ঈদৰ আনন্দৰ মাজতে চাঞ্চল্যকৰ ঘটনা। পুত্ৰৰ হাতত প্ৰাণ গ’ল ৭০ বছৰীয়া বৃদ্ধ পিতৃৰ৷ দুই পুত্ৰৰ মাজত লগা কাজিয়া ভাঙিবলৈ গৈ পুত্ৰৰ হাততে প্ৰাণ গ’ল পিতৃৰ৷ বৰপেটাৰ কেওটকুছিৰ সমীপৰ পুঠিমাৰী গাঁৱত সংঘটিত হৈছে এই শোকাৱহ ঘটনা৷ মৃত লোকজনৰ নাম নুৰ মহম্মদ আলী৷ দুই পুত্ৰ আছাদুল আলী আৰু ছদিদুল আলীৰ মাজত টকাক লৈ কাজিয়াৰ সূত্ৰপাত ঘটিছিল। আছাদুলে কনিষ্ঠ ভাতৃৰ পৰা বিচাৰিছিল ১ হাজাৰ টকা, পিছে ভাতৃ ছহিদুলে ককায়েকক দিছিল ৫০০ টকা৷ ইয়াকে লৈ দুই ভাতৃৰ মাজত লগা কাজিয়া ভাঙিবলৈ যোৱাত বৃদ্ধ পিতৃৰ অণ্ডকোষত জ্যেষ্ঠ পুত্ৰ আছাদুলে গোৰ মাৰি দিয়াৰ ফলত বৃদ্ধ পিতৃয়ে থিতাতে প্ৰাণ হেৰুৱায়৷ ঈদৰ আনন্দৰ মাজতে এহেজাৰ টকাৰ বাবে দুই ভাতৃৰ মাজৰ কাজিয়া ভাঙিবলৈ যোৱা বৃদ্ধ পিতৃৰ এনে শোকাৱহ মৃত্যুৰ ঘটনাক লৈ অঞ্চলটোত শোকৰ ছাঁ পৰিছে৷ সম্প্ৰতি দুই ভাতৃ পলাতক হৈ আছে৷ সম্প্ৰতি আৰক্ষীয়ে ঘটনাটোৰ অনুসন্ধান আৰম্ভ কৰিছে৷
