ঢকুৱাখনাৰ ঘিলামৰাত সংঘটিত হৈছে এক শোকাৱহ নাও দুৰ্ঘটনা। মেৰবিলত এখন সৰু নাও ডুব যোৱাৰ ফলত একেটা পৰিয়ালৰ তিনিজন লোকৰ কৰুণ মৃত্যু হোৱা ঘটনাই সমগ্ৰ অঞ্চলটোতে শোকৰ ছাঁ পেলাইছে।
জানিব পৰা মতে, আজি পুৱা ঘিলামৰাৰ দেৱলীয়া গাঁৱৰ কেইজনমান লোক গৰু এৰাল দিবলৈ মেৰবিল পাৰ হৈ গোহাঁইবাৰীলৈ গৈছিল। এই যাত্ৰাত তেওঁলোকে ব্যৱহাৰ কৰা সৰু নাওখন মেৰবিলৰ মাজভাগত হঠাতে ডুব যায়। নাওখন ডুব যোৱাৰ ফলত পানীত পৰি তিনিজন লোক সন্ধানহীন হৈ পৰে।
এই শোকাৱহ দুৰ্ঘটনাত পানীত ডুবি মৃত্যু হোৱা লোককেইজন হৈছে ৪৫ বছৰীয়া পদ্মা দত্ত, ২২ বছৰীয়া অজিত দত্ত আৰু ১১ বছৰীয়া কণমানি মৃদুস্মিন দত্ত
স্থানীয় লোকৰ পৰা জানিব পৰা মতে, বিগত সময়ছোৱাত মেৰবিলৰ পানী বৃদ্ধি পোৱাৰ ফলতে নাওখন দুৰ্ঘটনাত পতিত হোৱা বুলি সন্দেহ কৰা হৈছে। নাওখন ডুব যোৱাৰ খবৰ বিয়পি পৰাৰ লগে লগে স্থানীয় ৰাইজে ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে।
পিছত স্থানীয় ৰাইজে পানীৰ পৰা তিনিওজন লোকৰ মৃতদেহ উদ্ধাৰ কৰে। ঘটনাৰ খবৰ লাভ কৰাৰ পিছতে ঘিলামৰা আৰক্ষীও ঘটনাস্থলীত উপস্থিত হয় আৰু ঘটনাটোৰ সন্দৰ্ভত প্ৰয়োজনীয় তদন্ত আৰম্ভ কৰে।
এখন সৰু নাওত উঠি দৈনন্দিন কামৰ বাবে মেৰবিল পাৰ হ’বলৈ গৈ এনেদৰে তিনিজন লোকৰ কৰুণ মৃত্যু হোৱা ঘটনাই দেৱলীয়া গাঁও তথা সমগ্ৰ ঘিলামৰা অঞ্চলত গভীৰ শোকৰ ছাঁ পেলাইছে।
