বলিউডৰ বাদশ্বাহ শ্বাহৰুখ খানৰ মুম্বাইৰ বিলাসী বাসগৃহ ‘মন্নত’ কেৱল এটা ঘৰেই নহয়, ই লাখ লাখ অনুৰাগীৰ বাবে এক আৱেগৰ নাম। কিন্তু আজি যিটো ঘৰ বলিউডৰ অন্যতম চিনাকি ঠিকনা হিচাপে পৰিচিত, সেই ঘৰটো ক্ৰয় কৰাটো এসময়ত শ্বাহৰুখ খানৰ সামৰ্থ্যৰ বাহিৰত আছিল। শেহতীয়াকৈ ডুবাইত অনুষ্ঠিত এটা অনুষ্ঠানত নিজৰ সপোনৰ ঘৰ ক্ৰয় কৰাৰ আঁৰৰ সংগ্ৰাম আৰু আৱেগৰ কথা প্ৰকাশ কৰিছে অভিনেতাগৰাকীয়ে।
বৃহস্পতিবাৰে ডুবাইত ‘Shahrukhz Residences by Danube’ নামৰ এটা বিলাসী আৱাসিক প্ৰকল্পৰ শুভাৰম্ভণি অনুষ্ঠানত অংশগ্ৰহণ কৰিছিল শ্বাহৰুখ খান আৰু তেওঁৰ পত্নী গৌৰী খানে। অনুষ্ঠানটোত চলচ্চিত্ৰ নিৰ্মাতা কৰণ জোহৰো উপস্থিত আছিল। সেই অনুষ্ঠানতে নিজৰ জীৱনৰ অভিজ্ঞতা বৰ্ণনা কৰি শ্বাহৰুখে কয় যে, ঘৰ থকাটো তেওঁৰ জীৱনৰ আটাইতকৈ ডাঙৰ সপোনসমূহৰ ভিতৰত অন্যতম আছিল।
নিজৰ বাসগৃহ ‘মন্নত’ৰ কথা উল্লেখ কৰি শ্বাহৰুখে কয় যে, গৌৰীৰ সৈতে তেওঁ ক্ৰয় কৰা প্ৰথমটো ঘৰো তেওঁলোকৰ সামৰ্থ্যৰ বাহিৰত আছিল। পৰৱৰ্তী সময়ত ক্ৰয় কৰা মন্নত ঘৰটোও তেওঁলোকৰ আৰ্থিক সামৰ্থ্যৰ তুলনাত যথেষ্ট ব্যয়বহুল আছিল।
অভিনেতাগৰাকীয়ে কয়, জীৱনত ভাল-বেয়া, সুখ-দুখৰ বহু সময় আহে। কেতিয়াবা মানুহে হতাশাৰ সন্মুখীন হ’বলগীয়া হয়। কিন্তু দিনটোৰ শেষত নিজৰ ঘৰলৈ উভতি আহি মানুহে পুনৰ শক্তি সঞ্চয় কৰিব পাৰে। ঘৰতে মানুহে মনটো শান্ত কৰিব পাৰে, নতুনকৈ চিন্তা কৰিব পাৰে আৰু বাহিৰৰ কঠিন পৃথিৱীখনৰ সন্মুখীন হ’বলৈ পুনৰ সাজু হ’ব পাৰে।
তেওঁৰ মতে, ঘৰ কেৱল বাস কৰাৰ এটা স্থান নহয়; ই মানুহৰ আৱেগ, পৰিচয় আৰু আত্মবিশ্বাসৰো এক গুৰুত্বপূৰ্ণ অংশ।
শ্বাহৰুখ খানে নিজৰ শৈশৱৰ কথাও সুঁৱৰে। কম বয়সতে পিতৃ-মাতৃক হেৰুওৱাৰ পিছত নিজৰ বুলি ক’ব পৰা এটা স্থায়ী ঘৰৰ অভাৱ অনুভৱ কৰিছিল তেওঁ। সেই অভিজ্ঞতাই তেওঁৰ মনত নিজৰ ঘৰ এটা থকাৰ প্ৰবল আকাংক্ষা সৃষ্টি কৰিছিল।
