নদীদ্বীপ মাজুলীত ব্ৰহ্মপুত্ৰৰ খহনীয়াই পুনৰ এক ভয়াৱহ ৰূপ ধাৰণ কৰিছে। বিগত এটা মাহত খহনীয়াৰ প্ৰকোপ ইমান বৃদ্ধি পাইছে যে সমগ্ৰ নামনি মাজুলী মূল ভূখণ্ডৰ পৰা দ্বিখণ্ডিত হোৱাৰ এক চৰম আশংকাই দেখা দিছে। চকুৰ পলকতে নৈৰ বুকুত জাহ গৈছে বিঘাই বিঘাই কৃষিভূমি।
এই সংকটপূৰ্ণ পৰিস্থিতিৰ বুজ ল’বলৈ আজি মাজুলীৰ ঐতিহ্যমণ্ডিত আউনিআটী সত্ৰৰ সত্ৰাধিকাৰ ডঃ পীতাম্বৰদেৱ গোস্বামী খহনীয়াগ্ৰস্ত অঞ্চলত উপস্থিত হয়। তেখেতে মাজুলীৰ কৰ্দৈগুৰি, মহৰিচুক আৰু ভকত চাপৰিত চলি থকা ব্ৰহ্মপূত্ৰৰ খহনীয়া আৰু ইয়াৰ প্ৰতিৰোধৰ বাবে জলসম্পদ বিভাগে গ্ৰহণ কৰা ব্যৱস্থাৱলীৰ বুজ লয়।
অঞ্চলটোক স্থায়ী ভৌগোলিক সুৰক্ষা প্ৰদান কৰাৰ স্বাৰ্থত সত্ৰাধিকাৰ গৰাকীয়ে চৰকাৰ আৰু জলসম্পদ বিভাগলৈ কেতবোৰ গুৰুত্বপূৰ্ণ পৰামৰ্শ আগবঢ়ায়—
- সুঁতি বন্ধ কৰাৰ আহ্বান: ব্ৰহ্মপুত্ৰৰ এটা সুঁতি সোমাই আহি কৰ্দৈগুৰি অঞ্চলত এই ভয়াবহ খহনীয়াৰ সৃষ্টি কৰিছে। গতিকে আগন্তুক খৰালিৰ সময়ত এই সুঁতিটো সম্পূৰ্ণৰূপে বন্ধ কৰি দিবলৈ তেখেতে বিভাগক আহ্বান জনায়।
- স্থায়ী সুৰক্ষাৰ দাবী: বৰ্তমান জলসম্পদ বিভাগে কেৱল আৰ চি চি পৰ্কুপাইন (RCC Porcupine) দি অস্থায়ী ভাৱে খহনীয়া প্ৰতিৰোধৰ ব্যৱস্থা গ্ৰহণ কৰিছে। কিন্তু ইয়াৰ ওপৰত নৈপৰীয়া ৰাইজৰ কোনো আস্থা নাই। গতিকে ইয়াত চিৰস্থায়ী ব্যৱস্থা গ্ৰহণ কৰিবলৈ তেখেতে চৰকাৰক কাতৰ আহ্বান জনায়।
কৰ্দৈগুৰিৰ দুৰ্ভগীয়া ৰাইজ বৰ্তমান চৰম অসহায় অৱস্থাত দিন কটাবলগীয়া হৈছে। ইতিপূৰ্বেও ব্ৰহ্মপুত্ৰৰ খহনীয়াত সৰ্বস্ব হেৰুৱাই এইসকল লোকে দুবাৰকৈ নিজৰ ভেটি এৰি অন্য স্থানলৈ স্থানান্তৰিত হ’বলৈ বাধ্য হৈছিল। বহু সময়ত উপায়হীন হৈ খহনীয়াৰ পৰা পৰিত্ৰাণ বিচাৰি ৰাইজে ব্ৰহ্মপুত্ৰ নদীক প্ৰাৰ্থনা পৰ্যন্ত জনাবলগীয়া হৈছে।
আজি সত্ৰাধিকাৰগৰাকীয়ে খহনীয়াগ্ৰস্ত ৰাইজৰ কাষত থিয় হৈ তেওঁলোকৰ দুখ-দুৰ্দশাৰ বুজ লোৱাৰ লগতে চৰকাৰক অতি শীঘ্ৰে যুদ্ধকালীন তৎপৰতাৰে এই সমস্যাক গুৰুত্ব সহকাৰে ল’বলৈ দাবী জনায়।
