অসমৰ মহাকাশ গৱেষণা আৰু বিজ্ঞান-প্ৰযুক্তিৰ ক্ষেত্ৰত এক নতুন অধ্যায়ৰ সূচনা হোৱাৰ পথ প্ৰশস্ত হৈছে। কামৰূপ মহানগৰ জিলাৰ চন্দ্ৰপুৰত ভাৰতীয় মহাকাশ গৱেষণা সংস্থা (ISRO)ৰ এক উন্নত ৰাডাৰ গৱেষণা কেন্দ্ৰ স্থাপন কৰা হ’ব। প্ৰায় ২০০ বিঘা মাটিত নিৰ্মাণ হ’বলগীয়া এই কেন্দ্ৰটোৰ আধাৰশিলা স্থাপন কৰে মুখ্যমন্ত্ৰী হিমন্ত বিশ্ব শৰ্মাই।
ISROৰ মহাকাশ সম্পদ নিৰীক্ষণ আৰু সুৰক্ষাৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰা Project NETRAৰ অংশ হিচাপে চন্দ্ৰপুৰৰ এই উন্নত ৰাডাৰ গৱেষণা কেন্দ্ৰটো গঢ়ি তোলা হ’ব। কেন্দ্ৰটোৰ জৰিয়তে মহাকাশত থকা বিভিন্ন বস্তু তথা উপাদানৰ গতিবিধি পৰ্যবেক্ষণ আৰু নিৰীক্ষণ কৰাৰ সক্ষমতা বৃদ্ধি পাব। বিশেষকৈ ভাৰতৰ গুৰুত্বপূৰ্ণ মহাকাশ সম্পদসমূহক সম্ভাব্য মহাকাশীয় বিপদৰ পৰা সুৰক্ষিত ৰখাৰ ক্ষেত্ৰত এই কেন্দ্ৰটোৱে গুৰুত্বপূৰ্ণ ভূমিকা পালন কৰিব বুলি আশা কৰা হৈছে।
অনুষ্ঠানত মুখ্যমন্ত্ৰী হিমন্ত বিশ্ব শৰ্মাই কয় যে চন্দ্ৰপুৰৰ তাপ বিদ্যুৎ প্ৰকল্পৰ প্ৰায় ২০০ বিঘা ভূমি এই গৱেষণা কেন্দ্ৰ স্থাপনৰ বাবে ISROক প্ৰদান কৰা হৈছে। ৰাজ্য চৰকাৰে বিনামূলীয়াকৈ এই ভূমি আবণ্টন দিয়াৰ লগতে ভৱিষ্যতে প্ৰকল্পটোৰ পৰিসৰ বৃদ্ধি পালে অতিৰিক্ত ভূমি আবণ্টনৰ বাবেও চৰকাৰ সাজু বুলি মুখ্যমন্ত্ৰীগৰাকীয়ে উল্লেখ কৰে।
তেওঁ কয় যে অসমত মহাকাশ বিজ্ঞান আৰু গৱেষণাৰ ক্ষেত্ৰত কিছু পৰিমাণে পিছপৰি থকাৰ পৰিপ্ৰেক্ষিতত চন্দ্ৰপুৰত এই কেন্দ্ৰ স্থাপন এক গুৰুত্বপূৰ্ণ পদক্ষেপ। ভৱিষ্যতে চন্দ্ৰপুৰে মহাকাশ গৱেষণাৰ ক্ষেত্ৰত বিশেষ পৰিচয় লাভ কৰিব বুলি তেওঁ আশা প্ৰকাশ কৰে।
মুখ্যমন্ত্ৰীগৰাকীয়ে লগতে অসমৰ যোৱা এটা দশকৰ পৰিৱৰ্তনৰ কথাও উল্লেখ কৰে। তেওঁৰ মতে, এটা সময়ত আন্দোলন, ধৰ্ণা আৰু উগ্ৰপন্থী সংগঠনৰ পৰিচয়ৰ সৈতে অসমক চিহ্নিত কৰা হৈছিল যদিও বিগত দশকটোত ৰাজ্যখনত উন্নয়নৰ নতুন পৰিৱেশ সৃষ্টি হৈছে। স্বাস্থ্য, বিজ্ঞান-প্ৰযুক্তি, শিক্ষা আৰু উদ্যোগকে ধৰি বিভিন্ন ক্ষেত্ৰত অসমে নতুন দিশত আগবাঢ়িছে বুলি তেওঁ কয়।
