ৰাজধানী দিল্লীৰ দুখন আগশাৰীৰ বিদ্যালয়লৈ বোমা বিস্ফোৰণৰ ভাবুকি অহাৰ খবৰ পোৱা গৈছে। সূত্ৰ অনুসৰি, ৰোহিণীৰ ভেংকটেশ্বৰ পাব্লিক স্কুল (Venkateshwar Public School) আৰু ময়ুৰ বিহাৰৰ চালৱান পাব্লিক স্কুল (Salwan Public School)লৈ ইমেইল যোগে এই ভাবুকি প্ৰেৰণ কৰা হৈছে।
এই খবৰ পোৱাৰ লগে লগে দিল্লী আৰক্ষী আৰু অগ্নি নিৰ্বাপক বাহিনীৰ দল তৎপৰতাৰে ঘটনাস্থলীত উপস্থিত হৈ তন্ন তন্নকৈ তালাচী অভিযান চলায়। বৰ্তমান আৰক্ষীয়ে এই ভাবুকিৰ উৎসৰ সন্ধানত তদন্ত অব্যাহত ৰাখিছে আৰু বিদ্যালয়ৰ চৌহদত নিৰাপত্তা ব্যৱস্থা কটকটীয়া কৰি তুলিছে।
উল্লেখ্য যে, ইয়াৰ পূৰ্বেও বিগত কেইটামান সপ্তাহত দিল্লীৰ আন কেইবাখনো বিদ্যালয়লৈ এনেধৰণৰ বোমাৰ ভাবুকি অহাৰ ঘটনা ঘটিছিল।
