বাইক আৰু ডাম্পাৰৰ মাজত মুখামুখি সংঘৰ্ষ। এখন দ্ৰুতবেগী ডাম্পাৰ আৰু বাইকৰ মাজত মুখামুখি সংঘৰ্ষত জীৱন্তে অগ্নিগদ্ধ দুজনকৈ যুৱক। থিতাতে মৃত্যু ঘটে দুয়োজন যুৱকৰ। চাপৰৰ ধীৰঘাটত সংঘটিত হৈছে এই ভয়ংকৰ পথ দুৰ্ঘটনা।
থিতাতে নিহত বাইক আৰহী দুজন চাপৰৰ ৰৌমাৰী গাঁৱৰ ইমান হুছেইন আৰু শ্বাহৰুখ শ্বেখ। দুৰ্ঘটনাগ্ৰস্ত বাইকখনৰ নম্বৰ AS17K 4236 আৰু ডাম্পাৰখনৰ নম্বৰ AS17C 0373। দুৰ্ঘটনাৰ পিছতে সূত্ৰপাত ঘটে অগ্নিকাণ্ডৰ।
চাপৰৰ ধীৰঘাটৰ ১৭ নং ৰাষ্ট্ৰীয় ঘাইপথত এই চাঞ্চল্যকৰ ঘটনা। বালিভৰ্তি ডাম্পাৰখনে এই দুৰ্ঘটনাটো সংঘটিত কৰাৰ সন্দেহ। ইফালে দুৰ্ঘটনাৰ পিছতে অগ্নিনিৰ্বাপক বাহিনী উপস্থিত হৈ জুই নুমুৱাবলৈ পানী প্ৰয়োগ কৰে যদিও পানীয়ে কাম নিদিয়াত ফ’ম প্ৰয়োগ কৰিহে জুই নিৰ্বাপন কৰিবলৈ সক্ষম হয়।
দুৰ্ঘটনাৰ পিছতে ১৭ নং ৰাষ্ট্ৰীয় ঘাইপথ প্ৰায় দুঘণ্টা ধৰি বন্ধ হৈ পৰে। দুখনকৈ জেচিবিৰে বালিভৰ্তি অগ্নিদগ্ধ ডাম্পাৰখন আঁতৰাই লৈ যোৱা হয়। ঘটনাস্থলীত উপস্থিত হৈ চাপৰ থানাৰ ভাৰপ্ৰাপ্ত বিষয়া, বিলাসীপাৰা মহকুমা আৰক্ষী বিষয়াই পৰিস্থিতি নিয়ন্ত্রণ কৰি ঘাইপথ সুচল কৰে।
