গুজৰাটৰ নৱসাৰী জিলাত আন্তৰ্জাতিক মহিলা দিৱস উপলক্ষে প্ৰধানমন্ত্ৰী নৰেন্দ্ৰ মোদীয়ে এখন বিশাল অনুষ্ঠানত ভাষণ দিব। এই অনুষ্ঠানৰ সুৰক্ষাৰ দায়িত্ব প্ৰথমবাৰৰ বাবে কেৱল মহিলা আৰক্ষীৰ ওপৰত ন্যস্ত কৰা হৈছে। ৰাজ্যৰ গৃহ মন্ত্ৰী হৰ্ষ সংঘৱীয়ে কয় যে, এইটো ভাৰতৰ ইতিহাসত প্ৰথম এনে উদ্যোগ।
তেওঁ কয়, “আন্তৰ্জাতিক মহিলা দিৱসৰ এই বিশেষ উপলক্ষত গুজৰাট আৰক্ষীয়ে এক অনন্য পদক্ষেপ গ্ৰহণ কৰিছে। প্ৰধানমন্ত্ৰীৰ অনুষ্ঠানৰ সম্পূৰ্ণ সুৰক্ষাৰ দায়িত্ব—হেলিপেডত তেওঁৰ আগমনৰ পৰা আৰম্ভ কৰি অনুষ্ঠানস্থলীলৈকে—কেৱল মহিলা আৰক্ষীয়ে পৰিচালনা কৰিব।” এই সুৰক্ষা বাহিনীত আই পি এছ বিষয়াৰ পৰা আৰম্ভ কৰি কনিষ্টবল পৰ্যন্ত মহিলা আৰক্ষী অন্তৰ্ভুক্ত থাকিব।
প্ৰধানমন্ত্ৰী মোদী শুকুৰবাৰে আৰু শনিবাৰে গুজৰাট আৰু দাদৰা আৰু নগৰ হাভেলী কেন্দ্ৰীয় শাসিত প্ৰদেশৰ দুদিনীয়া ভ্ৰমণ থাকিব। এই চফৰৰ সময়ত তেওঁ ৮ মাৰ্চত নৱসাৰীৰ বান্সী বোৰ্চী গাঁৱত ‘লাখপতি দিদি সম্মিলন’ত ভাষণ দিব। এই কাৰ্যসূচীৰ জৰিয়তে মহিলাৰ আৰ্থিক স্বাধীনতা আৰু স্বাৱলম্বনৰ প্ৰচাৰৰ ওপৰত গুৰুত্ব দিয়া হ’ব।
মন্ত্ৰী সংঘৱীয়ে কয় যে, এই উদ্যোগে মহিলা দিৱসত বিশ্বৰ আগত এক শক্তিশালী বাৰ্তা প্ৰেৰণ কৰিব আৰু গুজৰাটক এক নিৰাপদ ৰাজ্য হিচাপে গঢ়ি তোলাত মহিলাৰ গুৰুত্বপূৰ্ণ ভূমিকাক প্ৰতিফলিত কৰিব।
