অষ্ট্ৰেলিয়াৰ তাৰকা অলৰাউণ্ডাৰ গ্লেন মেক্সৱেলে আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰিছে। ৩৮ বছৰীয়া ক্ৰিকেটাৰগৰাকীয়ে যোৱা বছৰৰ জুন মাহতে এদিনীয়া আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল। এইবাৰ টি-২০ আন্তঃৰাষ্ট্ৰীয় ক্ৰিকেটৰ লগতে লিষ্ট এ আৰু প্ৰথম শ্ৰেণীৰ ক্ৰিকেটৰ পৰাও বিদায় লোৱাৰ সিদ্ধান্ত গ্ৰহণ কৰিছে তেওঁ।
অৱশ্যে ক্ৰিকেটৰ পৰা সম্পূৰ্ণৰূপে আঁতৰি নাযায় মেক্সৱেল। তেওঁ মেলবৰ্ণ ষ্টাৰ্ছৰ হৈ বিগ বেছ লীগত খেলি থাকিব। ২০২৭-২৮ ছিজনৰ শেষলৈকে দলটোৰ সৈতে চুক্তিবদ্ধ হৈ আছে অষ্ট্ৰেলিয়াৰ এই তাৰকা ক্ৰিকেটাৰগৰাকী।
টি-২০ আন্তঃৰাষ্ট্ৰীয় ক্ৰিকেটত মেক্সৱেলৰ নামত আছে ২,৮৯৭ ৰান। ১৩০খন মেচত ১৫৪তকৈ অধিক ষ্ট্ৰাইক ৰেটেৰে সংগ্ৰহ কৰা এই ৰানৰ সংখ্যাৰে তেওঁ অষ্ট্ৰেলিয়াৰ হৈ এই ফৰ্মেটত সৰ্বাধিক ৰান সংগ্ৰহ কৰা বেটছমেনৰ তালিকাত তৃতীয় স্থানত আছে। ইয়াৰ উপৰি টি-২০ আন্তঃৰাষ্ট্ৰীয় ক্ৰিকেটত তেওঁৰ নামত আছে পাঁচটা শতক। এই অভিলেখৰ ক্ষেত্ৰত ভাৰতৰ ৰোহিত শৰ্মাৰ সৈতে যুটীয়াভাৱে বিশ্ব অভিলেখৰ অধিকাৰী মেক্সৱেল।
নিজৰ অৱসৰৰ সিদ্ধান্ত সন্দৰ্ভত ‘দ্য ফাইনেল ৱৰ্ড’ পডকাষ্টত মেক্সৱেলে কয় যে এই বিষয়ে বহুদিন ধৰি আলোচনা চলি আছিল। টি-২০ বিশ্বকাপৰ আগত আৰু পিছতো এই বিষয়ত কেইবাবাৰো আলোচনা হৈছিল। অষ্ট্ৰেলিয়া দলৰ পৰিচালনা সমিতিৰ ফালৰ পৰা তেওঁৰ ওপৰত কোনো ধৰণৰ হেঁচা নাছিল বুলিও স্পষ্ট কৰে ক্ৰিকেটাৰগৰাকীয়ে।
মেক্সৱেলে কয় যে আগন্তুক কেইখনমান শৃংখলাত দলটোৱে ভৱিষ্যতৰ কথা চিন্তা কৰি নতুন খেলুৱৈক সুযোগ দিয়াৰ সিদ্ধান্ত লৈছিল। বাংলাদেশৰ বিৰুদ্ধে শৃংখলাতো কেইবাজনো নতুন খেলুৱৈয়ে সুযোগ লাভ কৰি নিজৰ দক্ষতা প্ৰমাণ কৰিবলৈ সক্ষম হৈছিল।
