ভাৰতীয় ক্ৰিকেট দলৰ পেচ বলাৰ অৰ্শ্বদীপ সিঙৰ আঘাতক লৈ উদ্বেগৰ সৃষ্টি হৈছে। ৱেষ্ট ইণ্ডিজৰ বিৰুদ্ধে হায়দৰাবাদত অনুষ্ঠিত চতুৰ্থখন টি-২০ মেচৰ সময়ত বলিং কৰা কান্ধত আঘাত পায় অৰ্শ্বদীপ সিঙ। ইয়াৰ পিছতে বেংগালুৰুত অনুষ্ঠিত হ’বলগীয়া শৃংখলাৰ অন্তিমখন টি-২০ মেচৰ বাবে অভিজ্ঞ পেচ বলাৰ ভূৱনেশ্বৰ কুমাৰক ভাৰতীয় দলত অন্তৰ্ভুক্ত কৰা হৈছে।
দলীয় সূত্ৰৰ তথ্য অনুসৰি, অৰ্শদীপ সিঙে অন্তিমখন মেচত খেলিব পাৰিব নে নোৱাৰে, সেই সিদ্ধান্ত তেওঁৰ আঘাতৰ পৰা সুস্থ হৈ উঠাৰ ওপৰত ভিত্তি কৰি মেচৰ পূৰ্বে গ্ৰহণ কৰা হ’ব।
উল্লেখ্য যে, প্ৰায় চাৰি বছৰৰ ব্যৱধানৰ পিছত পুনৰ ভাৰতীয় দললৈ প্ৰত্যাৱৰ্তনৰ সুযোগ লাভ কৰিছে ভুৱনেশ্বৰ কুমাৰে। ২২ অক্টোবৰৰ পৰা নিউজিলেণ্ডৰ বিৰুদ্ধে আৰম্ভ হ’বলগীয়া টি-২০ শৃংখলাৰ বাবেও তেওঁক ভাৰতীয় দলত নিৰ্বাচিত কৰা হৈছে। ২০২২ চনৰ নৱেম্বৰত নিউজিলেণ্ডৰ বিৰুদ্ধে অনুষ্ঠিত মেচখনেই আছিল তেওঁৰ অন্তিম আন্তঃৰাষ্ট্ৰীয় উপস্থিতি।
আই পি এল ২০২৬ত ৰয়েল চেলেঞ্জাৰ্ছ বেংগালুৰুৰ হৈ দৰ্শনীয় প্ৰদৰ্শন আগবঢ়াইছিল ভূৱনেশ্বৰ কুমাৰে। ১৬খন মেচত ২৮টা উইকেট দখল কৰাৰ লগতে প্ৰতি অভাৰত ৭.৯৫ ৰানৰ ইক’নমি ৰেট বজাই ৰাখি পুনৰ ৰাষ্ট্ৰীয় দললৈ প্ৰত্যাৱৰ্তনৰ পথ প্ৰশস্ত কৰে অভিজ্ঞ বলাৰগৰাকীয়ে।
২০২৩ আৰু ২০২৪ৰ আই পি এলত ছানৰাইজাৰ্ছ হায়দৰাবাদৰ হৈ খেলা ভূৱনেশ্বৰ কুমাৰে ২০২৫ৰ ছিজনৰ পূৰ্বে আৰ চি বিৰ দলত যোগদান কৰিছিল। ২০২৫ৰ ছিজনত ১৪খন মেচত ১৭টা উইকেট দখল কৰাৰ পিছত ২০২৬ত অধিক উন্নত প্ৰদৰ্শনেৰে নিৰ্বাচকৰ দৃষ্টি আকৰ্ষণ কৰিবলৈ সক্ষম হয়।
ভাৰতীয় দলৰ সংশোধিত তালিকা: শ্ৰেয়াছ আয়াৰ (অধিনায়ক), অভিষেক শৰ্মা, বৈভৱ সূৰ্যবংশী, ঈশান কিষাণ (উইকেটকীপাৰ), সঞ্জু ছেমছন (উইকেটকীপাৰ), তিলক বাৰ্মা (সহঃ অধিনায়ক), শিৱম ডুবে, কুলদীপ যাদৱ, অক্ষৰ পেটেল, ৰবি বিষ্ণই, নীতিশ কুমাৰ ৰেড্ডী, প্ৰিন্স যাদৱ, অৰ্শ্বদীপ সিঙ, মায়ংক যাদৱ, নমন ধীৰ আৰু ভূৱনেশ্বৰ কুমাৰ।
