প্ৰশাসনৰ শীৰ্ষ পৰ্যায়ৰ এগৰাকী বিষয়াৰ বিৰুদ্ধে উত্থাপিত দুৰ্নীতি আৰু ক্ষমতাৰ অপব্যৱহাৰৰ অভিযোগে পুনৰবাৰ ৰাজ্যৰ প্ৰশাসনিক ব্যৱস্থাৰ স্বচ্ছতা লৈ প্ৰশ্ন উত্থাপন কৰিছে। জ্যেষ্ঠ ACS বিষয়া দেৱেশ্বৰ বৰাৰ বিৰুদ্ধে উত্থাপিত অভিযোগৰ তদন্তত মুখ্যমন্ত্ৰীৰ ভিজিলেন্স আৰু দুৰ্নীতি নিবাৰক সঞ্চালকালয়ে ধেমাজিত তেওঁৰ চৰকাৰী বাসগৃহত তালাচী চলোৱাক লৈ এতিয়া ব্যাপক চৰ্চা হৈছে।
৭ ছেপ্টেম্বৰত ভিজিলেন্সৰ এটা দলে ধেমাজিৰ চৰকাৰী বাসগৃহত তালাচী চলায়। অভিযোগ অনুসৰি, স্বাস্থ্য বিভাগত দায়িত্ব পালন কৰাৰ সময়ছোৱাত কিছুমান অনিয়ম সংঘটিত হোৱাৰ অভিযোগক কেন্দ্ৰ কৰি তদন্ত আৰম্ভ হৈছিল। এগৰাকী চিকিৎসকে দাখিল কৰা অভিযোগৰ ভিত্তিত প্ৰাথমিক অনুসন্ধান চলোৱাৰ পাছতে বিষয়াগৰাকীৰ বিৰুদ্ধে অধিক তদন্ত কৰা হৈছিল। তদন্তৰ সময়ত জ্ঞাত আয়ৰ উৎসৰ সৈতে অসামঞ্জস্যপূৰ্ণ সম্পত্তি থকাৰ সন্দেহো উত্থাপন হৈছে।
আজি ACS দেৱেশ্বৰ বৰাক নিশা লৈ অনা হ’ল গুৱাহাটীলৈ। মুখ্যমন্ত্ৰী তদাৰকী কোষে কালি ধেমাজিৰ নিজ কাৰ্যালয়ৰ পৰা গ্ৰেপ্তাৰ কৰিছিল ACS দেৱেশ্বৰ বৰাক। ধেমাজিৰ সমান্তৰালকৈ গুৱাহাটীৰ দুটা স্থানতো CMVৰ অভিযান। শিলপুখুৰীৰ দেৱেশ্বৰ বৰাৰ বাসগৃহত পুৱাৰে পৰা চলিছে অভিযান। আজি বিশেষ আদালতত হাজিৰ কৰোৱা হ’ব ACS দেৱেশ্বৰ বৰাক। চাকৰি দিয়াৰ নামত ধন সংগ্ৰহৰ অভিযোগ দেৱেশ্বৰ বৰাৰ বিৰুদ্ধে। লগতে ঠিকা আৰু চাকৰি বদলিকৰণৰ নামটো কমিচন লোৱাৰ অভিযোগ। ৰমেন বৰঠাকুৰৰ পৰা ৫০ কোটি টকাৰ ঠিকা দিয়াৰ নামত বিচাৰিছিল ২.৫০ কোটি। আগধন হিচাপে ৫০ লাখ টকাৰ ১০ লাখ টকা লৈছিল অনলাইনত। ২০২২ত এজন যুৱকক বিলাতী সুৰাৰ অনুজ্ঞাপত্ৰ দিয়াৰ নামত ৫০ লাখ লোৱাৰ অভিযোগ। আন এজন ঠিকাভিত্তিক কৰ্মচাৰীক এবছৰৰ দৰমহা নিদিয়াৰো অভিযোগ। এজন চিকিৎসকৰ পৰা ১৪ লাখ টকা লোৱাৰো অভিযোগ ACS বৰাৰ বিৰুদ্ধে। এজন পাণদোকানীৰ SIM ব্যৱহাৰ কৰি মুখ্যমন্ত্ৰী হিমন্ত বিশ্ব শৰ্মা, প্ৰাক্তন মুখ্যমন্ত্ৰী তৰুণ গগৈৰ লগতে ৰাজ্যৰ একাংশ মন্ত্ৰীৰ মাত মিমিক্ৰী কৰি প্ৰবঞ্চনা কৰাৰো অভিযোগ। অৰুণাচল প্ৰদেশতো দেৱেশ্বৰৰ বিৰুদ্ধে ৰুজু হৈছে প্ৰৱঞ্চনাৰ গোচৰ। ভয়ংকৰ দুৰ্নীতি অনিয়মেৰে ধন আহৰণ কৰি ঐশ্বৰ্য সম্পত্তিৰ গৰাকী হৈছিল ACS দেৱেশ্বৰ বৰা।
দেবেশ্বৰ বৰাৰ বিৰুদ্ধে উত্থাপিত অভিযোগসমূহ এতিয়াও তদন্তাধীন। ভিজিলেন্সে তালাচীৰ সময়ত কোনবোৰ নথি বা সম্পত্তি পৰীক্ষা কৰিছে, সেই সন্দৰ্ভত কৰ্তৃপক্ষই সম্পূৰ্ণ তথ্য ৰাজহুৱা কৰা নাই। কিন্তু অভিযোগৰ গুৰুত্বৰ প্ৰতি লক্ষ্য ৰাখি তদন্ত যাতে নিৰপেক্ষ, স্বচ্ছ আৰু তথ্য-প্ৰমাণৰ ভিত্তিত আগবাঢ়ে, সেয়া অত্যন্ত প্ৰয়োজনীয়। এতিয়া সকলোৰে দৃষ্টি ভিজিলেন্সৰ পৰৱৰ্তী তদন্তৰ ওপৰত। অভিযোগ সত্য নে ভিত্তিহীন, সেই কথা তদন্ত আৰু আইনী প্ৰক্ৰিয়াৰ জৰিয়তেহে স্পষ্ট হ’ব।
