱ অনুভৱ কৰে তেওঁ। ছান ফ্ৰান্সিস্কোত তেওঁৰ উদ্ভাৱনৰ লক্ষ্য বুজি পোৱা আৰু তাৎক্ষণিক উপাৰ্জনতকৈ প্ৰযুক্তিটো বাস্তৱায়িত কৰিবলৈ প্ৰয়োজনীয় সহায়ৰ ওপৰত গুৰুত্ব দিয়া পৰিৱেশ লাভ কৰা বুলিও তেওঁ উল্লেখ কৰে।
Vyom Bhatia-ৰ X একাউণ্টত শ্বেয়াৰ কৰা এটা ভিডিঅ’ত ৰাজেশে কয়, “ভাৰতত বহুত ধন আছে, কিন্তু ধৈৰ্য কম, আৰু নিজৰ ওপৰত বিশ্বাসো কম।”
উল্লেখযোগ্য যে DNA-ভিত্তিক তথ্য সংৰক্ষণ প্ৰযুক্তিয়ে বিপুল সম্ভাৱনা কঢ়িয়াই আনিলেও ইয়াৰ ব্যৱসায়িক প্ৰয়োগ এতিয়াও প্ৰত্যাহ্বানমুক্ত নহয়। তথ্য লিখা আৰু পুনৰুদ্ধাৰৰ গতি, ব্যয়, নিৰ্ভৰযোগ্যতা আৰু বৃহৎ পৰিসৰত উৎপাদনৰ দৰে বিষয়ত এতিয়াও বহু কাম বাকী। সেয়ে এই প্ৰযুক্তিয়ে পৰম্পৰাগত ডাটা ষ্ট’ৰেজৰ স্থান ল’ব পাৰিব নে নাই, সেয়া এতিয়াও নিশ্চিত নহয়।
ভাৰতত ধাৰণাৰ জন্ম, পৰীক্ষা-নিৰীক্ষা আৰু প্ৰ’ট’টাইপ নিৰ্মাণ—কিন্তু পৰৱৰ্তী পৰ্যায়ৰ বাবে বিদেশলৈ যাত্ৰা। অনঘা ৰাজেশৰ এই সিদ্ধান্তই ভাৰতৰ ষ্টাৰ্টআপ পৰিৱেশৰ সন্মুখত এক গুৰুত্বপূৰ্ণ প্ৰশ্ন থিয় কৰাইছে—ভাৰত কেৱল উদ্ভাৱক আৰু উদ্যোগী গঢ়ি তোলাৰ কেন্দ্ৰ হৈ থাকিব নেকি, নে বিশ্বৰ আগশাৰীৰ প্ৰযুক্তি নিৰ্মাণৰ বাবে প্ৰয়োজনীয় ধৈৰ্য, বিনিয়োগ আৰু পৰিৱেশো গঢ়ি তুলিব পাৰিব?
