মাজ নিশাৰ এক শিহৰণকাৰী দৃশ্য
শতাধিক হাতীক খেদি নিছে এদললোকে
তাৰ মাজতে এদাল প্ৰকাণ্ড বাঁহ লৈ বনৰীয়া হাতীক প্ৰচণ্ড কোব শোধাইছে এজনে। জোং দালেৰে খুচি, কোবাই বনৰীয়া হাতীজাকক চলাইছে নিৰ্মম অত্যাচাৰ। শেহতিয়াকৈ বন্যহস্তীক অত্যাচাৰৰ এই দৃশ্য গোলাঘাটৰ বহু লোকৰ মোবাইলে মোবাইলে উপলব্ধ হৈ পৰিছিল। আৰু অৱশেষত সক্ৰিয় হ’ল ৰাজ্যৰ বন বিভাগ। হাতত যাঠি-জোং লৈ বন্যহস্তীক অত্যাচাৰ চলোৱা যুৱকক গ্ৰেপ্তাৰ। ঘটনাটো আছিল গোলাঘটৰ অভয়জানৰ। নামবৰ হাবিৰ পৰা খাদ্যৰ সন্ধানত ওলাই অহা বনৰীয়া হাতীক এইজন যুৱকে চলাইছিল অত্যাচাৰ। ভাইৰেল হৈ পৰা সেই ভিডিঅ’ৰ ভিত্তিত মুৰফুলনী খণ্ড বন বিষয়াই গ্ৰেপ্তাৰ কৰে কমল গুৱালা নামৰ যুৱকজনক।
বন আইন উলংঘা কৰাৰ অপৰাধত সম্প্ৰতি ৰঙা ঘৰৰ আলহী কমল গুৱালা। যি সময়ত ৰাজ্যত হাতী মানুহৰ সংঘাতে জটিলৰূপ ধাৰণ কৰিছে তেনে সময়ত মুৰফুলনী বন বিভাগৰ এই পদক্ষেপ যেন ৰাজ্যবাসীলৈ এক কঠোৰ সতৰ্কবাণী।
