ডিব্ৰুগড় বিশ্ববিদ্যালয়লৈ পুনৰ আন্তঃৰাষ্ট্ৰীয় স্বীকৃতি। ২০২৬ চনৰ Stanford/Elsevier Top 2% Scientistsৰ সন্মানীয় তালিকাত স্থান লাভ কৰিছে বিশ্ববিদ্যালয়খনৰ তিনিগৰাকী গৱেষক-শিক্ষাবিদে। এই সাফল্য অৰ্জন কৰা তিনিগৰাকী হৈছে গণিত বিভাগৰ সহযোগী অধ্যাপক ড০ পলাশ দত্ত, ভেষজ বিজ্ঞান বিভাগৰ অধ্যাপক মলয় কুমাৰ দাস আৰু বিশ্ববিদ্যালয়খনৰ পৰীক্ষা-নিয়ন্ত্ৰক ড০ ছাদিক হুছেইন। তেওঁলোকৰ এই সাফল্যই ৰাজ্যখনৰ উচ্চ শিক্ষা আৰু গৱেষণাৰ ক্ষেত্ৰখনলৈ বিশেষ গৌৰৱ কঢ়িয়াই আনিছে।
Stanford University আৰু Elsevierৰ সহযোগত প্ৰস্তুত কৰা এই তালিকাখনত বিভিন্ন বৈজ্ঞানিক ক্ষেত্ৰত গৱেষণাৰ প্ৰভাৱ আৰু অৱদানৰ ভিত্তিত বিশ্বৰ অগ্ৰণী বিজ্ঞানীসকলক স্বীকৃতি প্ৰদান কৰা হয়। ২২টা বৈজ্ঞানিক ক্ষেত্ৰ আৰু ১৭৪টা উপ-ক্ষেত্ৰৰ গৱেষকসকলক তেওঁলোকৰ সমগ্ৰ কৰ্মজীৱনৰ গৱেষণামূলক অৱদান (Career-Long) আৰু নিৰ্দিষ্ট এটা বছৰৰ গৱেষণাৰ প্ৰভাৱ (Single-Year) আদি সূচকৰ ভিত্তিত মূল্যায়ন কৰা হয়।
ড০ পলাশ দত্তৰ গৱেষণামূলক অৱদান
ড০ পলাশ দত্ত ডিব্ৰুগড় বিশ্ববিদ্যালয়ৰ গণিত বিভাগৰ সহযোগী অধ্যাপক। তেওঁৰ গৱেষণাৰ মূল ক্ষেত্ৰসমূহৰ ভিতৰত Fuzzy Set Theory, Multi-Criteria Decision Making আৰু Uncertainty Modelling উল্লেখযোগ্য। বিশেষকৈ Hyperbolic Fuzzy Set Theory আৰু Quintic Fuzzy Setৰ ক্ষেত্ৰত তেওঁৰ গৱেষণাই আন্তঃৰাষ্ট্ৰীয় পৰ্যায়ত স্বীকৃতি লাভ কৰিছে।
২০১৩ চনত ডিব্ৰুগড় বিশ্ববিদ্যালয়ত যোগদান কৰাৰ পাছৰে পৰা তেওঁ শিক্ষাদান আৰু গৱেষণাৰ ক্ষেত্ৰত সক্ৰিয়ভাৱে জড়িত হৈ আছে। তেওঁৰ গৱেষণাৰ প্ৰয়োগ অপাৰেশ্যন গৱেষণা, স্বাস্থ্যসেৱাৰ ক্ষেত্ৰত সিদ্ধান্ত গ্ৰহণৰ সহায়ক ব্যৱস্থা আৰু পৰিৱেশ ব্যৱস্থাপনাকে ধৰি বিভিন্ন ক্ষেত্ৰলৈ বিস্তৃত।
ড০ দত্তই Scopusত সূচীকৃত ১০৭খনতকৈও অধিক গৱেষণা-পত্ৰ Elsevier, Springer আৰু World Scientificৰ দৰে আন্তঃৰাষ্ট্ৰীয় প্ৰকাশন প্ৰতিষ্ঠানৰ জাৰ্নেলত প্ৰকাশ কৰিছে। তেওঁৰ গৱেষণাত Dempster-Shafer Evidence Theory, নতুন Similarity Measures আৰু চিকিৎসা-সম্পৰ্কীয় সিদ্ধান্ত গ্ৰহণৰ আৰ্হিৰ দৰে বিষয়ো অন্তৰ্ভুক্ত।
