ৰাষ্ট্ৰসংঘৰ সাধাৰণ পৰিষদৰ (UNGA) ৮০সংখ্যক বৈঠকত ভুটানৰ প্ৰধানমন্ত্ৰী শেৰিং তবগিয়ে ৰাষ্ট্ৰসংঘৰ নিৰাপত্তা পৰিষদত (UNSC) স্পষ্টকৈ কৈছে যে, সলনি হোৱা বৈশ্বিক বাস্তৱতাৰ পৰিপ্ৰেক্ষিতত ভাৰত আৰু জাপানৰ দৰে যোগ্য দেশসমূহক স্থায়ী সদস্যৰ পদ দিয়া উচিত।
এই বক্তব্য এনে এটা সময়ত আহিছে যেতিয়া ভাৰতে দীৰ্ঘদিন ধৰি এই দাবী উত্থাপন কৰি আহিছে আৰু শেহতীয়াকৈ ব্ৰিক্স বিদেশ মন্ত্ৰীসকলৰ বৈঠকতো এই বিষয়ে সমৰ্থন পোৱা গৈছে।
ভুটানী প্ৰধানমন্ত্ৰীয়ে কৈছে যে, UNSC কেৱল প্ৰদৰ্শনীৰ সংস্থা হিচাপে নহ’ব, বৰঞ্চ বিশ্বৰ প্ৰকৃত প্ৰত্যাহ্বানৰ সমাধান দিয়া সক্ষম শক্তি হিচাপে গঢ়ি উঠিব লাগে। তেওঁ কৈছে যে, ভুটানে ৰাষ্ট্ৰসংঘৰ সংস্কাৰৰ সমৰ্থন কৰে, য’ত নিৰাপত্তা পৰিষদৰ সম্প্ৰসাৰণো অন্তৰ্ভুক্ত। এখন সংস্কাৰিত নিৰাপত্তা পৰিষদত ভাৰত আৰু জাপানৰ দৰে সক্ষম আৰু নেতৃত্বদায়ী দেশসমূহক স্থান দিয়া উচিত।
ভুটানৰ এই বক্তব্য এনে সময়ত আহিছে যেতিয়া ব্ৰিক্স দেশসমূহে ভাৰত আৰু ব্ৰাজিলৰ UNSCত বৃহৎ ভূমিকাৰ দাবীৰ সমৰ্থন কৰিছে। শেহতীয়া বৈঠকত চীন আৰু ৰাছিয়াই পুনৰ কৈছে যে, তেওঁলোকে ভাৰত আৰু ব্ৰাজিলৰ উচ্চাকাঙ্ক্ষাৰ সন্মান কৰে আৰু নিৰাপত্তা পৰিষদত তেওঁলোকৰ শক্তিশালী ভূমিকা চাব বিচাৰে।
ভাৰতে দীৰ্ঘদিন ধৰি UNSCত সংস্কাৰ আৰু এছিয়ান, আফ্ৰিকান দেশসমূহৰ অংশগ্ৰহণ বৃদ্ধিৰ দাবী কৰি আহিছে, কিন্তু চীনৰ বিৰোধৰ ফলত ই সম্ভৱ হোৱা নাই। UNSC ৰাষ্ট্ৰসংঘৰ ৬টা প্ৰধান অংগৰ মাজত এটা, য’ত ৫খন স্থায়ী আৰু ১০খন অস্থায়ী সদস্য দেশ আছে। স্থায়ী সদস্যসকলক P5 বুলি কোৱা হয়, তেওঁলোকৰ হাতত ভেট’ পাৱাৰ (Veto Power) আছে। আনহাতে অস্থায়ী সদস্যসকল প্ৰতি ২ বছৰত সলনি হয়।
এই ৫খন স্থায়ী সদস্য ৰাষ্ট্ৰৰ ভিতৰত চীনক বাদ দিলে বাকী সকলোৰে সৈতে ভাৰতৰ ভাল আৰু শক্তিশালী সম্পৰ্ক আছে। ফ্ৰান্সে ইতিমধ্যে ভাৰতৰ স্থায়ী সদস্যত্বৰ সমৰ্থন কৰিছে। যদি চীনে বাধা নিদিয়ে, তেন্তে ভাৰতৰ UNSCত স্থায়ী প্ৰৱেশৰ পথ মুকলি হ’ব পাৰে। বাস্তৱত, UNSCত কোনো বিষয়ত সিদ্ধান্তৰ বাবে ১৫খনৰ ভিতৰত ৯খন সদস্য ৰাষ্ট্ৰৰ অনুমোদনৰ প্ৰয়োজন, কিন্তু স্থায়ী সদস্যৰ মাজত কোনো এখনে ভেট’ পাৱাৰ ব্যৱহাৰ কৰিলে সেই প্ৰস্তাৱ/সিদ্ধান্ত বাতিল হৈ যায়।
