অসম চৰকাৰে ৰাজ্যৰ শক্তি খণ্ডৰ ইতিহাসত আটাইতকৈ ডাঙৰ বিনিয়োগৰ পৰিকল্পনা উন্মোচন কৰিছে। ৰাজ্যখনক বিদ্যুৎ উদ্বৃত্ত (Power-Surplus) অঞ্চল আৰু উত্তৰ-পূব ভাৰতৰ সেউজ শক্তিৰ কেন্দ্ৰবিন্দু (Green Energy Hub) হিচাপে গঢ়ি তোলাৰ লক্ষ্যৰে জলবিদ্যুৎ, সৌৰ শক্তি, তাপবিদ্যুৎ আৰু শক্তি সংৰক্ষণ প্ৰকল্পসমূহত ৭৭,৩৫৩ কোটিতকৈও অধিক টকা বিনিয়োগ কৰাৰ সিদ্ধান্ত লোৱা হৈছে। ইয়াৰ জৰিয়তে অসমৰ বৰ্তমানৰ ৪৫০ মেগাৱাট বিদ্যুৎ উৎপাদন ক্ষমতা ৮,৪৫৭ মেগাৱাটলৈ বৃদ্ধি কৰা হ’ব।
মুখ্যমন্ত্ৰী ড০ হিমন্ত বিশ্ব শৰ্মাই ছচিয়েল মিডিয়া এক্স (X)-ত এই বৃহৎ আঁচনিখনৰ বিষয়ে উল্লেখ কৰি কয়, “আজিৰ অসমে ডাঙৰ সপোন দেখে আৰু তাক বাস্তৱায়িতও কৰে। শক্তি খণ্ডত ৭৭,০০০+ কোটি টকাৰ বিনিয়োগে অনাগত দিনত ৮,০০০ মেগাৱাটতকৈও অধিক বিদ্যুৎ উৎপাদন কৰিব, যাৰ ফলত এখন বিকশিত অসমৰ যাত্ৰা অধিক ক্ষিপ্ৰতৰ হ’ব।”
ৰাজ্যিক বাজেট উত্থাপন কৰি অসমৰ বিত্তমন্ত্ৰী জয়ন্ত মল্ল বৰুৱাই কয় যে অসমৰ শক্তি খণ্ডই এক ঐতিহাসিক পৰিৱৰ্তনৰ যুগত প্ৰৱেশ কৰিছে। এই বৃহৎ পৰিকল্পনাৰ বাবে প্ৰয়োজনীয় ধন ৰাজ্যৰ নিজস্ব সম্পদ, কেন্দ্ৰীয় চৰকাৰৰ আঁচনি, বহিঃসাহায্যপ্ৰাপ্ত প্ৰকল্প (Externally Aided Projects) আৰু ৰাজহুৱা-ব্যক্তিগত অংশীদাৰিত্ব (PPP)-ৰ জৰিয়তে সংগ্ৰহ কৰা হ’ব।
পৰিকল্পিত মুখ্য প্ৰকল্পসমূহ:
- পাম্পড্ ষ্ট’ৰেজ পাৱাৰ (PSP) প্ৰকল্প: নবীকৰণযোগ্য শক্তিৰ একত্ৰীকৰণ আৰু ঔদ্যোগিক বিকাশৰ বাবে চৰকাৰে ৪,৯০০ মেগাৱাট ক্ষমতা সম্পন্ন ৪ টা PSP প্ৰকল্পৰ অনুমোদন জনাইছে, য’ত প্ৰায় ২৭,১০০ কোটি টকাৰ ব্যক্তিগত বিনিয়োগ হ’ব।
- ল’ৱাৰ কপিলী জলবিদ্যুৎ প্ৰকল্প: ১২০ মেগাৱাট ক্ষমতা সম্পন্ন ল’ৱাৰ কপিলী জলবিদ্যুৎ প্ৰকল্পটো বৰ্তমান পৰীক্ষামূলকভাৱে আৰম্ভ কৰা হৈছে আৰু ইয়াৰ পৰা ইতিমধ্যে ৫৫ মেগাৱাট বিদ্যুৎ গ্ৰীড যোগে সৰবৰাহ কৰা হৈছে। চলিত জুলাই মাহৰ শেষৰ ফালে এই প্ৰকল্পটো সম্পূৰ্ণৰূপে কাৰ্যক্ষম হ’ব।
- বিলাসীপাৰা তাপবিদ্যুৎ প্ৰকল্প: বিত্তমন্ত্ৰীগৰাকীয়ে ধুবুৰী জিলাৰ বিলাসীপাৰাত ৪,০০০ কোটি টকাৰ আনুমানিক বিনিয়োগেৰে ৩,২০০ মেগাৱাট ক্ষমতা সম্পন্ন এটা বৃহৎ তাপবিদ্যুৎ প্ৰকল্প স্থাপনৰ পৰিকল্পনা ঘোষণা কৰিছে।
- নতুন জলবিদ্যুৎ প্ৰকল্প: ইয়াৰ উপৰি, ৰাজ্যখনত ২,৬১৭ কোটি টকাৰ ব্যয় সাপেক্ষে ১৩৭.২ মেগাৱাট মুঠ ক্ষমতাৰ ১১টা নতুন জলবিদ্যুৎ প্ৰকল্প পৰিকল্পনা আৰু ৰূপায়ণৰ বিভিন্ন পৰ্যায়ত আছে।
ভৱিষ্যতৰ আন্তঃগাঁথনি উন্নয়ন:
অনাগত ৫ বছৰত অসম চৰকাৰে বিদ্যুৎ পৰিবহণ আৰু বিতৰণ ব্যৱস্থা অধিক শক্তিশালী কৰাৰ লক্ষ্য লৈছে। ইয়াৰ অধীনত ১৫,০০০ চাৰ্কিট কিলোমিটাৰ পৰিবহণ আৰু বিতৰণ লাইন সংযোগ কৰা হ’ব, ১২০টা নতুন উপ-কেন্দ্ৰ (Substations) নিৰ্মাণ কৰা হ’ব আৰু ২০,০০০টা হাই-ভল্টেজ ডিষ্ট্ৰিবিউচন ট্ৰান্সফৰ্মাৰ স্থাপন কৰা হ’ব। ইয়াৰ ফলত ৰাজ্যখনত বিদ্যুৎ সৰবৰাহ ব্যৱস্থা অধিক সুচল আৰু নিৰ্ভৰযোগ্য হৈ পৰিব।
