আই এছ আই এছ-খোৰাচানে কেইবাটাও ভয়ংকৰ বিস্ফোৰণ সংঘটিত কৰাৰ তিনিদিন পিছত কাবুলৰ হামিদ কাৰজাই আন্তঃৰাষ্ট্ৰীয় বিমানবন্দৰৰ ওচৰত আজি আন এটা বিস্ফোৰণ সংঘটিত হয়। কাবুলৰ আৰক্ষী প্ৰধান ৰছিদে জনোৱা অনুসৰি, দেওবাৰে আবেলি কাবুলৰ ১১সংখ্যক নিৰাপত্তা জিলাৰ বিমানবন্দৰৰ নিকটৱৰ্তী খাজেহ বাঘৰাৰ গুলাই অঞ্চলৰ এটা আৱাসিক ঘৰত ৰকেটে খুন্দা মাৰে।
প্ৰাথমিক প্ৰতিবেদন অনুসৰি, দুজন লোক নিহত হয় আৰু আন তিনিজন আহত হয়। এটা ভিডিঅ’ত, কাবুল বিমানবন্দৰৰ পৰা প্ৰায় এক কিলোমিটাৰ দূৰত থকা এটা অট্টালিকাৰ পৰা ধোঁৱা ওলোৱা দেখা গৈছিল। অৱশ্যে, এতিয়ালৈকে কোনো গোটে আক্ৰমণৰ দ্বায়িত্ব স্বীকাৰ কৰা নাই।
আমেৰিকা যুক্তৰাষ্ট্ৰৰ সামৰিক আক্ৰমণ
আমেৰিকা যুক্তৰাষ্ট্ৰই দেওবাৰে কাবুলত সামৰিক আক্ৰমণ চলাইছিল, ৰয়টাৰৰ এক প্ৰতিবেদনত দুজন আমেৰিকা যুক্তৰাষ্ট্ৰৰ বিষয়াৰ উদ্ধৃতি দিয়া হৈছিল। বিষয়াসকলে নাম প্ৰকাশ নকৰাৰ চৰ্তত কয় যে ড্ৰোন আক্ৰমণত সন্দেহযুক্ত আইএছআইএছ-কে উগ্ৰপন্থীক লক্ষ্য কৰি লোৱা হৈছিল। উল্লেখ্য যে, কাবুল বিমানকোঠত আত্মঘাতী আক্ৰমণৰ পিছতে এই ঘটনাত জড়িতসকলক বিশ্বৰ যিকোনো ঠাইৰ পৰা বিচাৰি উলিয়াই হত্যা কৰা হ’ব বুলি মাৰ্কিন ৰাষ্ট্ৰপতি জ’ বাইডেনে সকীয়াই দিয়াৰ পিছতে পুনৰ সন্ত্ৰাসবাদী আত্মঘাতী আক্ৰমণৰ শংকা ঘণীভূত হৈছিল। ৩৬ ঘন্টাৰ ভিতৰতে কাবুল বিমানকোঠত আক্ৰমণ সংঘটিত হোৱাৰ সম্ভাৱনা ব্যক্ত কৰিছিল মাৰ্কিন ৰাষ্ট্ৰপতি জ’ বাইডেনে।
