মেৰাপানী সীমান্তৰ ২ নং নেঘেৰীবিলত পুনৰ উচ্ছেদ অভিযানক লৈ তীব্ৰ চাঞ্চল্যৰ সৃষ্টি হৈছে। শনিবাৰৰ পৰা অঞ্চলটোত পুনৰ উচ্ছেদ অভিযান আৰম্ভ হ’ব। উচ্ছেদৰ স্থগিতাদেশ লাভ কৰা ৫৯টা পৰিয়ালক ঘৰ খালী কৰিবলৈ বন বিভাগে চূড়ান্ত নিৰ্দেশ জাৰি কৰিছে।
শুকুৰবাৰে বন বিভাগে মাইকযোগে প্ৰচাৰ চলাই পৰিয়ালকেইটাক নিজৰ বয়-বস্তু সামৰি ঘৰ এৰিবলৈ নিৰ্দেশ দিয়ে। বন বিভাগৰ এই নিৰ্দেশৰ পিছতে অঞ্চলটোত পুনৰ উত্তেজনা আৰু উৎকণ্ঠাই বিৰাজ কৰিছে। উচ্ছেদৰ সন্মুখীন হোৱা পৰিয়ালকেইটাৰ মাজত নিজৰ ঘৰ-দুৱাৰ হেৰুওৱাৰ আশংকাই দেখা দিছে।
উল্লেখযোগ্য যে, ইয়াৰ পূৰ্বেও নেঘেৰীবিলত উচ্ছেদ অভিযান চলাইছিল প্ৰশাসনে। সেই সময়ত মুঠ ২০৫টা পৰিয়ালৰ ভিতৰত ৫৯টা পৰিয়ালে উচ্চতম ন্যায়ালয়ৰ পৰা স্থগিতাদেশ লাভ কৰাৰ ফলত সাময়িকভাৱে উচ্ছেদৰ পৰা সকাহ পাইছিল।
কিন্তু পুনৰ ঘৰ খালী কৰাৰ নিৰ্দেশ লাভ কৰাৰ পিছত পৰিয়ালকেইটাৰ ভৱিষ্যতক লৈ অনিশ্চয়তা গভীৰ হৈ পৰিছে। শনিবাৰৰ পৰা হ’বলগীয়া উচ্ছেদ অভিযানক লৈ এতিয়া সমগ্ৰ অঞ্চলটোতে তীব্ৰ উৎকণ্ঠাৰ সৃষ্টি হৈছে।
