মোহনবাগানক ৪-১ গ’লত পৰাস্ত কৰি ১৭সংখ্যক ডুৰাণ্ড কাপ জয় ইষ্ট বেংগলৰ
২২ বছৰৰ দীঘলীয়া অপেক্ষাৰ অন্ত পেলাই ডুৰাণ্ড কাপৰ ট্ৰফী জয় কৰিলে ইষ্ট বেংগল এফ চিয়ে। কলকাতাৰ ছল্ট লেক ষ্টেডিয়ামত অনুষ্ঠিত ফাইনেলত চিৰপ্ৰতিদ্বন্দ্বী মোহনবাগান ছুপাৰ জায়েণ্টক ৪-১ গ’লত পৰাস্ত কৰি ইষ্ট বেংগলে অভিলেখসংখ্যক ১৭সংখ্যক ডুৰাণ্ড কাপ জয় কৰে।
মেচৰ আৰম্ভণিৰ পৰাই ইষ্ট বেংগলে আক্ৰমণাত্মক ফুটবল খেলি মোহনবাগানক চাপত ৰাখে। দশম মিনিটত বিপিন সিঙে প্ৰথমটো গ’ল কৰাৰ পাছতে ১২ আৰু ২৩ মিনিটত এডমণ্ড লালৰিন্দিকাই দুটা গ’ল কৰি দলক ৩-০ অগ্ৰগতি দিয়ে।
৩৩ মিনিটত মনবীৰ সিঙে মোহনবাগানৰ হৈ এটা গ’ল দি ব্যৱধান কমায়। কিন্তু প্ৰথমাৰ্ধ শেষ হোৱাৰ ঠিক আগতে, ৪৪ মিনিটত লালৰিন্দিকাই নিজৰ তৃতীয়টো গ’ল কৰি হেট্ৰিক সম্পূৰ্ণ কৰে।
দ্বিতীয়াৰ্ধত আৰু কোনো গ’ল নহ’ল। শেষত ৪-১ গ’লৰ ব্যৱধানত জয়ী হৈ ২২ বছৰৰ পাছত ডুৰাণ্ড কাপৰ ট্ৰফী পুনৰ নিজৰ দখললৈ আনিলে ইষ্ট বেংগলে। এই জয়ৰ লগে লগে ডুৰাণ্ড কাপৰ সৰ্বাধিক খিতাপ জয়ৰ ক্ষেত্ৰত মোহনবাগানৰ সৈতে ১৭টা খিতাপেৰে সমতা স্থাপন কৰিলে দলটোৱে।