মুখ্যমন্ত্ৰীয়ে জনোৱা অনুসৰি, চন্দ্ৰপুৰৰ প্ৰস্তাৱিত কেন্দ্ৰটোত অহা ফেব্ৰুৱাৰীৰ পৰা গৱেষণামূলক কাম আৰম্ভ কৰা হ’ব। তেওঁ কয় যে এদিন বাংগালুৰুৰ দৰে চন্দ্ৰপুৰৰ নামো ভাৰতৰ মহাকাশ গৱেষণাৰ মানচিত্ৰত গুৰুত্বপূৰ্ণ স্থান হিচাপে খোদিত হ’ব।
তেওঁৰ মতে, মহাকাশ বিজ্ঞানৰ সৈতে জড়িত এনে এটা প্ৰতিষ্ঠান চন্দ্ৰপুৰত স্থাপন হোৱাটো কেৱল অঞ্চলটোৰ বাবেই নহয়, সমগ্ৰ অসমৰ বাবেই উল্লেখযোগ্য।
চন্দ্ৰপুৰত স্থাপন হ’বলগীয়া কেন্দ্ৰটো ISROৰ Network for Space Object Tracking and Analysis (NETRA)প্ৰকল্পৰ সৈতে জড়িত। মহাকাশত থকা বিভিন্ন বস্তুৰ গতিবিধি অনুসৰণ, পৰ্যবেক্ষণ আৰু বিশ্লেষণৰ ক্ষেত্ৰত এনে ব্যৱস্থাই গুৰুত্বপূৰ্ণ ভূমিকা পালন কৰে।
মহাকাশত উপগ্ৰহৰ সংখ্যা বৃদ্ধি পোৱাৰ লগে লগে মহাকাশীয় আৱৰ্জনা আৰু বিভিন্ন বস্তুৰ গতিপথ নিৰীক্ষণ কৰাটো বিশ্বজুৰি গুৰুত্বপূৰ্ণ বিষয় হৈ পৰিছে। এই পৰিপ্ৰেক্ষিতত ভাৰতৰ মহাকাশ সম্পদসমূহৰ নিৰাপত্তা অধিক শক্তিশালী কৰাৰ ক্ষেত্ৰত চন্দ্ৰপুৰৰ কেন্দ্ৰটোৱে ভূমিকা পালন কৰিব বুলি আশা কৰা হৈছে।
অনুষ্ঠানত বিজ্ঞান আৰু প্ৰযুক্তি বিভাগৰ মন্ত্ৰী কেশৱ মহন্তই কয় যে ২০২৩ চনতে ISROৰ পৰা এই প্ৰকল্প স্থাপনৰ প্ৰস্তাৱ অসম চৰকাৰে লাভ কৰিছিল। মুখ্যমন্ত্ৰীৰ নিৰ্দেশত প্ৰকল্পটোৰ বাবে উপযুক্ত ভূমিৰ সন্ধান আৰম্ভ কৰা হয়। তেওঁ জনোৱা মতে, ২০২৫ চনৰ ২ এপ্ৰিলত প্ৰকল্পটোৰ বাবে উপযুক্ত ভূমি চিনাক্ত কৰা হয়। চন্দ্ৰপুৰৰ লিংক ৰোডৰ কাষত কেন্দ্ৰটো স্থাপন কৰাৰ পৰিকল্পনা কৰা হৈছে। ভূমি নিৰ্বাচন আৰু আন আন প্ৰক্ৰিয়া সম্পূৰ্ণ কৰাৰ পাছত প্ৰকল্পটো ৰূপায়ণৰ দিশত আগবাঢ়িছে ৰাজ্য চৰকাৰ।
কেশৱ মহন্তই কয় যে মুখ্যমন্ত্ৰীৰ দূৰদৰ্শী চিন্তা আৰু কেন্দ্ৰীয় চৰকাৰৰ সহযোগিতাৰ ফলতেই অসমত এনে এটা গুৰুত্বপূৰ্ণ মহাকাশ গৱেষণা প্ৰকল্প স্থাপনৰ পথ প্ৰশস্ত হৈছে। প্ৰধানমন্ত্ৰী নৰেন্দ্ৰ মোদীৰ তত্বাৱধানত অসমে কেইবাটাও বৃহৎ প্ৰকল্প লাভ কৰিছে বুলিও তেওঁ উল্লেখ কৰে।
