গুৱাহাটী চিকিৎসা মহাবিদ্যালয় (GMCH)ৰ বাবে আহিল এটা অত্যন্ত গুৰুত্বপূৰ্ণ আৰু শুভ সংবাদ। Constitute Board of Quality Council of Indiaৰ তৰফৰ পৰা GMCH-এ লাভ কৰিছে ৰাষ্ট্ৰীয় স্বীকৃতি।
২০২৬ চনৰ ২৯ মে’ তাৰিখৰ পৰা চাৰি বছৰৰ বাবে চিকিৎসালয় আৰু স্বাস্থ্যসেৱা প্ৰদানকাৰী প্ৰতিষ্ঠান হিচাপে ৰাষ্ট্ৰীয় স্বীকৃতি ব’ৰ্ডে এই প্ৰমাণ পত্ৰ প্ৰদান কৰিছে।
১৫ আৰু ১৬ ফেব্ৰুৱাৰী ২০২৬ তাৰিখে আৰম্ভ হোৱা মূল্যায়ন প্ৰক্ৰিয়াৰ পাছত এই স্বীকৃতি লাভ কৰিছে GMCH-এ।
এই স্বীকৃতিৰ ফলত এতিয়া GMCHৰ প্ৰতিটো বিভাগ, বিশেষকৈ ৰেডিঅ’লজী বিভাগে সময়মতে সেৱা আগবঢ়াবলৈ সক্ষম হ’ব। ৰোগীসকলে পূৰ্বতকৈ বহু কম সময়ৰ ভিতৰতে ৰিপ’ৰ্ট লাভ কৰিব পাৰিব। ইয়াৰ ফলত ৰোগীসকলৰ বাবে বিশেষ সুবিধা হ’ব।
বুধবাৰে গুৱাহাটী চিকিৎসা মহাবিদ্যালয়ত অনুষ্ঠিত সংবাদ মেলত এই কথা জানিবলৈ দিয়ে GMCHৰ অধ্যক্ষ ড° অচ্যুত বৈশ্যই। উপস্থিত আছিল অধীক্ষক ড° দেৱজিৎ চৌধুৰী আৰু ৰেডিঅ’লজী বিভাগৰ মুৰব্বী অধ্যাপক ড° দিপু ভূঞা।
এই স্বীকৃতিয়ে GMCHৰ সেৱা আৰু গুণগত মান উন্নত কৰাৰ ক্ষেত্ৰত এক গুৰুত্বপূৰ্ণ পদক্ষেপ বুলি বিবেচিত হৈছে।
গুৱাহাটী চিকিৎসা মহাবিদ্যালয়ৰ এই সাফল্য অসমৰ স্বাস্থ্য খণ্ডৰ বাবে এক গৌৰৱৰ মুহূৰ্ত।
