সামুদ্ৰিক প্ৰতিৰক্ষা ক্ষেত্ৰত সহযোগিতা অধিক গভীৰ কৰাৰ সিদ্ধান্ত গ্ৰহণ কৰিছে ভাৰত আৰু জাপানে। নৌসেনাৰ জাহাজ নিৰ্মাণ, প্ৰতিৰক্ষা প্ৰযুক্তি, জাহাজ মেৰামতিৰ সুবিধা আৰু ‘মেক ইন ইণ্ডিয়া’ৰ অধীনত ভাৰতৰ জাহাজ নিৰ্মাণ ক্ষমতাৰ অধিক বঢ়োৱাৰ বিষয়ত দুয়োখন দেশে সহমত প্ৰকাশ কৰিছে।
বৃহস্পতিবাৰে নতুন দিল্লীত প্ৰতিৰক্ষা মন্ত্ৰী ৰাজনাথ সিং আৰু জাপানৰ প্ৰতিৰক্ষা মন্ত্ৰী শিনজিৰো কোইজুমিৰ মাজত অনুষ্ঠিত বৈঠকৰ পাছত এই সিদ্ধান্ত গ্ৰহণ কৰা হয়। বৈঠকৰ পাছতে দুয়োখন দেশে সামুদ্ৰিক নিৰাপত্তা সহযোগিতা সন্দৰ্ভত এক বুজাবুজিৰ চুক্তি (MoA) স্বাক্ষৰ কৰে।
চুক্তিখনৰ জৰিয়তে ভাৰতীয় নৌসেনা আৰু জাপান মেৰিটাইম ছেল্ফ-ডিফেন্স ফ’ৰ্চৰ মাজত সামুদ্ৰিক ক্ষেত্ৰৰ তথ্য বিনিময়, নৌসেনাৰ অনুশীলন, অনুসন্ধান আৰু উদ্ধাৰ অভিযান, মানৱীয় সাহায্য আৰু দুৰ্যোগ ব্যৱস্থাপনাৰ ক্ষেত্ৰত সহযোগিতা বৃদ্ধি পাব।
ইয়াৰ লগতে ভাৰত আৰু জাপানে নৌসেনাৰ জাহাজৰ যৌথ বিকাশ আৰু নক্সা প্ৰস্তুতৰ সম্ভাৱনা পৰীক্ষা কৰাৰ সিদ্ধান্ত লৈছে। জাপানৰ প্ৰযুক্তিগত দক্ষতা আৰু ভাৰতৰ উৎপাদন ক্ষমতাৰ সমন্বয়ৰ জৰিয়তে নৌসেনাৰ জাহাজ নিৰ্মাণৰ ক্ষেত্ৰত নতুন সহযোগিতাৰ পথ মুকলি কৰাৰ লক্ষ্য লোৱা হৈছে।
‘মেক ইন ইণ্ডিয়া’ৰ অধীনত ভাৰতৰ জাহাজ নিৰ্মাণ উদ্যোগৰ অধিক ব্যৱহাৰৰ বিষয়টোও জাপানে পৰীক্ষা কৰিব। দুয়োখন দেশে পৰস্পৰৰ নৌসেনাৰ জাহাজৰ বাবে মেৰামতি আৰু ৰক্ষণাবেক্ষণৰ সুবিধা প্ৰদানৰ দিশতো আগবাঢ়িবলৈ সহমত প্ৰকাশ কৰিছে।
বৈঠকত জাহাজত ব্যৱহৃত UNICORN সংযুক্ত যোগাযোগ এণ্টেনা ব্যৱস্থাৰ বিষয়েও আলোচনা কৰা হয়। ভাৰত আৰু জাপানৰ মাজত প্ৰথমটো প্ৰতিৰক্ষা সঁজুলি হস্তান্তৰ প্ৰকল্প হিচাপে এই ব্যৱস্থাটো আগবঢ়াই নিয়া হৈছে।
ইণ্ডো-পেচিফিক অঞ্চলত চীনৰ সামৰিক শক্তি বৃদ্ধি আৰু উত্তৰ কোৰিয়াৰ ক্ষেপণাস্ত্ৰ কাৰ্যসূচীৰ মাজতে ভাৰত-জাপানৰ মাজত এই সামুদ্ৰিক প্ৰতিৰক্ষা সহযোগিতা অধিক গুৰুত্বপূৰ্ণ হিচাপে বিবেচিত হৈছে।
