গোলাঘাটত অনুষ্ঠিত সৌন্দৰ্য প্ৰতিযোগিতাত উজলি উঠিল গোৱালপাৰা জিলাৰ দুধনৈৰ বগুলামাৰী গাঁৱৰ যুৱতী বনজিতা দৈমাৰী। ১৩ ছেপ্টেম্বৰত গোলাঘাটত অনুষ্ঠিত ‘মিষ্টাৰ এণ্ড মিছ ৰয়েল অৱ আইকন ফেচ ২০২৬’ ছিজন-৪ সৌন্দৰ্য প্ৰতিযোগিতাত মিছ শাখাত অৰ্থাৎ শ্ৰেষ্ঠ খিতাপ অৰ্জন কৰে বনজিতাই।
কিণ্ডাৰ, মিষ্টাৰ, মিচেছ আৰু মিছ—বিভিন্ন শাখাত ৰাজ্যৰ বিভিন্ন প্ৰান্তৰ প্ৰতিযোগীয়ে অংশগ্ৰহণ কৰা প্ৰতিযোগিতাখনৰ মিছ শাখাত ২০ গৰাকীতকৈ অধিক প্ৰতিযোগীক চেৰ পেলাই প্ৰথম স্থান দখল কৰে বনজিতাই।
এই সফলতাৰ জৰিয়তে গোৱালপাৰা জিলাৰ লগতে অসমলৈ গৌৰৱ কঢ়িয়াই অনা বনজিতাই লাভ কৰিছে ৰাষ্ট্ৰীয় পৰ্যায়ৰ সৌন্দৰ্য প্ৰতিযোগিতাত অংশগ্ৰহণৰ সুযোগ।
বনজিতাৰ এই সফলতাই তেওঁৰ কেৰিয়াৰলৈ কঢ়িয়াই আনিছে আন এক সুবৰ্ণ সুযোগ। প্ৰতিযোগিতাখনৰ জৰিয়তে গোৱাত অনুষ্ঠিত হ’বলগীয়া ৰাষ্ট্ৰীয় পৰ্যায়ৰ বৃহৎ সৌন্দৰ্য প্ৰতিযোগিতালৈ পোনপটীয়া প্ৰৱেশৰ সুযোগ লাভ কৰিছে তেওঁ।
নিজৰ সফলতাৰ সন্দৰ্ভত বনজিতাই কয়—“মই নিজেই নিজৰ অনুপ্ৰেৰণা। নিজকে দেখিয়েই মই আত্মবিশ্বাস আয়ত্ত কৰিছোঁ।”
এতিয়া গোৱাৰ ৰাষ্ট্ৰীয় মঞ্চত নিজৰ প্ৰতিভা প্ৰদৰ্শনৰ বাবে সাজু বনজিতা দৈমাৰী।