ইফালে ইংলেণ্ডৰ আগন্তুক সীমিত অভাৰৰ শৃংখলাত মেলবৰ্ণ ক্ৰিকেট গ্ৰাউণ্ডত এখন টি-২০ মেচ অনুষ্ঠিত হ’ব। নিজৰ ঘৰুৱা খেলপথাৰ এমচিজিত এখন বিদায়ী মেচ খেলাৰ সৰু আশা তেওঁৰ মনত আছিল বুলিও মেক্সৱেলে স্বীকাৰ কৰে।
তেওঁৰ ভাষ্য অনুসৰি, নিজৰ প্ৰিয় খেলপথাৰত আন্তঃৰাষ্ট্ৰীয় ক্ৰিকেটক বিদায় জনোৱাৰ সপোন আছিল যদিও অষ্ট্ৰেলিয়া দলৰ বৰ্তমানৰ পৰিকল্পনাক তেওঁ সম্পূৰ্ণৰূপে বুজি পায়। ২০২৮ চনৰ অলিম্পিকক লক্ষ্য কৰি আগন্তুক ১২ৰ পৰা ২৪ মাহৰ ভিতৰত দলটোত যথেষ্ট সালসলনি হোৱাৰ সম্ভাৱনা আছে। সেয়েহে নতুন খেলুৱৈসকলক আন্তঃৰাষ্ট্ৰীয় ক্ৰিকেটৰ চাপৰ সৈতে পৰিচিত কৰোৱাটো দলৰ বাবে গুৰুত্বপূৰ্ণ বুলি তেওঁ মন্তব্য কৰে।
মেক্সৱেলে লগতে কয় যে বিগ বেছ লীগৰ মেচত আন্তঃৰাষ্ট্ৰীয় ক্ৰিকেটৰ দৰে চাপ আৰু অভিজ্ঞতা সদায় লাভ কৰিব নোৱাৰি। বিগত ১৫ বছৰ ধৰি টি-২০ ফৰ্মেটটো তেওঁৰ বাবে ঘৰৰ দৰেই হৈ পৰিছিল। সেয়েহে এই ফৰ্মেটৰ পৰাই বিদায় লোৱাৰ সময়ত এখন স্মৰণীয় মেচৰ আশা মনলৈ অহাটো স্বাভাৱিক আছিল।
অৱশ্যে অৱসৰৰ সিদ্ধান্ত লোৱাৰ আন এটা কাৰণ আছিল তেওঁৰ আঁঠুৰ সমস্যা। বিগ বেছ লীগৰ বাবে নিজকে সম্পূৰ্ণ সুস্থ কৰি তুলিবলৈ আঁঠুত ইনজেকচন লোৱাৰ লগতে পুনৰ প্ৰায় আঠ সপ্তাহ ধৰি কঠোৰ পুনৰ্বাসন প্ৰক্ৰিয়াত মনোনিৱেশ কৰাৰ পৰিকল্পনা কৰিছে তেওঁ।
কেৰিয়াৰৰ বাকী থকা প্ৰতিযোগিতাসমূহত সম্পূৰ্ণ সক্ষমতাৰে খেলি যাবলৈ এতিয়াৰে পৰা নিজৰ শাৰীৰিক সুস্থতাৰ ওপৰত অধিক সময় আৰু মনোযোগ দিয়াৰ প্ৰয়োজন বুলি মেক্সৱেলে উল্লেখ কৰে।
উল্লেখযোগ্য যে চলিত বৰ্ষৰ ফেব্ৰুৱাৰীত ওমানৰ বিৰুদ্ধে খেলা মেচখনেই আছিল মেক্সৱেলৰ অন্তিমখন আন্তঃৰাষ্ট্ৰীয় মেচ। টি-২০ বিশ্বকাপত গ্ৰুপ পৰ্যায়ৰ পৰাই অষ্ট্ৰেলিয়া বিদায় লোৱাৰ পূৰ্বে অনুষ্ঠিত হোৱা সেই মেচখনৰ জৰিয়তেই আন্তঃৰাষ্ট্ৰীয় ক্ৰিকেটত তেওঁৰ যাত্ৰাৰ অন্ত পৰে।