গৱেষণা-নিৰ্দেশক হিচাপে তেওঁ এগৰাকী Ph.D. গৱেষকক ডিগ্ৰী সম্পূৰ্ণ কৰাত সহায় কৰাৰ লগতে তেওঁৰ তত্ত্বাৱধানত এগৰাকী M.Phil. গৱেষকেও সফলতা লাভ কৰিছে। ২০২৫ চনত অনুষ্ঠিত আন্তঃৰাষ্ট্ৰীয় Fuzzy Logic Conferenceত গাণিতিক গৱেষণালৈ আগবঢ়োৱা অৱদানৰ স্বীকৃতিস্বৰূপে তেওঁ Outstanding Researcher Award লাভ কৰে।
উল্লেখযোগ্য যে, ড° দত্তই ২০২১ চনৰ পৰা ২০২৬ চনলৈ একেৰাহে Stanford/Elsevier Top 2% Scientistsৰ তালিকাত স্থান লাভ কৰি আহিছে। লগতে ২০২৫–২০২৬ বৰ্ষৰ Career-Long তালিকাতো স্থান লাভ কৰি তেওঁ ডিব্ৰুগড় বিশ্ববিদ্যালয়ৰ পৰা এই শ্ৰেণীত অন্তৰ্ভুক্ত হোৱা একমাত্ৰ গৱেষক হিচাপে বিশেষ স্বীকৃতি লাভ কৰিছে বুলি প্ৰদান কৰা তথ্যত উল্লেখ কৰা হৈছে।
অধ্যাপক মলয় কুমাৰ দাসৰ ঔষধ বিজ্ঞানৰ গৱেষণা
ডিব্ৰুগড় বিশ্ববিদ্যালয়ৰ ভেষজ বিজ্ঞান বিভাগৰ Pharmaceutics বিষয়ৰ অধ্যাপক মলয় কুমাৰ দাসে ঔষধ প্ৰস্তুতকৰণ আৰু উন্নত ঔষধ প্ৰদান ব্যৱস্থাৰ গৱেষণাত গুৰুত্বপূৰ্ণ অৱদান আগবঢ়াই আহিছে। তেওঁৰ গৱেষণাৰ প্ৰধান ক্ষেত্ৰসমূহৰ ভিতৰত Novel Drug Delivery Systems, Pharmaceutical Nanotechnology, Nanomedicine, Transdermal Drug Delivery আৰু Targeted Drug Delivery Systems উল্লেখযোগ্য।
অধ্যাপক দাসে বিজ্ঞান আৰু প্ৰযুক্তি বিভাগ (DST), জৈৱ প্ৰযুক্তি বিভাগ (DBT), ভাৰতীয় চিকিৎসা গৱেষণা পৰিষদ (ICMR), বিশ্ববিদ্যালয় অনুদান আয়োগ (UGC) আৰু সৰ্বভাৰতীয় কাৰিকৰী শিক্ষা পৰিষদ (AICTE)ৰ পৃষ্ঠপোষকতাত কেইবাটাও গুৰুত্বপূৰ্ণ গৱেষণা প্ৰকল্প পৰিচালনা কৰিছে।
তেওঁ আমেৰিকা যুক্তৰাষ্ট্ৰৰ টাম্পাস্থিত University of South Floridaত সন্মানীয় DBT-Biotechnology Overseas Associateship লাভ কৰাৰ লগতে লণ্ডনৰ King’s Collegeৰ Institute of Pharmaceutical Sciencesৰ সহযোগিতাত DST-UKIERI Research Award লাভ কৰে।
তেওঁৰ গৱেষণামূলক অৱদান বিভিন্ন আন্তঃৰাষ্ট্ৰীয় গৱেষণা-আলোচনীত প্ৰকাশ পাইছে। ইয়াৰ ভিতৰত পৰ্যালোচনাভিত্তিক গৱেষণা-পত্ৰ, মূল গৱেষণা-পত্ৰ আৰু আন্তঃৰাষ্ট্ৰীয় প্ৰকাশকৰ দ্বাৰা প্ৰকাশিত গ্ৰন্থৰ অধ্যায়ো অন্তৰ্ভুক্ত। ইয়াৰ উপৰি, তেওঁ কেইবাগৰাকীও M.Pharm. আৰু Ph.D. গৱেষকক গৱেষণা-নিৰ্দেশনা প্ৰদান কৰি তেওঁলোকৰ ডিগ্ৰী সম্পূৰ্ণ কৰাত সহায় কৰিছে।
