এইবাৰ দিল্লীৰ ৰামলীলা উৎসৱত দেখা যাব এক ব্যতিক্ৰমী দৃশ্য! ৰাৱণ, কুম্ভকৰ্ণ আৰু মেঘনাদৰ প্ৰতিমূৰ্তিৰ সৈতে দাহ কৰা হ’ব ৩০ ফুট উচ্চতাৰ এটা প্ৰকাণ্ড পঁইতাচোৰাৰ প্ৰতিমূৰ্তি।
দিল্লীৰ পিতমপুৰাত শ্ৰী কেশৱ ৰামলীলা সমিতিয়ে আয়োজন কৰা এই অনুষ্ঠানত পঁইতাচোৰাটোক লেতেৰা আৰু অপৰিষ্কাৰ পৰিৱেশৰ প্ৰতীক হিচাপে উপস্থাপন কৰা হ’ব। স্বচ্ছ ভাৰত অভিযান আৰু স্বচ্ছ দিল্লী অভিযানৰ প্ৰতি সজাগতা সৃষ্টি কৰাই এই পদক্ষেপৰ মূল উদ্দেশ্য বুলি জনাইছে আয়োজক সমিতিয়ে।
সমিতিৰ সভাপতি তথা বিজেপিৰ বিধায়ক অশোক গোৱেলে স্পষ্ট কৰি দিয়ে যে এই সিদ্ধান্তৰ সৈতে কোনো ৰাজনৈতিক উদ্দেশ্য জড়িত নাই। তেওঁৰ মতে, ৰাৱণৰ সেনাৰ এজন অসুৰ হিচাপে পঁইতাচোৰাটোক দেখুওৱা হ’ব আৰু ইয়াৰ দাহে অন্যায়ৰ ওপৰত ন্যায় তথা অশুভৰ ওপৰত শুভৰ জয়ৰ বাৰ্তা প্ৰচাৰ কৰিব।
কিন্তু এইবাৰ প্ৰকাণ্ড পঁইতাচোৰাটোৰ প্ৰৱেশ ঘটিছে এক ব্যতিক্ৰমী ৰাজনৈতিক পৰিস্থিতিৰ মাজত। দিল্লীত কক্ৰ’চ জনতা পাৰ্টি (CJP) নামৰ এটা গোটে পূৰ্বে প্ৰাক্তন কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ বিৰুদ্ধে প্ৰতিবাদ সাব্যস্ত কৰিছিল। এতিয়া মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীতো গোটটোৱে প্ৰতিবাদত অংশ লৈছে।
এইবাৰ দশেৰাত ৰাৱণৰ লগতে পঁইতাচোৰাও হ’ব আকৰ্ষণৰ কেন্দ্ৰবিন্দু। ৰাৱণ বধৰ সৈতে যদি পঁইতাচোৰা বধো হয়, তেন্তে দিল্লীৰ ৰামলীলা উৎসৱত এইবাৰ যেন অশুভ শক্তিৰ বিৰুদ্ধে যুঁজৰ লগতে পৰিষ্কাৰ-পৰিচ্ছন্নতাৰো এক বিশেষ বাৰ্তা প্ৰচাৰ হ’ব!
এইবাৰ ৰাৱণৰ সেনাত কেৱল অসুৰেই নহয়, পঁইতাচোৰাৰো ৰেহাই নাই!