অনুষ্ঠানত মুখ্যমন্ত্ৰীয়ে সোণাপুৰত নিৰ্মাণাধীন বিশাল পৰিসৰৰ ছায়েন্স চিটীৰ কথাও উল্লেখ কৰে। তেওঁৰ মতে, বিজ্ঞানৰ প্ৰতি ছাত্ৰ-ছাত্ৰী আৰু যুৱ প্ৰজন্মৰ আগ্ৰহ বৃদ্ধি কৰাৰ লগতে অসমক বিজ্ঞান-প্ৰযুক্তিৰ ক্ষেত্ৰত আগুৱাই নিয়াৰ ক্ষেত্ৰত ছায়েন্স চিটীয়েও গুৰুত্বপূৰ্ণ ভূমিকা পালন কৰিব।
চন্দ্ৰপুৰত ISROৰ গৱেষণা কেন্দ্ৰ আৰু সোণাপুৰৰ ছায়েন্স চিটীৰ দৰে প্ৰকল্পই বৃহত্তৰ গুৱাহাটী আৰু ইয়াৰ আশে-পাশে অঞ্চলসমূহৰ বিকাশতো ইতিবাচক প্ৰভাৱ পেলাব বুলি মুখ্যমন্ত্ৰীয়ে আশা প্ৰকাশ কৰে।
অনুষ্ঠানত মুখ্যমন্ত্ৰীয়ে ৰাজ্যখনৰ আন কেইবাটাও বৃহৎ প্ৰকল্পৰ বিষয়েও উল্লেখ কৰে। অহা ৫ অক্টোবৰত বঙাইগাঁও চিকিৎসা মহাবিদ্যালয়ৰ কাম-কাজ আৰম্ভ কৰাৰ কথা তেওঁ কয়। ইয়াৰ উপৰি ডিচেম্বৰ বা জানুৱাৰী মাহত প্ৰধানমন্ত্ৰী নৰেন্দ্ৰ মোদীয়ে অসমলৈ আহি ছেমিকণ্ডাক্টৰ প্ৰকল্প উদ্বোধন কৰাৰ সম্ভাৱনাৰ কথাও তেওঁ উল্লেখ কৰে।
এইদৰে স্বাস্থ্য, উদ্যোগ, বিজ্ঞান আৰু মহাকাশ গৱেষণা—বিভিন্ন ক্ষেত্ৰত একেলগে নতুন আন্তঃগাঁথনি গঢ়ি তোলাৰ প্ৰক্ৰিয়াই অসমৰ উন্নয়নৰ নতুন দিশ মুকলি কৰিছে বুলি অনুষ্ঠানত বক্তাসকলে মত প্ৰকাশ কৰে।
চন্দ্ৰপুৰৰ এই গুৰুত্বপূৰ্ণ অনুষ্ঠানত বিজ্ঞান আৰু প্ৰযুক্তি বিভাগৰ মন্ত্ৰী কেশৱ মহন্ত, গুৱাহাটীৰ সাংসদ বিজুলী কলিতা মেধি, স্থানীয় বিধায়ক তপন দাস, ISROৰ অধ্যক্ষ ড০ ভি. নাৰায়ণন আৰু ইষ্ট্ৰেকৰ সঞ্চালক এম. আৰ. ৰাঘবেন্দ্ৰসহ কেইবাগৰাকীও বিশিষ্ট ব্যক্তি উপস্থিত থাকে।
চন্দ্ৰপুৰত ISROৰ উন্নত ৰাডাৰ গৱেষণা কেন্দ্ৰ স্থাপনৰ এই পদক্ষেপে অসমৰ বিজ্ঞান আৰু মহাকাশ গৱেষণাৰ ক্ষেত্ৰত নতুন সম্ভাৱনাৰ দুৱাৰ মুকলি কৰাৰ লগতে অঞ্চলটোক ভৱিষ্যতে দেশৰ মহাকাশ গৱেষণাৰ এক উল্লেখযোগ্য কেন্দ্ৰ হিচাপে গঢ়ি তোলাৰ সম্ভাৱনা সৃষ্টি কৰিছে।