ড০ ছাদিক হুছেইনৰ তথ্য-বিজ্ঞান আৰু চিকিৎসা গৱেষণাত অৱদান
ডিব্ৰুগড় বিশ্ববিদ্যালয়ৰ পৰীক্ষা-নিয়ন্ত্ৰক ড০ ছাদিক হুছেইনো ২০২৬ চনৰ সন্মানীয় তালিকাখনত স্থান লাভ কৰা আন এগৰাকী গৱেষক। তেওঁ ডিব্ৰুগড় বিশ্ববিদ্যালয়ৰ পৰাই Ph.D. ডিগ্ৰী লাভ কৰিছে আৰু বিশ্ববিদ্যালয়খনৰ পৰীক্ষা ব্যৱস্থাৰ কম্পিউটাৰকৰণৰ সৈতে জড়িত হৈ আছে।
তেওঁৰ গৱেষণাৰ প্ৰধান ক্ষেত্ৰসমূহৰ ভিতৰত Data Mining, Medical Analytics আৰু Machine Learning উল্লেখযোগ্য। চিকিৎসা বিজ্ঞানত কৃত্ৰিম বুদ্ধিমত্তা আৰু তথ্য-প্ৰযুক্তিৰ ব্যৱহাৰৰ ক্ষেত্ৰতো তেওঁ গৱেষণা অব্যাহত ৰাখিছে।
ড০ হুছেইনে “A 3D-MRI Based System and Method for Breast Cancer Diagnosis with Stacked Convolutional Networks” শীৰ্ষক এক ভাৰতীয় পেটেণ্ট লাভ কৰিছে। স্তন কেন্সাৰ চিনাক্তকৰণৰ ক্ষেত্ৰত ত্ৰিমাত্ৰিক MRI তথ্য আৰু Stacked Convolutional Networksৰ ব্যৱহাৰ এই গৱেষণাৰ মূল বিষয়।
ইয়াৰ উপৰি, তেওঁৰ “A Review of Uncertainty Quantification in Deep Learning: Techniques, Applications and Challenges” শীৰ্ষক গৱেষণা-পত্ৰখনে Elsevierৰ Information Fusion জাৰ্নেলৰ পৰা ২০২২ চনৰ Best Survey Paper Award লাভ কৰিছিল।
ড০ হুছেইন Nature Scientific Reports, Springerৰ Discover Oncology আৰু BMC Medical Informatics and Decision Makingৰ দৰে আন্তঃৰাষ্ট্ৰীয় জাৰ্নেলৰ সম্পাদকীয় পৰিষদৰ সদস্য হিচাপেও জড়িত। বৰ্তমান তেওঁ Türkiyeৰ Istanbul Medipol Hospitalৰ কৰ্কট ৰোগ-সম্পৰ্কীয় তথ্যভাণ্ডাৰৰ ওপৰত আন্তঃৰাষ্ট্ৰীয় সহযোগিতামূলক গৱেষণা কৰি আছে। এই গৱেষণাত ইটালীৰ National Research Councilৰ Institute for High-Performance Computing and Networks (ICAR-CNR) আৰু ব্ৰিটেইনৰ University of Exeter জড়িত হৈ আছে।
ডিব্ৰুগড় বিশ্ববিদ্যালয়ৰ এই তিনিগৰাকী গৱেষক-শিক্ষাবিদৰ সাফল্যই গণিত, ঔষধ বিজ্ঞান আৰু তথ্য-প্ৰযুক্তিভিত্তিক চিকিৎসা গৱেষণাৰ ক্ষেত্ৰত তেওঁলোকৰ অৱদানক আন্তঃৰাষ্ট্ৰীয় পৰ্যায়ত প্ৰতিফলিত কৰিছে। একে সময়তে এই স্বীকৃতিয়ে অসমৰ উচ্চ শিক্ষা প্ৰতিষ্ঠানসমূহত চলি থকা গৱেষণামূলক কাম-কাজৰ গুৰুত্বও পুনৰ উজলাই তুলিছে।
