টকা গণি গণি ভাগৰিছে অৰ্ধশতাধিক কৰ্মচাৰী
অহৰহ চলি আছে ২৫ টকা গণা মেচিন
৩৫৩ কোটি টকা গণনা শেষ হৈছে…
কংগ্ৰেছৰ ঝাৰখণ্ডৰ ৰাজ্যসভাৰ সাংসদ ধীৰাজ চাহুৰ ওড়িশাৰ গুপ্তধনৰ পাহাৰত আয়কৰ বিভাগৰ হাত লগাৰ পৰাই তোলপাৰ লাগি আছে দেশ। অভিযানৰ পঞ্চম দিনাও চলি থাকিল টকা গণনা।
অহৰহ চলি আছে ২৫টা গণা মেচিন। ১৫টা মেচিন অতিৰিক্তভাৱে সাজু কৰি ৰখা হয়। পাঁচটা দিনে ধীৰাজ চাহুৰ গোপন ভাণ্ডাৰৰ টকা গণিলে তিনিটা বেংকৰ কৰ্মচাৰীয়ে। ১৭৬ বেগ টকাৰ গণনা কৰিবলৈ আহি বেংক কৰ্মচাৰীসকলো হতভম্ভ হৈ পৰিল। বেংকতো কোনো কালে এনে টকাৰ দম দেখা নাছিল তেওঁলোকে।
জব্দ হোৱা জমা কৰা হ’ব স্থানীয় SBIৰ শাখাত
সাংসদ তথা সুৰা প্ৰস্তুতকাৰী এটা প্ৰতিষ্ঠান মালিক কংগ্ৰেছ নেতা ধীৰাজ চাহুৰ এই পাহাৰসম ধনৰ উৎসক লৈ গৰম হৈছে দেশৰ ৰাজনীতি। বিজেপিয়ে কংগ্ৰেছক তীব্ৰ আক্ৰমণ কৰিছে। কিন্তু কংগ্ৰেছে এই ধনৰ সৈতে দল কোনো কাৰণতে জৰিত নহয় আৰু ইয়াৰ উত্তৰ ধীৰাজ চাহুয়ে দিব পাৰিব বুলি মন্তব্য কৰে।
আনুষ্ঠানিক ঘোষণা হোৱা নাই যদিও ইতিমধ্যে জব্দ হোৱা টকাৰ গণনা শেষ হৈছে। কিন্তু অভিযান অব্যাহত ৰাখিছে আইকৰ বিভাগে। সন্দেহ কৰা হৈছে ২০০০ টকীয়া বন্ধ কৰি দিয়াৰ সময়তহে এই বৃহৎ পৰিমাণৰ ধন মজুত কৰা হৈছে। কাৰণ জব্দ হোৱা ধনৰ মাজত কেৱল ৫০০, ২০০, ১০০ টকীয়া নোটহে পোৱা গৈছে। সাংসদ ধীৰাজ চাহুৰ এই ধনক লৈ ইডি, চিবিআইয়ে ও তদন্ত চলাব।
