মুম্বাইত অনুষ্ঠিত ইণ্ডিয়া জেমছ এণ্ড জুৱেলাৰী এৱাৰ্ডছত কেন্দ্ৰীয় গৃহমন্ত্ৰী অমিত শ্বাহে ভাৰতক কৃত্ৰিমভাৱে উৎপাদিত হীৰা (Lab-grown Diamond)ৰ বিশ্ববজাৰত নেতৃত্ব দিবলৈ আহ্বান জনাইছে। তেওঁ কয় যে, লেব-গ্ৰ’ন ডায়মণ্ডৰ বজাৰ আগন্তুক সময়ত প্ৰায় ৫০ গুণলৈ বৃদ্ধি পোৱাৰ সম্ভাৱনা আছে। সেয়েহে এই ক্ষেত্ৰত ভাৰতৰ বাবে এক বৃহৎ সুযোগ আছে।
অমিত শ্বাহে কয় যে লেব-গ্ৰ’ন ডায়মণ্ড উদ্যোগক প্ৰতিযোগিতামূলকভাৱে আগুৱাই নিয়াৰ বাবে ভাৰতত ইতিমধ্যে প্ৰয়োজনীয় আন্তঃগাঁথনি আৰু প্ৰযুক্তি গঢ় লৈ উঠিছে। উদ্যোগটোৰ অধিক সম্প্ৰসাৰণৰ বাবে চৰকাৰে প্ৰয়োজনীয় নীতি-সহায় আৰু সকলো ধৰণৰ সহযোগিতা আগবঢ়াবলৈ সাজু বুলিও তেওঁ উল্লেখ কৰে।
শ্বাহে কয়, “ভাৰতে বিশ্বৰ লেব-গ্ৰ’ন ডায়মণ্ড বজাৰত নেতৃত্ব দিব পৰাকৈ সক্ষম হ’ব লাগে।” তেওঁৰ মতে, প্ৰযুক্তি, আন্তঃগাঁথনি আৰু চৰকাৰী নীতিৰ সমন্বয় ঘটাই এই খণ্ডটোক বিশ্বমানৰ উদ্যোগ হিচাপে গঢ়ি তুলিব পাৰি।
আনফালে, দেশৰ পৰম্পৰাগত ৰত্ন আৰু অলংকাৰ উদ্যোগ শক্তিশালী কৰাৰ ক্ষেত্ৰতো চৰকাৰে গুৰুত্ব দিছে বুলি গৃহমন্ত্ৰীগৰাকীয়ে উল্লেখ কৰে। তেওঁৰ মতে, ইণ্ডিয়া জুৱেলাৰী পাৰ্কৰ বাবে প্ৰায় ৫০,০০০ কোটি টকা বিনিয়োগৰ পৰিকল্পনা কৰা হৈছে। ইয়াৰ লগতে জয়পুৰতো এটা জেমছ ব’ৰ্চ গঢ়ি তোলাৰ কাম চলি আছে।
অমিত শ্বাহে প্ৰকাশ কৰা মতে, ভাৰতৰ জেমছ এণ্ড জুৱেলাৰী উদ্যোগৰ বজাৰ মূল্য প্ৰায় ২.৫৪ লাখ কোটি টকা আৰু এই খণ্ডটোৱে প্ৰায় ৭৫ লাখ লোকক সংস্থাপন প্ৰদান কৰিছে। দেশৰ অৰ্থনৈতিক বিকাশত এই উদ্যোগটোৰ গুৰুত্বপূৰ্ণ ভূমিকা আছে বুলিও তেওঁ কয়।
ভাৰতৰ অৰ্থনৈতিক যাত্ৰাৰ কথাও উল্লেখ কৰি শ্বাহে কয় যে ২০১৪ চনত ভাৰতক তথাকথিত ‘Fragile Five’ অৰ্থনীতিৰ ভিতৰত গণ্য কৰা হৈছিল যদিও ২০২৬ চনত দেশখনে ‘Famous Five’ৰ স্থান লাভ কৰিছে। তেওঁ কয় যে এতিয়া চৰকাৰৰ লক্ষ্য হৈছে উন্নত আন্তঃগাঁথনি, আধুনিক প্ৰযুক্তি আৰু অনুকূল নীতিৰ জৰিয়তে জেমছ এণ্ড জুৱেলাৰী খণ্ডটোক অধিক শক্তিশালী কৰা। এই ক্ষেত্ৰত লেব-গ্ৰ’ন ডায়মণ্ডক ভৱিষ্যতৰ এক বৃহৎ সম্ভাৱনাময় উদ্যোগ হিচাপে বিবেচনা কৰা হৈছে।