তেওঁ কয় যে, চলচ্চিত্ৰ, পৰিয়াল আৰু কামৰ প্ৰতি তেওঁৰ গভীৰ ভালপোৱা আছে। কিন্তু পৃথিৱীৰ আন সকলো বস্তুতকৈ নিজৰ ঘৰ থকাৰ সপোনটো তেওঁৰ বাবে বিশেষ। গৌৰীৰ সৈতে বিবাহৰ পূৰ্বে তেওঁৰ নিজৰ কোনো ঘৰ নাছিল বুলিও উল্লেখ কৰে অভিনেতাগৰাকীয়ে।
আনকি কোনো নতুন চহৰলৈ গ’লে সেই ঠাইখন ভাল লাগিলেই তাত ঘৰ কিনাৰ কথা পৰিয়ালক কয় শ্বাহৰুখে। তেওঁৰ সন্তানসকলে এই অভ্যাসক লৈ প্ৰায়ে ধেমালি কৰে। তেওঁলোকৰ মতে, পাপাই প্ৰতিখন চহৰতে ঘৰ কিনিব নোৱাৰে!
অনুষ্ঠানত উপস্থিত লোকসকলক উদ্দেশ্যি শ্বাহৰুখ খানে কয় যে, নিজৰ সপোনক কেতিয়াও সৰু কৰি চাব নালাগে। মনৰ পৰা বিচাৰিলে আৰু নিজৰ ওপৰত বিশ্বাস ৰাখিলে সপোন পূৰণৰ পথ বিচাৰি পোৱা যায়।
তেওঁৰ ভাষ্য অনুসৰি, সপোনৰ ঘৰ এটা বিচাৰিবলৈ হ’লে ডাঙৰকৈ সপোন দেখিব লাগিব, নিজৰ ওপৰত বিশ্বাস ৰাখিব লাগিব আৰু সৰ্বশক্তিমানৰ ওপৰত আস্থা ৰাখিব লাগিব। আন্তৰিকতাৰে প্ৰাৰ্থনা কৰিলে আৰু লক্ষ্যৰ দিশত আগবাঢ়িলে জীৱনত সপোনৰ ঘৰ লাভ কৰাটো সম্ভৱ বুলি তেওঁ মন্তব্য কৰে।
উল্লেখ্য যে, ডুবাইৰ ডানিউব গ্ৰুপে শ্বাহৰুখ খানৰ নামত ‘Shahrukhz Residences’ নামৰ নতুন এটা বিলাসী আৱাসিক প্ৰকল্প মুকলি কৰিছে। ডুবাই মেৰিটাইম চিটিত অৱস্থিত এই প্ৰকল্পটোত বিলাসী ৱাটাৰফ্ৰণ্ট পেণ্টহাউছ নিৰ্মাণ কৰা হৈছে। প্ৰকল্পটোৰ পেণ্টহাউছসমূহৰ আভ্যন্তৰীণ সজ্জাৰ পৰিকল্পনা কৰিছে শ্বাহৰুখৰ পত্নী তথা ইণ্টেৰিয়ৰ ডিজাইনাৰ গৌৰী খানে।
ইফালে, কৰ্মজীৱনৰ ক্ষেত্ৰত শ্বাহৰুখ খানৰ পৰৱৰ্তী ছবি ‘King’ মুক্তিৰ বাবে সাজু হৈছে। সিদ্ধাৰ্থ আনন্দ পৰিচালিত ছবিখনত শ্বাহৰুখৰ সৈতে অভিনয় কৰিছে সুহানা খান, দীপিকা পাডুকন, অভিষেক বচ্চন আৰু অনিল কাপুৰকে ধৰি কেইবাগৰাকীও তাৰকাই। ছবিখন ২৪ ডিচেম্বৰ, ২০২৬ত ছবিগৃহত মুক্তি পোৱাৰ কথা।
