নাগালেণ্ডত অভিযানকালীন কৰ্তব্য পালন কৰি থকাৰ সময়ত গুলীৰ আঘাতত অসম ৰাইফলছৰ ৰাইফলমেন ভি তেজাৰ মৃত্যু হয়। ওড়িশাৰ ৰায়গড়া জিলাৰ বাসিন্দা তেজাই ১৫ নম্বৰ অসম ৰাইফলছত কৰ্মৰত আছিল। মৃত্যুৰ সময়ত তেওঁৰ বয়স আছিল ৩০ বছৰ। দুদিন পাছতে তেওঁৰ ৩১ সংখ্যক জন্মদিন আছিল।
২০২২ চনত সশস্ত্ৰ বাহিনীত যোগদান কৰা তেজাৰ ডিচেম্বৰ মাহত বিবাহপাশত আবদ্ধ হোৱাৰ কথা আছিল। দীপাৱলীৰ পূৰ্বে তেওঁ ঘৰলৈ উভতি আহি জন্মদিন উদযাপন কৰাৰ পৰিকল্পনাও কৰিছিল।
মঙলবাৰে তেজাৰ নশ্বৰদেহ ৰায়গড়ালৈ লৈ যোৱা হয়। তেওঁক শেষ শ্ৰদ্ধা জনাবলৈ শ শ লোক সমবেত হয়। ৰায়গড়াৰ পৰা প্ৰায় ১০ কিলোমিটাৰ দূৰৰ পৰা তেওঁৰ সন্মানত এক বিশাল মটৰচাইকেল ৰেলী উলিওৱা হয়। ৰেলীত শ শ লোকে অংশগ্ৰহণ কৰাৰ লগতে আতচবাজী, ডিজে সংগীত আৰু ‘শ্বহীদ জোৱান জিন্দাবাদ’ ধ্বনিৰে পৰিৱেশ মুখৰিত হৈ পৰে।
১৫ নম্বৰ অসম ৰাইফলছৰ নাইব চুবেদাৰ ৰবীন্দ্ৰ কুমাৰ নাইকে তেজাৰ নশ্বৰদেহ পৰিয়ালৰ ওচৰলৈ লৈ অহাৰ দায়িত্বত আছিল। তেওঁ জনোৱা মতে, মৃত্যুৰ প্ৰকৃত কাৰণ মৰণোত্তৰ পৰীক্ষাৰ পিছতহে স্পষ্ট হ’ব।
তেজাৰ মাতৃৰ ভাতৃয়ে সংবাদ মাধ্যমক জনোৱা মতে, পৰিয়ালক জানিবলৈ দিয়া হৈছিল যে কৰ্তব্যৰত অৱস্থাত গুলীৰ আঘাতপ্ৰাপ্ত হৈ তেওঁৰ মৃত্যু হৈছে।
উল্লেখ্য যে প্ৰায় দুবছৰ পূৰ্বে তেজাই মৃত্যুৰ পিছত অংগদান কৰাৰ ইচ্ছা প্ৰকাশ কৰিছিল। তেওঁৰ ইচ্ছা অনুসৰি মৃত্যুৰ পিছত স্থানীয় চিকিৎসালয়ে তেওঁৰ অংগ সংগ্ৰহ কৰে।
তেজাৰ নশ্বৰদেহ প্ৰথমে হেলিকপ্টাৰেৰে বিশাখাপট্টনমলৈ অনা হয়। তাৰ পিছত এম্বুলেন্সযোগে ৰায়গড়ালৈ লৈ যোৱা হয়।
জিলা প্ৰশাসনে বৃহস্পতিবাৰে পুৱা তেজাক শেষ শ্ৰদ্ধা জনোৱাৰ বাবে প্ৰস্তুতি চলাইছে। পুৱা ৭ বজাৰ পৰা অন্ত্যেষ্টিক্ৰিয়াৰ অনুষ্ঠান আৰম্ভ হোৱাৰ কথা।
ওড়িশাৰ মুখ্যমন্ত্ৰী মোহন চৰণ মাঝিয়ে তেজাৰ মৃত্যুত গভীৰ শোক প্ৰকাশ কৰি দেশৰ প্ৰতি তেওঁৰ সেৱা আৰু ত্যাগ চিৰস্মৰণীয় হৈ থাকিব বুলি কয়। বিৰোধী দলৰ নেতা নবীন পাটনায়কেও তেজাক শ্ৰদ্ধাঞ্জলি জ্ঞাপন কৰি জোৱানজনৰ সাহস আৰু ত্যাগ ওড়িশা তথা সমগ্ৰ দেশৰ বাবে গৌৰৱৰ বিষয় বুলি উল্লেখ কৰে।
ইফালে, যোৱা ২৯ ছেপ্টেম্বৰত অৰুণাচল প্ৰদেশত ভাৰত-ম্যানমাৰ সীমান্তৰ ওচৰত সংঘটিত এক আক্ৰমণৰ কেইদিনমানৰ পাছতে তেজাৰ মৃত্যু হয়। সেই আক্ৰমণত হাবিলদাৰ জানখোকাই কুকি নিহত হোৱাৰ লগতে আন চাৰিজন জোৱান আহত হৈছিল।
