সংবাদজগতত এটি পৰিচিত নাম হেমন্ত শৰ্মাই নিৰ্মাণ কৰা চুটি ছবি ‘টু-লেট’লৈ সুখবৰ৷ চলিত বৰ্ষৰ ‘গোৱা আন্তঃৰাষ্ট্ৰীয় চলচ্চিত্ৰ প্ৰতিযোগিতা’লৈ নিবাৰ্চিত হৈছে সাম্প্ৰতিক সময়ৰ এক ছিৰিয়াছ বিষয় লৈ নিৰ্মাণ কৰা ‘টু লেট্’ নামৰ ছুটি ছবিখনি৷ সমগ্ৰ বিশ্বৰ সৰ্বমুঠ ৩২০ খন চুটি ছবিৰ ভিতৰত ‘টু লেট্’ ছবিখনি প্ৰতিযোগিতাৰ বাবে নিৰ্বাচিত হৈছে৷
উল্লেখ্য যে কেবাবছৰ পূৰ্বে নিৰ্মাণ কৰা ছবিখনি কাৰিকৰী বিজুতিৰ বাবে হেৰাই যোৱাৰ উপক্ৰম হৈছিল যদিও শেহতীয়াকৈ ছবিখনি ঘূৰাই পায় আৰু বিভিন্ন চলচ্চিত্ৰ প্ৰতিযোগিতালৈ প্ৰেৰণ কৰে৷ সাংবাদিকতা তথা চলচ্চিত্ৰ সমালোচনাৰ বাবে ইতিপূৰ্বে কেবাটাও বঁটা তথা সন্মানেৰে সন্মানিত সাংবাদিকগৰাকীয়ে নিৰ্মাণ কৰা ‘টু লেট্’ৰ মূল বিষয়বস্তু ধৰ্মনিৰপেক্ষতা৷ ছবিখনিৰ বিষয়বস্তু সন্দৰ্ভত হেমন্ত শৰ্মাই জনায় এনেদৰে – ‘এটা সৰু তথা অতি সাধাৰণ ঘটনাৰ আলমত ছবিখনিৰ কাহিনীভাগ ৰচনা কৰা হৈছে৷ আমি সকলোৱে এখন ধৰ্মনিৰপেক্ষ দেশত বসবাস কৰি আছো৷ কিন্তু এই ধৰ্মনিৰপেক্ষতা বোলা শব্দটো কিমান দূৰলৈ শিপাইছে? কিমানে মন-মগজুত ধৰি ৰাখিছে?
কিমানে এই শব্দটো বুজি পায়? কিমানে ধৰ্মনিৰপেক্ষতাৰ ভাবাৰ্থ বুজি পায়? কিমানে ধৰ্মনিৰপেক্ষতাৰ মোল বুজি জীৱন নিৰ্বাহ কৰিছে? দৰাচলতে অদ্যপি এই ‘ধৰ্মনিৰপেক্ষতা’ বোলা শব্দটো এটা শব্দহে হৈ আছে৷ তই হিন্দু, মই মুছলমান, তই খ্ৰীষ্টান এইবোৰ কৰি কৰিয়েইচোন দেশখন জ্বলিয়েই আছে৷ মহামানৱ মহাত্মা গান্ধীয়ে দেখা সপোনৰ দেশখনত, শংকৰ-আজানে একতাৰ দোলেৰে বন্ধা ৰাজ্যখনত প্ৰকৃতপক্ষত কি ঘটি আছে সেয়া সকলোৰে জ্ঞাত৷ এজন মুছলমান যুৱ সাংবাদিকে এই ঘটনাৰাজিৰ বলি হৈ কি পৰিস্থিতিৰ মুখামুখি হ’বলগীয়া হ’ল তাকেই অতি কম সময়ৰ ভিতৰত ছবিখনিৰ জৰিয়তে দেখুৱাবলৈ বিচৰা হৈছে৷’ আনহাতে, ছবিখনিৰ কাহিনী-চিত্ৰনাট্য-সাংলাপ তথা পৰিচালনা কৰিছে হেমন্ত শৰ্মাই৷ ফ’কাছ মিডিয়াৰ বেনাৰত ‘টু লেট্’ ছবিখনি প্ৰযোজনা কৰিছে উদ্যমী যুৱক তথা অসমীয়া গহণা-গাঁঠৰিৰ প্ৰতিষ্ঠান ‘ডুগডুগী’ৰ স্বত্বাধিকাৰী উৎপল বণিয়াই৷ চিনেমাটোগ্ৰাফী দ্বীপকমল গগৈৰ৷ সংগীত পৰিচালক সুদীপ্ত নয়ন৷ সম্পাদনা কৰিছে মানস প্ৰতীমে৷ ‘টু লেট্’ত অভিনয় কৰিছে– কুলেন্দ্ৰ ৰায় চৌধুৰী, নৱ মহন্ত, প্ৰতিমা শৰ্মা আৰু মীনাক্ষী দেৱীয়ে৷
