তিনিখন কৃষি আইনৰ বিৰুদ্ধে কৃষকসকলৰ প্ৰতিবাদৰ নেতৃত্ব দিয়া সংযুক্ত কিষাণ মৰ্চাই শুকুৰবাৰে ঘোষণা কৰে যে প্ৰতিবাদকাৰী কিষাণসকলে ২৫ ছেপ্টেম্বৰত দেশব্যাপী ভাৰত বন্ধ পালন কৰিব। ২০২০ চনৰ নৱেম্বৰ মাহত আৰম্ভ হোৱা চলিত কৃষক আন্দোলনক শক্তিশালী আৰু সম্প্ৰসাৰিত কৰিবলৈ এই সিদ্ধান্ত গ্ৰহণ কৰা হৈছে বুলি জনাইছে মৰ্চাই। সংযুক্ত কিষাণ মৰ্চাৰ সদস্য আশীষ মিত্তালে দিল্লীৰ সিংহু সীমান্তত এখন সংবাদমেল সম্বোধন কৰি ঘোষণা কৰে যে “আমি ২৫ ছেপ্টেম্বৰত ‘ভাৰত বন্ধ’ৰ আহ্বান জনাইছো। আমাৰ আশা কৰ’না মহামাৰীৰ মাজত বিগত বৰ্ষৰ ২৫ ছেপ্টেম্বৰৰ বন্ধতকৈ এইবাৰৰ বন্ধটো অধিক জনমুখী হ’ব।
