অৰুণাচল প্ৰদেশৰ একাধিক স্থানত ভাৰত আৰু চীনৰ সেনাৰ মাজত মুখামুখি সংঘৰ্ষৰ ঘটনা সংঘটিত হোৱা বুলি স্বীকাৰ কৰিছে ভাৰত-তিব্বত সীমান্ত আৰক্ষী (ITBP)ৰ সঞ্চালক প্ৰধান শত্ৰুজিৎ কাপুৰে। বৃহস্পতিবাৰে ৰাজস্থানৰ আলৱাৰত ITBPৰ বাৰ্ষিক সম্বৰ্ধনা অনুষ্ঠানত ভাষণ দি তেওঁ পৰিস্থিতি এতিয়াও অব্যাহত থকা বুলি প্ৰকাশ কৰে।
কাপুৰে অৱশ্যে চীনৰ নাম উল্লেখ নকৰিলেও অৰুণাচল প্ৰদেশৰ পৰিস্থিতি নিয়ন্ত্ৰণৰ ক্ষেত্ৰত ITBPৰ নতুনকৈ গঠন কৰা শৌৰ্য কমাণ্ডো দলসমূহৰ ভূমিকাৰ প্ৰশংসা কৰে।
উল্লেখ্য যে, অৰুণাচল প্ৰদেশৰ টাকছিং অঞ্চলত সীমান্তকেন্দ্ৰিক উত্তেজনাৰ বাতৰিৰ মাজতে যোৱা ৬ ছেপ্টেম্বৰত ভাৰতৰ ৱাচা-দামাই সীমান্ত বৈঠকস্থলীত দুয়োখন দেশৰ সেনাৰ ক’ৰ কমাণ্ডাৰ পৰ্যায়ৰ বৈঠক অনুষ্ঠিত হৈছিল। প্ৰকৃত নিয়ন্ত্ৰণ ৰেখা (LAC)ৰ কাষৰ সমস্যাসমূহ সমাধানৰ লক্ষ্যৰে এই বৈঠক অনুষ্ঠিত কৰা হৈছিল।
ইয়াৰ পূৰ্বে দুয়োখন দেশৰ স্থানীয় সেনা কমাণ্ডাৰসকলৰ মাজতো কেইবালানি বৈঠক অনুষ্ঠিত হৈছিল। সূত্ৰ অনুসৰি, পৰিস্থিতিৰ অধিক অৱনতি ৰোধ কৰিবলৈ অঞ্চলটোত বৃহৎ সংখ্যক ভাৰতীয় সেনা মোতায়েন হৈ আছে।
ইফালে, ITBPৰ অস্ত্ৰ-শস্ত্ৰ আধুনিকীকৰণৰ প্ৰয়োজনীয়তাৰ ওপৰতো গুৰুত্ব আৰোপ কৰে সঞ্চালক প্ৰধানগৰাকীয়ে। বহু জোৱানে এতিয়াও যোগদানৰ সময়ত ব্যৱহাৰ কৰা পুৰণি ধৰণৰ অস্ত্ৰ ব্যৱহাৰ কৰি থকা বুলি উল্লেখ কৰি তেওঁ আধুনিকীকৰণৰ বাবে বৃহৎ পৰিমাণৰ ধন আবণ্টন কৰা হৈছে বুলি জানিবলৈ দিয়ে।
ড্ৰ’নৰ ক্ৰমবৰ্ধমান সামৰিক গুৰুত্বৰ বিষয়েও মন্তব্য কৰে কাপুৰে। ৰাছিয়া-ইউক্ৰেইন যুদ্ধ আৰু ইৰানৰ ড্ৰ’ন ব্যৱহাৰৰ উদাহৰণ দাঙি ধৰি তেওঁ কয় যে আধুনিক প্ৰযুক্তিয়ে তুলনামূলকভাৱে সৰু শক্তিকো শক্তিশালী প্ৰতিপক্ষৰ প্ৰত্যাহ্বানৰ সন্মুখীন হ’বলৈ সক্ষম কৰি তুলিছে।
উল্লেখ্য যে, ২০০৪ চনত চীন সীমান্তত পহৰাৰ দায়িত্ব লাভ কৰা ITBPৰ সীমান্ত সুৰক্ষাৰ লগতে পাৰ্বত্য যুদ্ধৰ ক্ষেত্ৰতো বিশেষ ভূমিকা আছে।
